សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានអញ្ជើញចូលរួមជាគណៈអធិបតីក្នុងព្រឹត្តិការណ៍បាល់ទាត់មិត្តភាពសប្បុរសធម៌ ក្រោមមូលបទ « រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿងញៀន » នៅពហុកីឡដ្ឋានជាតិអូឡាំពិក នារសៀលថ្ងៃទី១ ខែឧសភា ឆ្នាំ២០២៤។
ពិធីមនុស្សធម៌នេះ បានប្រារព្ធធ្វើឡើងក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដោយមានការអញ្ជើញចូលរួមពីថ្នាក់ដឹកនាំស្ថាប័ននីតិប្បញ្ញត្តិ នីតិប្រតិបត្តិ សមាជិកសមាជិកាព្រឹទ្ធសភា រដ្ឋសភា និងរាជរដ្ឋាភិបាល យ៉ាងច្រើនកុះករ ជាមួយវត្តមានប្រជាពលរដ្ឋមន្រ្តីរាជការយ៉ាងអធិកអធមជាទីបំផុត។
ក្នុងនាមជាគ្រូបង្វឹកកិត្តិយសក្រុមកីឡាបាល់ទាត់ សម្តេចតេជោ ហ៊ុន សែន បានដឹកនាំ និងរៀបចំឱ្យមានព្រឹត្តិការណ៍ប្រកួតបាល់ទាត់ដើម្បីមនុស្សធម៌នេះឡើង និងបានអំពាវនាវឱ្យចូលរួមទស្សនាឱ្យបានច្រើនកុះករ ដើម្បីជំរុញចលនាមនុស្សធម៌ និងការប្រយុទ្ធប្រឆាំងគ្រឿងញៀន។ សម្តេចតេជោ ក៏បានអំពាវនាវសប្បុរសជនចូលរួមជួយថវិកា សម្រាប់ជួយមន្ទីរពេទ្យគន្ធបុប្ផាដែលកំពុងត្រូវការ សម្រាប់ព្យាបាលដល់កុមារកម្ពុជា ហើយសម្តេចតេជោ បានប្រកាសថា សម្តេច និង សម្តេចកិត្តិព្រឹទ្ធបណ្ឌិត បានចូលរួមថវិកា ចំនួន ២០០លានរៀល។
ជាការកត់សម្គាល់ក្រោយមានការអំពាវនាវរបស់ សម្តេចតេជោ ហ៊ុន សែន ថ្នាក់ដឹកនាំ មន្រ្តីរាជការ និងប្រជាពលរដ្ឋ បានចូលរួមបរិច្ចាគថវិកាដើម្បីកម្លាំងមនុស្សធម៌នៅក្នុងសង្គមខ្មែរ ជួយគាំទ្រសកម្មភាពមន្ទីរពេទ្យគន្ធបុប្ផា ក្នុងការជួយសង្រ្គោះអាយុជីវិតកុមារកម្ពុជាយ៉ាងច្រើនផុសផុល ៕