ដើម្បីឆ្លើយតបតាមការប្រគល់ភារកិច្ចរបស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នាព្រឹកថ្ងៃអង្គារ ទី៣០ ខែមេសា ឆ្នាំ២០២៤ នៅវិមានរដ្ឋសភា ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន (គណៈកម្មការទី៤) នៃរដ្ឋសភា និងជាប្រធានគណៈកម្មការពិសេសចំពោះកិច្ចដើម្បីត្រួតពិនិត្យការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់នៅរដ្ឋសភា បានអញ្ជើញដឹកនាំកិច្ចប្រជុំគណៈកម្មការពិសេសចំពោះកិច្ច ដើម្បីធានាឱ្យការងារត្រួតពិនិត្យការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់ ប្រព្រឹត្តទៅស្របតាមនីតិវិធី។
កិច្ចប្រជុំបានចាប់ផ្តើមដោយ (១) ផ្សព្វផ្សាយអំពីសេចក្តីសម្រេចលេខ០៩៩រ.ស ចុះថ្ងៃទី១២ ខែមេសា ឆ្នាំ២០២៤ ស្តីពីការបង្កើតគណៈកម្មការពិសេសចំពោះកិច្ច (២) ការស្វែងយល់អំពីហានិភ័យនៃការប្រើប្រាស់គ្រឿងញៀន (៣) នីតិវិធីក្នុងការអនុវត្តន៍ការងារត្រួតពិនិត្យគ្រឿងញៀនខុសច្បាប់របស់មន្ត្រីរាជការ ទីប្រឹក្សា មេធាវីក្រុមប្រឹក្សាអ្នកច្បាប់ ជំនួយការបុគ្គលិកជាប់កិច្ចសន្យានៅរដ្ឋសភា (៤) កំណត់កាលបរិច្ឆេទសម្រាប់ធ្វើការត្រួតពិនិត្យគ្រឿងញៀន និង (៥) កិច្ចការផ្សេងៗ។
កិច្ចប្រជុំនេះ ក៏មានការអញ្ជើញចូលរួមពីសំណាក់ ឯកឧត្តម អង្គ វង្ស វឌ្ឍានា ប្រធានគណៈកម្មការទី៦ នៃរដ្ឋសភា និងជាអនុប្រធានគណៈកម្មការពិសេសចំពោះកិច្ច លោកជំទាវ អ៊ុន សុគន្ធា លេខាធិការគណៈកម្មការទី៤ នៃរដ្ឋសភា និងជាអនុប្រធានគណៈកម្មការពិសេសចំពោះកិច្ច នាយឧត្តមសេនីយ៍ មាស វិរិទ្ធ អគ្គលេខាធិការ នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម លោកជំទាវ ជាសមាជិក សមាជិកា រដ្ឋសភា ព្រមទាំង ឯកឧត្តម លោកជំទាវ និងមន្រ្តីរាជការដែលជាជំនួយការគណៈកម្មការពិសេសចំពោះកិច្ច ៕