នៅព្រឹកថ្ងៃសុក្រ ៣រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៦ ខែមេសា ឆ្នាំ២០២៤ ឯកឧត្តម វង សូត អនុប្រធានទី២រដ្ឋសភា បានអញ្ជើញចូលរួមបុណ្យសព ឧបាសិកា រ័ត្ន ហៀក ត្រូវជាម្តាយបង្កើត ឯកឧត្តម អៀ ថារ៉ាឌី នាយករងខុទ្ទកាល័យឯកឧត្តមអនុប្រធានទី២រដ្ឋសភា និងជាប្រធាននាយកដ្ឋានគ្រប់គ្រងបុគ្គលិក នៃអគ្គនាយកដ្ឋានរដ្ឋបាល និងហិរញ្ញវត្ថុ នៃអគ្គលេខាធិការដ្ឋានរដ្ឋសភា នៅគេហដ្ឋាននៃសព ស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង (ជិតរង្វង់មូលគោ៤)។
ឧបាសិកា រ័ត្ន ហៀក បានទទួលមរណភាព នាថ្ងៃពុធ ១រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៤ ខែមេសា ឆ្នាំ២០២៤ វេលាម៉ោង ១៥:៣៣ នាទីរសៀល ក្នុងជន្មាយុ៨៩ឆ្នាំ ដោយជរាពាធ។ សពឧបាសិកា រ័ត្ន ហៀក ត្រូវបានតម្កល់ទុកធ្វើបុណ្យតាមប្រពៃណីនៅភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង (ជិតរង្វង់មូលគោ៤)។
នៅក្នុងសមានទុក្ខដ៏ក្រៀមក្រំនេះ ឯកឧត្តម វង សូត បានចូលរួមរំលែកទុក្ខជាមួយ ឯកឧត្តម អៀ ថារ៉ាឌី ព្រមទាំងក្រុមគ្រួសារ ចំពោះការបាត់បង់នូវអ្នកមានគុណ ជាមាតាបង្កើត ជាទីគោរពស្រឡាញ់ ដ៏ជ្រាលជ្រៅបំផុត និងប្រកបដោយព្រហ្មវិហារធម៌ដ៏ថ្លៃថ្លា ដែលកន្លងមក ឧបាសិកា រ័ត្ន ហៀក បានតស៊ូចិញ្ចឹមបីបាច់ថែរក្សា និងអប់រំទូន្មានបុត្រធីតារហូតក្លាយជាបញ្ញវន្ត និងជាធនធានដ៏មានតម្លៃសម្រាប់សង្គមជាតិ និងឧទ្ទិសបួងសួងសូមឱ្យដួងវិញ្ញាណក្ខន្ធឧបាសិកា រ័ត្ន ហៀក បានបដិសន្ធិក្នុងឋានសុគតិភព កុំបីឃ្លៀងឃ្លាតឡើយ ៕