ព្រះករុណា ព្រះបាទសម្តេចព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា បានយាងជាព្រះរាជាធិបតីភាពដ៏ខ្ពង់ខ្ពស់ ក្នុងព្រះរាជពិធីបុណ្យច្រត់ព្រះនង្គ័ល ដែលបានប្រារព្ធធ្វើឡើង នាព្រឹកថ្ងៃទី០៦ ខែឧសភា ឆ្នាំ២០១៥ នៅខេត្តបាត់ដំបង ជាខេត្តជង្រុកស្រូវដ៏ធំជាងគេនៅប្រទេសកម្ពុជា។
នៅក្នុងព្រះរាជពិធី ដែលជាការដាស់ស្មារតីដល់ប្រជាកសិករខ្មែរថា រដូវបង្កបង្កើនផលបានឈានចូលមកដល់នោះ ក៏មានការអញ្ជើញចូលរួម ផងដែរ ពី សម្តេចអគ្គមហាពញាចក្រី ហេង សំរិន ប្រធានរដ្ឋសភា ព្រមទាំងមន្រ្តីជាន់ខ្ពស់រដ្ឋសភា ព្រឹទ្ធសភា រាជរដ្ឋាភិបាល ព្រះរាជវង្សានុវង្ស មន្រ្តីអង្គទូតតំណាងបណ្តាប្រទេសនានាប្រចាំនៅកម្ពុជា មន្រ្តីរាជការ និង ប្រជាពលរដ្ឋនៅក្នុងខេត្តបាត់ដំបង យ៉ាងច្រើនកុះករ។
ព្រះរាជពិធីច្រត់ព្រះនង្គ័លនាទឹកដីខេត្តបាត់ដំបងឆ្នាំនេះ ឯកឧត្ដម ច័ន្ទ សុផល អភិបាលនៃគណៈអភិបាលខេត្តបាត់ដំបង ត្រូវបានព្រះមហាក្សត្រ ព្រះរាជានុញ្ញាតដ៏ខ្ពង់ខ្ពស់ឲ្យធ្វើជាតំណាងរបស់ព្រះអង្គកាន់នង្គ័លទី២ ឬហៅថា ស្តេចមាឃ រីឯភរិយារបស់ឯកឧត្ដម ជាព្រះមេហួ។ ដោយឡែកនង្គ័លទី១ តំណាងឲ្យវិស័យកសិកម្ម កាន់ដោយឯកឧត្ដម លី ផល្លា រដ្ឋលេខាធិការ ក្រសួងកសិកម្ម រុក្ខាប្រមាញ់និងនេសាទ ខណៈឯកឧត្ដម កែវ សិរីបុត្រ អគ្គលេខាធិការរង នៃគណៈកម្មការបុណ្យជាតិ អន្តរជាតិ កាន់នង្គ័លទី៣ តំណាងឲ្យព្រះបរមរាជវាំង។
សូមបញ្ជាក់ថា នៅក្នុងការផ្សងគោឧសភរាជនាឆ្នាំនេះក្នុងចំណោមអាហារ ៧មុខ រួមមាន ស្រូវ ពោត សណ្ដែក ល្ង ស្មៅ ទឹក និងសុរា គោឧសភរាជបរិភោគតែ សណ្ដែក និង ពោត ដែលជាប្រផ្នូលបញ្ជាក់ថា ឆ្នាំនេះនឹងសម្បូរទៅដោយភោគផលកសិកម្ម ពិសេស សណ្ដែក និងពោត៕
អត្ថបទនិងរូបភាពពីនាយកដ្ឋានព័ត៌មាន