ឯកឧត្តម ឡេង ប៉េងឡុងអគ្គលេខាធិការ នៃអគ្គលេខាធិការដ្ឋានរដ្ឋសភាកម្ពុជា បានអនុញ្ញាតឲ្យលោកស្រី GosiaMcBride (ហ្គោស្យា ម៉ាក់ ប្រាយដ៍) មន្រ្តីជាន់ខ្ពស់នៃអគ្គលេខាធិការរដ្ឋសភា ចក្រភពអង់គ្លេស ចូលជួបសម្តែងការគួរសម និង ពិភាក្សាការងារ នៅវិមានរដ្ឋសភា នារសៀលថ្ងៃទី២៦ ខែមីនា ឆ្នាំ២០១៥។
នៅក្នុងកិច្ចសវនាការ លោកស្រី GosiaMcBride បានជម្រាបជូនថា លោកស្រីមកអគ្គលេខាធិការដ្ឋានរដ្ឋសភាកម្ពុជា នាពេលនេះ គឺដើម្បីធ្វើការសិក្សា ស្វែងយល់ និងដកបទពិសោធន៍ អំពីដំណើរការរៀបចំ និងការប្រព្រឹត្តនៃរដ្ឋសភា ក៏ដូចជាអគ្គលេខាធិការដ្ឋានរដ្ឋសភាកម្ពុជា និងស្វែងយល់ពីគម្រោងក្នុងការលើកកម្ពស់សមត្ថភាពសភាកម្ពុជា។ លោកស្រីបន្តថា លោកស្រីនឹងរៀបចំជារបាយការណ៍ សម្រាប់ដំណើរមកកាន់សភាកម្ពុជានេះ ទៅជម្រាប ជូនថ្នាក់ដឹកនាំ អគ្គលេខាធិការដ្ឋានសភាចក្រភពអង់គ្លេស ដើម្បីបង្កើនទំនាក់ទំនងកិច្ចសហប្រតិបត្តិការ យូរអង្វែងរវាង អគ្គលេខាធិការដ្ឋានសភា នៃ ប្រទេសទាំងពីរ ឲ្យកាន់តែរឹងមាំទ្វេឡើងថែមទៀត។
ថ្លែងក្នុងកិច្ចពិភាក្សា ឯកឧត្តម ឡេង ប៉េងឡុង បានស្វាគមន៍ចំពោះ លោកស្រ្តី GosiaMcBride ដែលបានអញ្ជើញមកធ្វើទស្សនកិច្ច នៅរដ្ឋសភាកម្ពុជា និងមានគម្រោងជួយ ក្នុងការលើកកម្ពស់សមត្ថភាពសភាកម្ពុជា ដែលនេះជាចំណែកមួយក្នុងការរឹតចំណងមិត្តភាព និងកិច្ចសហប្រតិបត្តិការ រវាង ប្រទេសទាំងពីរ ជាពិសេសអង្គការនីតិប្បញ្ញត្តិនៃប្រទេសទាំងពីរ។
សូមបញ្ជាក់ថា នៅក្នុងដំណើរ មកកាន់សភាកម្ពុជានាឱកាសនេះ លោកស្រី GosiaMcBride (ហ្គោស្យា ម៉ាក់ ប្រាយដ៍) មន្រ្តីជាន់ខ្ពស់នៃអគ្គលេខា ធិការរដ្ឋសភា ចក្រភពអង់គ្លេស ក៏បានជួបពិភាក្សាការងារជាមួយថ្នាក់ដឹកនាំ និងមន្ត្រីជំនាញ នៃនាយកដ្ឋានគ្រប់គ្រងបុគ្គលិក នាយកដ្ឋានព័ត៌មាន នាយកដ្ឋានទំនាក់ទំនងអន្តរជាតិ និងនាយកដ្ឋាននីតិវិធី នៃអគ្គលេខាធិការដ្ឋានរដ្ឋសភាផងដែរ។
អត្ថបទនិងរូបភាពពីនាយកដ្ឋានព័ត៌មាន
