លោកជំទាវ ឃួន សុដារី ប្រធានក្រុមសមាជិកសភាស្រ្តីរដ្ឋសភា នៃព្រះរាជាណាចក្រកម្ពុជា និងជាប្រធានក្រុមសភាជាតិ នៃអ្នកនយោបាយស្រ្តី បាន អនុញ្ញាតឲ្យ លោកស្រី GosiaMcBride មន្រ្តីជាន់ខ្ពស់នៃអគ្គលេខាធិការរដ្ឋសភា ចក្រភពអង់គ្លេស ចូលជួបសម្តែងការគួរសម និង ពិភាក្សាការងារ នៅ វិមានរដ្ឋសភា នារសៀលថ្ងៃទី២៦ ខែមីនា ឆ្នាំ២០១៥។
លោកស្រី GosiaMcBride បានជម្រាបជូនលោកជំទាវ ឃួន សុដារី ថា លោកស្រីមកអគ្គលេខាធិការដ្ឋានរដ្ឋសភាកម្ពុជា នាពេលនេះ គឺដើម្បីធ្វើ ការសិក្សា ស្វែងយល់និងដកបទពិសោធន៍ អំពីដំណើរការរៀបចំ និងការប្រព្រឹត្តទៅនៃក្រុមនយោបាយស្រ្តីកម្ពុជា ដោយសារប្រទេសលោកស្រីមិនទាន់មានក្រុមស្រ្តីនយោបាយដូចរដ្ឋសភាកម្ពុជាទេ ម្យ៉ាងដោយប្រទេសកម្ពុជា មានសមាជិកសភាជាស្ត្រីច្រើនជាងប្រទេសអង់គ្លេសផង។ លោកស្រីលើក ឡើងទៀតថា លោកស្រីមានក្តីរីករាយ ដែលបានមកដកបទពិសោធន៍នៅកម្ពុជា ហើយលោកស្រីនឹងយករបាយការណ៍ទាំងនេះទៅជម្រាបជូនថ្នាក់ដឹកនាំអគ្គលេខាធិការដ្ឋាន សភាចក្រភពអង់គ្លេស ដើម្បីបង្កើនទំនាក់ទំនងកិច្ចសហប្រតិបត្តិការ យូរអង្វែងរវាង អគ្គលេខាធិការដ្ឋានសភា នៃប្រទេសទាំងពីរ ឲ្យកាន់តែរឹងមាំទ្វេ ឡើងថែមទៀត។
លោកជំទាវ ឃួន សុដារី បានស្វាគមន៍ចំពោះលោកស្រ្តី GosiaMcBride និងលោកស្រីបេសកជនពិសេស របស់ស្ថានទូតអង់គ្លេស ប្រចាំកម្ពុជា ដែល បានធ្វើកិច្ចសហការ ជួយគាំទ្រគម្រោងក្នុងការលើកកម្ពស់ សមត្ថភាពសភាកម្ពុជា ដែលនេះជាចំណែកមួយក្នុងការ រឹតចំណងមិត្តភាពនិងកិច្ចសហប្រតិបត្តិការ រវាងប្រទេសទាំងពីរ ជាពិសេសអង្គការនីតិប្បញ្ញត្តិនៃប្រទេសទាំងពីរ។ លោកជំទាវ ឃួន សុដារី បានរំឭកថា កាលពីពាក់កណ្តាល អាណត្តិទី៣ ឆ្នាំ២០០៦ សភាកម្ពុជាបានចាត់តាំងក្រុមសភាស្រ្តីនេះឡើង ដោយក្នុងពេលនោះ គឺសភាបានវាយតម្លៃខ្ពស់ ចំពោះក្រុមនយោបាយស្រ្តី ក្នុងការចូលរួមអនុវត្តនយោបាយយេនឌ័រ ដូចជាជម្រុញស្រ្តីនៅថ្នាក់ក្រោមជាតិចូលរួមឈរជាបេក្ខជន និងការផ្សព្វផ្សាយអប់រំ អំពីបញ្ហាការអនុវត្តអនុសញ្ញា ស៊ីដូស។ល។ លោកជំទាវបន្តទៀតថា នៅក្នុងអាណត្តិទី៥នេះ សម្តេចប្រធានរដ្ឋសភាបានចាត់តាំង អ្នកនយោបាយស្រ្តីដែលហៅថា womencaucus មានសមាសភាព៧រូប ដែលមានលោកជំទាវ ផ្ទាល់ជាប្រធាន និងលោកជំទាវ មួរ សុខហួរ ជាអនុប្រធាន។
លោកជំទាវ ឃួន សុដារី បញ្ជាក់ថា ការបង្កើតក្រុមស្រ្តីនយោបាយនេះឡើង គឺដើម្បីជាសេនាធិការ របស់សភាជាតិ ក្នុងការអនុវត្តនយោបាយយេនឌ័រ ចូលរួមក្នុងការជំរុញលើកទឹកចិត្តស្រ្តីឲ្យចូលរួមក្នុងវិស័យ នយោបាយនិងសង្គម។ ដើម្បីសម្រេចគោលដៅនេះ ការអនុវត្តនយោបាយយេនឌ័រ ក៏ដូចជា ការ គាំទ្រលើកទឹកចិត្ត ដើម្បីឲ្យស្រ្តីបានចូលរួមធ្វើការសម្រេចចិត្ត ក្នុងការងារសង្គម ឲ្យមានការប្រែលប្រួលឋានៈ និងតួនាទីស្រ្តីនៅក្នុងសង្គម។ លោក ជំទាវ លើកឡើងទៀតថា caucus នេះដែរគឺបានចូលរួមតាមដានត្រួតពិនិត្យ អនុវត្តគោលនយោបាយយេនឌ័រ និងកម្មវិធីផ្សេងៗ សំខាន់គឺចូលរួម ផ្សព្វផ្សាយ អប់រំដើម្បីឲ្យស្រ្តីយល់ពីសិទ្ធិរបស់ខ្លួន ខំកសាងសមត្ថភាពដើម្បីឲ្យស្រ្តីទទួលបានការលើកទឹកចិត្តក្នុងសង្គម៕
