នៅព្រឹកថ្ងៃទី១៦ ខែកុម្ភៈ ឆ្នាំ២០១៥នៅវិមានរដ្ឋសភា ឯកឧត្តមបណ្ឌិត ងួន ញ៉ិល អនុប្រធាន ទី២រដ្ឋសភានៃព្រះរាជាណាចក្រកម្ពុជា បានអនុញ្ញាតអោយ លោកសាស្ត្រាចារ្យ ខេនអ៊ីឈី អេតូ មកពី សាកលវិទ្យាល័យមេជីនៃប្រទេសជប៉ុនចូលជួបសម្តែងការគួរសម និងធ្វើសវនាការ។
លោកសាស្ត្រាចារ្យ ខេនអ៊ីឈី អេតូ បានមានប្រសាសន៍ជម្រាបជូន ឯកឧត្តមបណ្ឌិត ងួន ញ៉ិល អនុប្រធាន ទី២នៃរដ្ឋសភាថា៖ គោលបំណងនៃដំណើរទស្សនកិច្ច របស់លោក មកកាន់ព្រះរាជាណាចក្រ កម្ពុជាគឺដើម្បីជម្រាបជូនអំពីតួនាទីនិងភារៈកិច្ច របស់ASEAN Center នៃសាកល វិទ្យាល័យមេជី នៅជប៉ុន ហើយក៏ដើម្បីជម្រុញអនុស្សារណៈ(MOU)យោគយល់គ្នា ជាមួយសកលវិទ្យាល័យ នៅកម្ពុជា ពិសេសគឺពិភាក្សាលំអិតជាមួយក្រសួងអប់រំ យុវជន និងកីឡា កម្ពុជា ដើម្បីបង្កើតអោយ មានកិច្ចសហប្រតិបត្តិការ រវាងសាកលវិទ្យាល័យ មេជី ជាមួយវិទ្យាល័យភូមិន្ទភ្នំពេញ និងសកលវិទ្យាល័យនីតិសាស្រ្តនិង វិទ្យាសាស្រ្តសេដ្ឋកិច្ចនៃព្រះរាជាណាចក្រកម្ពុជា ដើម្បីផ្តល់ អាហារូបករណ៍ ដល់និសិ្សតកម្ពុជាអោយទៅសិក្សានៅសាកលវិទ្យាល័យមេជីប្រទេសជប៉ុន។
គួរបញ្ជាក់ថាគិតចាប់ពី ឆ្នាំ២០០៩ដល់ឆ្នាំ២០១៤ បណ្តាដៃគូអភិវឌ្ឍន៍វិស័យអប់រំ បានផ្តល់ហិរញ្ញប្បទានជួយក្រសួងសរុបទាំងអស់ ចំនួន១៣៤គម្រោង ក្នុងនោះប្រទេសជប៉ុនបានជួយចំនួន៤៧គម្រោងដែល មានទឹកប្រាក់១០០លានដូល្លា។ លើការកសាងធនធានមនុស្សគិតចាប់ពីឆ្នាំ២០១២រហូតដល់ឆ្នាំ២០១៤ ប្រទេសជប៉ុន បានផ្តល់អាហារូបករណ៍រយៈពេលវែងដល់និសិត្យកម្ពុជា ដែលត្រូវ បណ្តុះបណ្តាលនៅប្រទេសជប៉ុនបានចំនួន២១៧នាក់ ស្រី៤១នាក់ក្នុងនោះថ្នាក់បណ្ឌិត ១៣នាក់ ថ្នាក់បរិញ្ញាបត្រជាន់ខ្ពស់៩៥នាក់ ថ្នាក់ស្រាវជ្រាវ៣៥នាក់ និងមានថ្នាក់បរិញ្ញាបត្រ ថ្នាក់មធ្យមសិក្សាបច្ចេកទេស ថ្នាក់បណ្តុះបណ្តាលវិជ្ជាជីវៈផងដែរ។
ឯកឧត្តមបណ្ឌិត ងួន ញ៉ិល បានមានប្រសាសន៍ថា ក្នុងនាមរដ្ឋសភានៃព្រះរាជាណាចក្រកម្ពុជា ឯកឧត្តម សូមស្វាគមន៍វត្តមាន លោកសាស្រ្តាចារ្យ នៃសាកលវិទ្យាល័យមេជី និងគណៈប្រតិភូដែលមកធ្វើ ទស្សនកិច្ចនៅកម្ពុជាដើម្បីធ្វើអោយទំនាក់ទំនងកម្ពុជា-ជប៉ុន កាន់តែមានភាពរឹងមាំលើគ្រប់វិស័យ ជា ពិសេសវិស័យអប់រំសិក្សាធិការ ដែលបច្ចុប្បន្នកំពុងរីកដុះដាលយ៉ាងខ្លាំង នៅកម្ពុជា។ ម្យ៉ាងវិញទៀត កម្ពុជានិងជប៉ុនមានទំនាក់ទំនងការទូត ជាមួយគ្នាអស់រយៈពេលជាយូមកហើយ។ ទំនាក់ទំនងដ៏ល្អជាងកន្លះសតវត្សរ៍នេះត្រូវ បានថ្នាក់ដឹកនាំបច្ចុប្បន្ននៃប្រទេសទាំងពីរបង្កើនលើកកម្ពស់ដល់កម្រឹតទំនាក់ទំនងភាព ជាដៃគូយុទ្ធសាស្រ្ត និង បានធ្វើអោយប្រទេសទាំងពីរ មានកិច្ច សហប្រតិបត្តិការជាមួយគ្នាលើគ្រប់វិស័យជាពិសេសវិស័យធនធានមនុស្សដែល និស្សិតកម្ពុជា បានទៅសិក្សាប្រទេសជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន( JICA ) ជាហូហែ។ ឯកឧត្តមបណ្ឌិត បានបន្តថារដ្ឋសភាកម្ពុជាគាំទ្រចំពោះគម្រោងចុះអនុស្សារណៈនៃកិច្ចព្រមព្រៀង ជាមួយសាកលវិទ្យាល័យនៅកម្ពុជាដើម្បីផលប្រយោជន៍ទាំងសងខាង៕
