«រដ្ឋាភិបាលសាធារណរដ្ឋកូរ៉េ បានសំរេចបង្កើនកូតាពលករអោយបាន២ដង បន្ថែមទៀតដល់ ព្រះរាជាណាចក្រ កម្ពុជា ធៀបទៅនឹងឆ្នាំមុន»​ នេះជា​ប្រសាសន៍លើកឡើង របស់ ឯកឧត្តម គីម វុនជិន (​H.E. Mr. Kim WeonJin) ឯកអគ្គរដ្ឋទូតកូរ៉េ ដែលទើបតែងតាំងថ្មីប្រចាំ ព្រះរាជាណាចក្រកម្ពុជា នៅក្នុង​ឱកាស​ បានទទួលការអនុញ្ញាត ចូលជួបសម្តែងការគួរសម​ជាមួយ សម្តេច​អគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នាព្រឹកថ្ងៃទី១៦ ខែកុម្ភៈ ឆ្នាំ២០១៥ នៅវិមានរដ្ឋសភា ។

ឯកឧត្តម គីម វុនជិន បានបញ្ជាក់ថាការសំរេចបង្កើនកូតាដល់ ពលករ​កម្ពុជានាពេលនេះបន្ទាប់ពីដំណើរបំពេញទស្សនៈកិច្ចផ្លូវការ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ​ទៅកាន់សាធារណរដ្ឋកូរ៉េនាពេលកន្លងមក ។

ជាការឆ្លើយតប សម្តេចអគ្គមហាពញាចក្រី ហេង សំរិន បានសម្តែងការ អរគុណយ៉ាងជ្រាលជ្រៅចំពោះរដ្ឋាភិបាលកូរ៉េ ដែលបាន បង្កើនកូតាពលករ​ដល់ ព្រះរាជាណាចក្រកម្ពុជាបន្ថែមទៀតដើម្បីចូលរួមចំណែកក្នុង​ការកាត់​បន្ថយភាពក្រីក្ររបស់ប្រជាពលរដ្ឋកម្ពុជា​។