គណ:ប្រតិភូ នៃគណ:កម្មការសុខាភិបាល សង្គមកិច្ចអតីតយុទ្ធជនយុវនីតិសម្បទា ការងារ បណ្តុះបណ្តាលវិជ្ជាជីវ: និងកិច្ចការនារី នៃរដ្ឋសភា ដែលដឹកនាំដោយ លោកជំទាវ កែ សុវណ្ណរតន៏ ប្រធានគណៈកម្មការ បានចុះជួប ពិភាក្សាការងារជាមួយ លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងសហការី នារសៀល ថ្ងៃទី២៨ ខែ មករា ឆ្នាំ២០១៥ នៅទីស្តីការក្រសួង ដើម្បីសិក្សាស្វែងយល់ពីការអនុវត្តការងារ នាពេលកន្លងមក និងទិសដៅបន្ត របស់ក្រសួងក្នុងអាណត្តិទី៥ នៃរដ្ឋសភានេះ។
នៅក្នុងជំនួបនេះ លោកជំទាវប្រធាន គណៈកម្មការជំនាញ របស់រដ្ឋសភា បានលើកឡើងនូវបញ្ហាមួយចំនួន ស្នើទៅដល់ លោកជំទាវ រដ្ឋមន្ត្រី ក្រសួងកិច្ចការនារី ក្នុងនោះរួមមាន ការទប់ស្កាត់ចលនា ចំណាកស្រុករបស់ស្រ្តី ក្នុងការចេញទៅរកការងារធ្វើ នៅក្រៅប្រទេស ពិសេសប្រទេសម៉ាឡេស៊ី និងបានស្នើសុំក្រសួងជួយជំរុញ ការធានាដល់ការគោរពសិទ្ធិស្រ្តី។
ជាការឆ្លើយតប លោកជំទាវ អ៊ឹង កន្ថាផាវី បានគួសបញ្ជាក់ថា រាជរដ្ឋាភិបាល បាននឹងកំពុងយកចិត្តទុកដាក់យ៉ាងខ្លំាង ក្នុងការលើកកម្ពស់ សិទ្ធិស្រ្តី និងបានកំណត់យ៉ាងច្បាស់ថា ស្រ្តីជាឆ្អឹងខ្នងប្រទេសជាតិ។ ដោយឡែកចំពោះការទប់ស្កាត់ សកម្មភាពចំណាកស្រុក របស់ពលរដ្ឋ ក្រសួងកិច្ចការនារី កំពុងបង្កើតឲ្យមានមជ្ឈមណ្ឌល បណ្តុះបណ្តាលវិជ្ជាជីវ ដើម្បីផ្តល់ជំនាញច្បាស់លាស់ដល់ប្រជា ពលរដ្ឋ ពិសេស ស្រ្តីនោះ ពួកគាត់នឹងមានការងារសមរម្យនៅក្នុងប្រទេស ពេលនោះពួកគាត់នឹងមិនធ្វើចំណាកស្រុកទៀតទេ។
កិច្ចប្រជុំបានប្រព្រឹត្តទៅក្រោមស្មារតីកិច្ចសហការគ្នា សមគ្គីភាព និងបានផ្លាស់ប្តូរយល់គ្នា ធ្វើយ៉ាង ណា ដើម្បីជំរុញ ការលើកកម្ពស់ តម្លៃស្រ្តី នៅក្នុងព្រះរាជាណាចក្រកម្ពុជាឲ្យកាន់តែប្រសើរឡើងថែម ទៀត។
