គណៈកម្មការ សេដ្ឋកិច្ច ហិរញ្ញវត្ថុ ធនាគារ និង សវនកម្ម នៃរដ្ឋសភា ដឹកនាំដោយ ឯកឧត្តមបណ្ឌិត រដ្ឋ ជាម យៀប ប្រធាន គណៈកម្មការ រួមដំណើរដោយ តំណាង ក្រសួងសេដ្ឋកិច្ច និង ហិរញ្ញវត្ថុ និង តំណាង អាជ្ញាធ រសវនកម្មជាតិ បានអញ្ជើញ ចុះសិក្សា ស្វែងយល់ ការប្រតិបត្តិការ ថវិកាជាតិ ពាក់ព័ន្ធលើ ចំណូល ចំណាយ របស់ អាជ្ញាធរអប្សរា អាជ្ញាធរខេត្ត សៀមរាប និង អាជ្ញាធរអាកាសចរ ស៊ីវិលសៀមរាប កាលពី ថ្ងៃទី២១ ដល់ថ្ងៃទី២៣ ខែធ្នូ ឆ្នាំ២០១៥ នៅខេត្តសៀមរាប ។
ឯកឧត្តមបណ្ឌិតរដ្ឋ ជាម យៀប បានមាន ប្រសាសន៍ថា គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃ រដ្ឋសភា រួមជាមួយស្ថាប័ន ពាក់ព័ន្ធ ចុះមកខេត្តសៀមរាបនាពេលនេះក្នុងគោល បំណង សិក្សាស្វែងយល់លើ ប្រតិបត្តិការថវិកា ជាតិពាក់ព័ន្ធ ការរកចំណូល និង ចំណាយរបស់ អាជ្ញាធរអប្សរា អាជ្ញាធរខេត្តសៀមរាប និងអាជ្ញាធរអាកាសចរស៊ីវិល សៀមរាប ដើម្បីធ្វើឲ្យ ការអភិវឌ្ឍន៍ វិស័យទាំងនោះ មានតម្លាភាព មានការទទួល ខុសត្រូវខ្ពស់ រួមចំណែក អភិវឌ្ឍន៍ ប្រទេស អោយមានការរីកចម្រើនឡើង។
ឯកឧត្តម ប៊ុន ណារិទ្ធ អគ្គនាយក អាជ្ញាធរអប្សរា បានមានប្រសាសន៍ ថារមណីយដ្ឋាន អង្គរដែលត្រូវ បានចុះបញ្ជី បេតិភណ្ឌពិភពលោក ស្ថិតនៅទីតាំងបី ផ្សេងៗគ្នា មានផ្ទៃដីសរុប៤០១គីឡូ ម៉ែត្រក្រឡា តាមព្រះរាជក្រិត្យ លេខ០០១នសចុះ ថ្ងៃទី២៨ ខែឧសភា ឆ្នាំ១៩៩៤។ ហើយ តាមព្រះរាជក្រិត្យ ខាងលើនេះ តំបន់សៀមរាប អង្គរ ត្រូវចែកចេញជា៥ប្រភេទ ទទួលកម្រិត ការពារខុសៗគ្នា។ តំបន់ទាំងនោះរួមមាន ១-រមណីយដ្ឋានមានប្រាសាទ ២-តំបន់ឧទ្យានបុរាណ វិទ្យាត្រូវការពារ ៣-តំបន់ទេសភាព វប្បធម៌ត្រូវការពារ ៤-តំបន់មានចំណុចសារៈសំខាន់ ផ្នែកបុរាណវិទ្យា នរវិទ្យា និងប្រវត្តិវិទ្យា ៥-តំបន់បរិវេណអភិវឌ្ឍន៍ សង្គម សេដ្ឋកិច្ច និងវប្បធម៌នៃ តំបន់សៀមរាបអង្គរ ។ ឯកឧត្តម បានបន្តរថា អាជ្ញាធរអប្សរា បានចំណូលពីការ ជួលដី សម្រាប់ធ្វើបុរីសណ្ឋាគារ និងការលក់សំបុត្រ ដែលប្រគល់អោយ ក្រុមហ៊ុនសុខាអូតែល វិនិយោគគឺក្នុង ឆ្នាំ២០១៣ មានភ្ញៀវសរុប២,០២១,៧១៥នាក់ ទទួលបានចំណូល ៥៧,៦៨៧,៦៨០ដុល្លា និងក្នុងឆ្នាំ២០១៤ គិតត្រឹម១១ខែ មានភ្ញៀវ១,៨៣៦,៩១០នាក់ ទទួលបានចំណូល ចំនួន ៥២,៩៤៥,៧០០ដុល្លា ហើយថវិកាទាំងអស់ ត្រូវបានបង់ចូលថវិកាជាតិ។ ចំពោះការចំណាយ អាជ្ញាធរអប្សរា បានជួសជុលកែលំអរ ប្រព័ន្ធបារាណ៍ អភិរក្សប្រាសាទ និងកសាងសហគមន៍ តំបន់ប្រាសាទ។
ដោយឡែក ឯកឧត្តម ឃឹម ប៊ុនសុង អភិបាល នៃគណៈអភិបាលខេត្ត សៀមរាប ក៏បានជម្រាបជូន គណៈប្រតិភូថា ចាប់តាំងពី ឆ្នាំ២០០១មក គោលនយោបាយចំហ ជើងមេឃរបស់ រាជរដ្ឋាភិបាល កម្ពុជានីតិកាលទី២ នៃរដ្ឋសភាត្រូវ បានដាក់អោយ អនុវត្តន៍ លើខេត្តសៀមរាប ដូច្នេះជើងហោះហើរ ក៏មានការកើនឡើងជាលំដាប់ បើប្រៀបធៀបរយៈពេល ១៣ឆ្នាំកន្លងមក គឺកើនឡើង៦ដង ពោលគឺឆ្នាំ២០០១ មាន ១០ជើងក្នុង១ថ្ងៃ មកដល់ឆ្នាំ២០១៤ មាន៦៥ជើងក្នុង១ថ្ងៃ ហើយភ្ញៀវទេសចរណ៍ដែលធ្វើដំណើរ មកកាន់ ខេត្តសៀមរាប ក៏មានការកើនឡើងដែរ។ ដោយឡែកការអនុវត្តន៍ ចំណូលចំណាយ ថវិកាខេត្ត ឆ្នាំ២០១៣ ប្រមូលបាន ៣១,៩៨៧,២២០,០០០រៀល ស្មើនឹង ១៥៧,៨៤%នៃផែនការ ហើយការចំណាយ ថវិកាអស់ ចំនួន២៣,៩៩២,៥៣០,០០០រៀល ស្មើ៨៨,៨៧%នៃផែនការ ចំណាយ។ រីឯការអនុវត្ត ចំណូល ឆ្នាំ២០១៤ គិតត្រឹម១១ខែ ប្រមូលបាន ៣២,៨៦៦,២២០,០០០រៀល ស្មើនឹង១១៥,៦៨% នៃផែនការ។ ការអនុវត្តន៍ ចំណាយ ឆ្នាំ២០១៤អស់ ២៩,៦៦៦,៥៥០,០០០រៀល ស្មើនឹង ៩១,៦៦៩% នៃផែនការ។ ឯកឧត្ដម បានបញ្ជាក់ថា ការចំណាយគឺ ផ្ដោតលើការកសាង ហេដ្ឋារចនាសម្ព័ន្ធ ខេត្ត ផ្លូវថ្នល់ ផ្លូវលំ និង ស្តាប្រព័ន្ធបារាយណ៍ រំដោះទឹកជំនន់។
ពាក់ព័ន្ធនិង អាកាសចរស៊ីវិល សៀមរាប ឯកឧត្តម សយ សុខាន់ អនុរដ្ឋលេខាធិការ អាកាសចរណ៍ស៊ីវិល បានជម្រាបជូន គណៈប្រតិភូថា អាកាសចរណ៍សីវិល ខេត្តសៀមរាប មានក្រុមហ៊ុន អាកាសចរណ៍ក្នុងស្រុក ចំនួន០៦ និងក្រុមហ៊ុន អន្តរជាតិ ចំនួន២៨ ក្រុមហ៊ុន ហើយ ជើងហោះហើរ មានចំនួនប្រមាណ ១៨០ទៅ ២០០ជើង ក្នុងមួយថ្ងៃ និងដឹកជញ្ជូនអ្នកដំណើរ សរុបបាន៤,៨២០,៦៩៩ នាក់ ប្រមូលចំណូល បានក្នុង ឆ្នាំ២០១៣ ២០,៤១៥,៩១៩ ដុល្លា និង ឆ្នាំ២០១៤ គិតត្រឹម១១ខែ បាន ២៤,១៩៦,១១៥ដុល្លា។ ឯកឧត្តម បន្តថា ថវិកាចំណូល ដែលទទួលបាន គឺបានប្រើចំណាយ លើប្រាក់បៀវត្សមន្រី្ត បុគ្គលិក និងកែលំអរ ព្រលានយន្តហោះ និងទិញសំភារៈផ្សេងៗ។
ឯកឧត្តមបណ្ឌិតរដ្ឋ ជាម យៀប បានកោតសរសើរ និងវាយតំម្លៃខ្ពស់ ជូនថ្នាក់ដឹកនាំ អាជ្ញាធរអប្សរា អាជ្ញាធរខេត្ត និង អាជ្ញាធរអាកាចរណ៍ ស៊ីវិលសៀមរាប ដែលបានរួមចំណែក ជួយប្រមូល ចំណូលថវិកាជាតិ ដើម្បីយកមកធ្វើការកសាងអភិវឌ្ឍន៍ ប្រទេស អោយមាន ការរីកចម្រើនឡើង។