នាព្រឹកថ្ងៃទី១០ ខែមេសា ឆ្នាំ២០២៤ នៅក្រុងហ្លួងប្រាបាង នៃសាធារណរដ្ឋប្រជាធិបតេយ្យប្រជាមានិតឡាវ គណៈប្រតិភូនៃក្រុមរដ្ឋសភាជាតិកម្ពុជា APF រួមមាន៖ ឯកឧត្ដម ប៉ាន សូរស័ក្ដិ លេខាធិការគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ និង លោកជំទាវ អ៊ុន សុគន្ធា លេខាធិការគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន បានចូលរួមកិច្ចប្រជុំគណៈកម្មការកិច្ចការសេដ្ឋកិច្ច សង្គម និងបរិស្ថាននៃសភានិយាយភាសាបារាំង (APF) ដោយមានសមាជិក សមាជិកាពីក្រុមសភាជាតិដែលជាសមាជិក APF អង្គការអន្តរជាតិក្នុងតំបន់ អគ្គលេខាធិការដ្ឋាន APF និងមន្រ្តីជំនួយការ ចូលរួមចំនួនប្រមាណ៥០នាក់។
ឯកឧត្តមបានជម្រាបជូនអង្គប្រជុំអំពីស្ថានភាពសេដ្ឋកិច្ចកម្ពុជា នាមុនវិបត្តិកូវីដ១៩ និងគោលនយោបាយនានាដែលរាជរដ្ឋាភិបាលបានដាក់ចេញ ដើម្បីជំរុញកំណើនសេដ្ឋកិច្ចកម្ពុជាក្រោយវិបត្តិកូវីដ១៩ ឆ្នាំ២០២១-២០២៣ ក្នុងបំណងជំរុញកំណើនសេដ្ឋកិច្ចកម្ពុជាប្រកបដោយនិរន្តរភាព និងបរិយាបន្ន។ វិស័យសេដ្ឋកិច្ចកម្ពុជា រំពឹងថានឹងទទួលបានកំណើនប្រមាណ ៦,៦% នាឆ្នាំ២០២៤ ផ្អែកលើវិស័យសំខាន់ៗ ដូចជា៖ វិស័យឧស្សាហកម្ម វិស័យកសិកម្ម និងវិស័យសេវាកម្ម(ទេសចរណ៍)។
ឯកឧត្តមក៏បានបញ្ជាក់អំពីការងារបរិស្ថានដែលក្រសួងបរិស្ថានបានដាក់ចេញនូវយុទ្ធសាស្រ្តភាពស្អាត ដោយផ្តោតសំខាន់លើ ១. ភាពស្អាតលើផ្ទៃដី លើផ្ទៃមេឃ និងលើផ្ទៃទឹក ២. ភាពបៃតង និង ៣. ចីរភាព។