សម្ដេចអគ្គមហាពញ្ញាចក្រី ហេង សំរិន ប្រធាន- រដ្ឋសភានៃព្រះរាជាណាចក្រកម្ពុជា បានអនុញ្ញាតឲ្យ ឯកឧត្តម គីម ហានស៊ូ(H.E Mr. Kim Han Soo ) ឯកអគ្គរដ្ឋទូតវិសាមញ្ញ និងពេញសម្ថភាពនៃ សាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា ចូលសម្ដែងការគួរសម និងជម្រាបលា នាព្រឹក ថ្ងៃទី២៨ ខែវិច្ឆិកា ឆ្នាំ២០១៤ នៅវិមានរដ្ឋសភា។
នៅក្នុងជំនួប ឯកឧត្តម គីម ហានស៊ូ ឯកអគ្គរដ្ឋទូត កូរ៉េ បានមានប្រសាសន៍ថា ក្នុងរយៈពេល២ឆ្នាំ ៩ខែ នៅកម្ពុជា ឯកឧត្ដមមាន អនុស្សាវរីយ៍ល្អៗ ជាច្រើន ពិសេសក្រៅពី វិស័យការទូតក៏នៅ មានវិស័យ ជាច្រើនទៀត ដែលឯកឧត្ដមបានរួមចំណែកជម្រុញ អោយទំនាក់ទំនង ប្រទេសទាំង២ កាន់តែត្រូវបាន ពង្រឹងពង្រីក ខ្លាំងក្លាឡើងថែមទៀត។ ឯកឧត្តម បានបន្ត ថាកូរ៉េ បានយកចិត្តទុកដាក់ ក្នុងការ សហប្រត្តិបត្តិការ ជាមួយកម្ពុជា និងចាប់អារម្មណ៍ជាខ្លាំង ជាមួយកម្ពុជា ទាំងជាមួយរាជរដ្ឋាភិបាល ក៏ដូចជាវិស័យឯកជនដែរ ដោយវិនិយោគិនកូរ៉េ មានការពេញចិត្តជាខ្លាំង ក្នុងការដាក់ទុនវិនិយោគ នៅ ប្រទេសកម្ពុជា។ ឯកឧត្តម ឯកអគ្គរដ្ឋទូត បានបង្ហាញក្ដីសង្ឃឹមថា ប្រទេសទាំងពីរ កម្ពុជា កូរ៉េ នឹងក្លាយជាមិត្តដ៏ជិតស្និទ្ធ នៅក្នុងពិភពលោក។
ជាការឆ្លើយតប សម្ដេចអគ្គមហាពញ្ញាចក្រី ហេង សំរិន ប្រធានរដ្ឋសភាបានលើកឡើងថា រយៈពេល១៨ឆ្នាំ នៃការភ្ជាប់ទំនាក់ទំនង ការទូតគ្នាឡើងវិញ រវាងកម្ពុជា កូរ៉េ ប្រទេសទាំង២ បានអភិវឌ្ឍន៍ ទំនាក់ទំនងកិច្ចសហប្រតិបត្តិការ ជាដៃគូបានយ៉ាងល្អ លើគ្រប់វិស័យ។ សម្ដេចបានមានប្រសាសន៍ទៀតថា ក្នុងនាមរដ្ឋសភា សម្ដេចសូមវាយតំលៃខ្ពស់ ចំពោះជោគជ័យដ៏ត្រចះត្រចង់ នៃអណត្តិការទូត របស់ឯកឧត្ដម ឯកអគ្គរដ្ឋទូត ដែលបាននាំមកនូវលទ្ធផល ជាវិជ្ជមាន ជាច្រើនសំរាប់ប្រជាជន និងប្រទេសទាំង២ កម្ពុជា កូរ៉េ។
សម្ដេច ក៏បានអរគុណចំពោះ កូរ៉េ ដែលបានផ្ដល់ជំនួយអភិវឌ្ឍន៍ គ្រប់យ៉ាងសំរាប់កម្ពុជា។ សម្ដេច បន្ថែមថា កូរ៉េជាទីផ្សារការងារ ដ៏ធំរបស់ពលករ កម្ពុជា។ ភ្ជាប់នឹងបញ្ហានេះ សម្ដេចប្រធានរដ្ឋសភា បាន ស្នើសុំ កូរ៉េ ជួយផ្ដល់លក្ខខ័ណ្ឌ ការងារល្អៗ ឲ្យពលករកម្ពុជា ទាំងអស់សូមអោយ ទទួលបានការការពារ ពីសមត្ថកិច្ចរបស់ កូរ៉េ ផង។
តាមរយៈ ឯកឧត្តម ឯកអគ្គរដ្ឋទូត សម្ដេចប្រធានរដ្ឋសភា ក៏បានផ្ដាំផ្ញើរការសួរសុខទុក្ខ ជូនចំពោះ ឯកឧត្តម គីម ចាងហា ជាប្រធានសភា កូរ៉េ។ សម្ដេច បានបន្ថែមថា រដ្ឋសភាកម្ពុជា មានបំណងពង្រីក កិច្ចសហប្រតិបត្តិការ ជាមួយសភាកូរ៉េ ឲ្យកាន់តែស៊ីជម្រៅ ថែមទៀត។ ជាចុងក្រោយ សម្ដេចបានបង្ហាញជំនឿថា ទោះបីជា ឯកឧត្តមអគ្គរដ្ឋទូត បញ្ចប់បេសកកម្ម នៅកម្ពុជា ហើយទៅបម្រើការងារ នៅស្ថាប័នណាក្ដី សម្ដេចសង្ឃឹមថាឯកឧត្ដម នឹងនៅតែបន្តកិច្ចទំនាក់ទំនង ល្អជាមួយនឹង ប្រទេសកម្ពុជា ជាបន្តទៀត៕