នៅព្រឹកវេលាម៉ោង ០៩:៣០នាទី ថ្ងៃទី២៦ ខែមីនា ឆ្នាំ២០១៤ គណៈប្រតិភូ នៃសមាជិកសភា សហ- គមន៍អឺរ៉ុប សម្រាប់កិច្ចការ ទំនាក់ទំនង ជាមួយ បណ្តាប្រទេស នៃតំបន់អាស៊ីអាគ្នេយ៍ និងសមា- គមប្រជាជាតិ អាស៊ីអាគ្នេយ៍ (អាស៊ាន) ដឹកនាំ ដោយ ឯកឧត្តម វែកន័រ ឡង់ជិន (WERNER LANGEN) បានអញ្ជើញជួបពិភាក្សាការងារ ទ្វេភាគី ជាមួយ គណៈកម្មការ កិច្ចការបរទេស សហ- ប្រតិបត្តិការអន្តរជាតិឃោសនាការ និងព័ត៌មាន របស់រដ្ឋសភា និងព្រឹទ្ធសភា ដឹកនាំ ដោយឯកឧត្តម ឈាង វុន ប្រធានគណៈកម្មការ កិច្ចការបរទេស សហប្រតិបត្តិការ អន្តរជាតិ ឃោសនាការ និង ព័ត៌មាន នៃរដ្ឋសភា។
ឯកឧត្តម ឈាង វុន ក្នុងនាមគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងព្រឹទ្ធសភា នៃ ព្រះរាជាណាចក្រកម្ពុជា បានសម្តែងនូវការស្វាគមន៍ ទទួលរាក់ទាក់ គណៈប្រតិភូសមាជិកសភាសហគមន៍អឺរ៉ុប ដែល បានអញ្ជើញមកទស្សនកិច្ចជាផ្លូវការនៅកម្ពុជា។
ឯកឧត្តម វែកន័រ ឡង់ជិន (WERNER LANGEN) ប្រធានគណៈប្រតិភូ បានមានប្រសាសន៍ថា គណៈប្រតិភូនេះ ជាក្រុមការងារមួយ សម្រាប់ពិនិត្យមើល និងទំនាក់ទំនងការងារជាមួយ អន្តរសភាអាស៊ាន ហៅកាត់ថា (អាយប៉ា) កន្លងមក គណៈប្រតិភូ បានមើលឃើញថា កម្ពុជាបច្ចុប្បន្ន មានការរីកចម្រើន និងអភិវឌ្ឍន៍ជាបន្តបន្ទាប់ ហើយថា សភាសហគមន៍អឺរ៉ុប នឹងបន្តកិច្ចសហប្រតិបត្តិការ ជាមួយកម្ពុជា ជាបន្តទៀត និងបានស្នើសុំឲ្យបង្កើតក្រុមមិត្តភាព សភាកម្ពុជា និងសហគមន៍អឺរ៉ុប។
សូមបញ្ជាក់ថា សភានៃសហគមន៍អឺរ៉ុប មានសមាជិកសរុបចំនួន ៧៦៦រូប តំណាងមកពី២៨ប្រទេស នៅក្នុងទ្វីបអឺរ៉ុប ដែលមានអាណត្តិរយៈពេល ៥ឆ្នាំ៕