សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា នៅរសៀលថ្ងៃទី២ ខែកញ្ញា ឆ្នាំ២០១៦នេះ វេលាម៉ោង១៦និង ៣០នាទី បានដឹកនាំគណៈប្រតិភូសភាកម្ពុជា ធ្វើមាតុភូមិនិវត្តន៍មកដល់ព្រះរាជាណាចក្រកម្ពុជាវិញដោយសុវត្ថិភាព បន្ទាប់ពីបានចូលរួមមហាសន្និបាត អន្តរសភាអាស៊ានលើកទី៣៧ នៅទីក្រុងណៃពិដោ ប្រទេសមីយ៉ាន់ម៉ា ចាប់ពីថ្ងៃទី២៩ ខែកញ្ញាមកនោះ។
មហាសន្និបាតអន្តរសភា អាស៊ានលើកទី៣៧ នៅប្រទេសមីយ៉ាន់ម៉ា បានប្រារព្ធធ្វើឡើងក្រោមប្រធានបទ “ភាពរស់រវើករបស់អាយប៉ា ចំពោះការរីក ចម្រើនរបស់អាស៊ាន”។ នៅអំឡុងពេលចូលរួមមហាសន្និបាត អន្តរសភាអាស៊ានលើកទី៣៧នេះ សម្តេចអគ្គមហាពញាចក្រី ហេង សំរិន ប្រធាន រដ្ឋសភា បានអញ្ជើញឡើងថ្លែងសុន្ទរកថាទៅកាន់មហាសន្និបាត ដោយសម្តេចបានបង្ហាញពីឆន្ទៈសភាកម្ពុជា ក្នុងការចូលរួមគ្រប់សកម្មភាពអន្តរសភា អាស៊ាន ដើម្បីធានាដំណើរការជាប្រក្រតី និងប្រសិទ្ធភាពការងារ របស់ស្ថាប័ននីតិប្បញ្ញត្តិក្នុងតំបន់នេះ ដែលត្រូវធ្វើការយ៉ាងជិតស្និទ្ធជាមួយប្រមុខរដ្ឋ ប្រមុខរដ្ឋាភិបាលអាស៊ាននោះ។
នៅក្នុងឱកាសនោះ សម្តេចក៏បានផ្តល់ជាអនុសាសន៍ដល់អាយប៉ាផងដែរ ដោយសម្តេចបានលើកឡើងថា ភាពរីកចំរើនរបស់សហគមន៍អាស៊ានត្រូវការ ចាំបាច់ឲ្យមានសន្ដិភាព និងស្ថិរភាពនយោបាយនៅក្នុងតំបន់។ អាយប៉ាត្រូវតែរួមគ្នាជាមួយអាស៊ាន ដើម្បីដោះស្រាយរាល់បញ្ហាដែលកើតឡើងនៅក្នុង តំបន់ប្រកបដោយសន្ដិវិធី។ ជាមួយគ្នានេះ អាស៊ាននិងអាយប៉ាអាចរួមសកម្មភាពជាមួយគ្នា ដើម្បីបង្ហាញអោយឃើញពីសមិទ្ធផលក្នុងរយៈពេល៥០ឆ្នាំ កន្លងមករបស់អាស៊ាន ដែលជាការរួមវិភាគទានក្នុងការរក្សាសន្ដិភាពតំបន់ ក៏ដូចជាវឌ្ឍនភាពសេដ្ឋកិច្ច និងការអភិវឌ្ឍសង្គម។
សម្តចប្រធានរដ្ឋសភា ក៏បានថ្លែងទៅកាន់ប្រធានស្ថាប័នសភានៃបណ្តាប្រទេសអាស៊ាន សម្តេចបានលើកឡើងជាអនុសាសន៍ថា អាយប៉ានិងអាស៊ាន ត្រូវលើកកម្ពស់ទំនាក់ទំនង និងកិច្ចសហប្រតិបត្តិការបច្ចេកទេសបន្ថែមទៀត តាមរយៈការចែករំលែក និងផ្លាស់ប្តូរព័ត៌មាន និងការជួបប្រជុំមន្រ្ដីជំនាញនៃស្ថាប័នទាំងពីរឲ្យទៀងទាត់។ ភាពរឹងមាំរបស់អាយប៉ា ជាកត្តាមួយដ៏សំខាន់ ដើម្បីធានាបាននូវប្រក្រតីភាព និងការប្រព្រឹត្តទៅរបស់ខ្លួន។ ក្នុងនោះការផ្ដល់អនុសាសន៍ តាមរយៈការដាក់ចេញនូវសេចក្ដីសម្រេច ដល់ប្រទេសសមាជិកអាស៊ានត្រូវតែផ្ដោតលើផលប្រយោជន៍រួមរបស់អាស៊ានដោយត្រូវ បន្តជំរុញនឹងលើកកម្ពស់លទ្ធភាព នៃការធ្វើសុខុដុមកម្មច្បាប់ពាក់ព័ន្ធសំខាន់ៗនានា ដែលសំដៅធានាផលប្រយោជន៍រួមរបស់ពលរដ្ឋក្នុងអាស៊ាន។
សូមជម្រាបជូនថា ក្រៅពីការឡើងថ្លែងសុន្ទរកថា របស់សម្តេចប្រធានរដ្ឋសភា នៅក្នុងមហាសន្និបាតលើកទី៣៧ នៃអន្តរសភាអាស៊ាននោះ សមាជិក គណៈប្រតិភូសភាកម្ពុជា ដែលអមដំណើរសម្តេចចូលរួមមហាសន្និបាតនេះ ដែលមានសមាជិកព្រឹទ្ធសភា និងរដ្ឋសភា ក៏បានចូលរួមកិច្ចប្រជុំរបស់ គណៈកម្មាធិការនានារបស់អាយប៉ាតាមការបែងចែក ក្នុងនោះមានការចូលរួមប្រជុំ ជាមួយគណៈកម្មាធិការនយោបាយ គណៈកម្មាធិការសេដ្ឋកិច្ច គណៈកម្មាធិការសង្គម គណៈកម្មាធិការស្រ្តី និងគណៈកម្មាធិការរៀបចំជាដើម។
វត្តមានគណៈប្រតិភូសភាកម្ពុជានៅក្នុងវេទិកាស្ថាប័ននីតិប្បញ្ញត្តិតំបន់មួយនេះ ត្រូវបានមជ្ឈដ្ឋានអន្តរជាតិ មើលឃើញពីការចូលរួមយ៉ាងសកម្មរបស់ សភាកម្ពុជា ក្នុងការចូលរួមចំណែកថែរក្សាសុខសន្តិភាព ស្ថិរភាព និងការអភិវឌ្ឍជូនប្រជាពលរដ្ឋ នៅក្នុងតំបន់និងពិភពលោក ក្នុងភាពជាតំណាង ពលរដ្ឋនោះ៕
អត្ថបទ និងរូបភាពដោយនាយកដ្ឋានព័ត៌មាន