ឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័តមាន នៃរដ្ឋសភា បានជួបពិភាក្សា ការងារជាមួយ ឯកឧត្តម ILhan Kemal Tug ឯកអគ្គរដ្ឋទូតប្រទេសទួរគី ប្រចាំនៅព្រះរាជាណាចក្រកម្ពុជា នាព្រឹកថ្ងៃទី១៧ ខែសីហា ឆ្នាំ២០១៦ នៅវិមានរដ្ឋសភា។
នៅក្នុងជំនួបពិភាក្សាការងារនេះ ឯកឧត្តម អ៊ីល ILhan Kemal Tug បានជម្រាបជូន ឯកឧត្តម ឈាង វុន ពីស្ថានភាពនយោបាយនៅក្នុងប្រទេស ទួរគីថា បានវិលទៅរកសភាពការណ៍ ធម្មតាវិញហើយ បន្ទាប់ពីមានព្រឹត្តការណ៍រដ្ឋប្រហារមិនបានសម្រេច កាលពីខែកន្លងមកនេះ។ ឯកឧត្តមឯកអគ្គរដ្ឋទូត បានគូសបញ្ជាក់ថា ប្រទេសទួរគីបានកំពុងថែរក្សា និងរឹតចំណងមិត្តភាព កិច្ចសហប្រតិបត្តិការជាមួយប្រទេសនានានៅក្នុងពិភពលោក ពិសេសប្រទេសធំៗ ដូចជាសហរដ្ឋអាមេរិក សហព័ន្ធរុស្ស៊ី ប្រទេសចិន និងសហភាពអ៊ឺរ៉ុប សហគមន៍អាស៊ាន ជាដើម។
ចំពោះទំនាក់ទំនងកម្ពុជានិងទួរគីវិញ ឯកឧត្តម ILhan Kemal Tug បានមានប្រសាសន៍ថា ជាទំនាក់ទំនងដែលថ្នាក់ដឹកនាំប្រទេសទួរគី យកចិត្តទុកដាក់បំផុត។ ក្នុងការពង្រឹងពង្រីកកិច្ចហប្រតិបត្តិការជាមួយកម្ពុជា លើគ្រប់វិស័យ រួមទំាងការទូត និងសេដ្ឋកិច្ចនោះ ប្រទេសទួរគី គម្រោងបង្កើតជើងហោះហើរត្រង់មកកម្ពុជា ក្នុងពេលឆាប់ៗនេះទៀតផង។
ឯកឧត្តមឯកអគ្គរដ្ឋទូត បានលើកឡើង ពីសាលាអន្តរជាតិ ZAMAN ដែលមាននៅកម្ពុជា។បើតាមឯកឧត្តមឯកអគ្គរដ្ឋទូត សាលាអន្តរជាតិមួយនេះ ត្រូវបានសង្ស័យថាមានបណ្តាញទំនាក់ទំនងជាក្រុមដែលបានធ្វើរដ្ឋប្រហារនៅប្រទេសទួរគី កាលពីពេលកន្លងមកនេះ។ ឯកឧត្តមឯកអគ្គរដ្ឋទូត បានមានប្រសាសន៍ថា បញ្ហានេះស្ថានទូតទួរគីនៅកម្ពុជា ក៏បានជូនដំណឹងដល់រាជរដ្ឋាភិបាលកម្ពុជា បានដឹងរួចមកហើយ ដែរ។
ឯកឧត្តម ឈាង វុន បានគំាទ្របេសកកម្មការទូតរបស់ ឯកឧត្តម ILhan Kemal Tug នៅកម្ពុជា និងសម្តែងការរីករាយចំពោះកិច្ចខិតខំប្រឹងប្រែង របស់ឯកឧត្តមក្នុងការពង្រឹងពង្រីកទំនាក់ទំនងកម្ពុជា និងទួរគី លើគ្រប់វិស័យ ពិសេសខាងវិស័យពាណិជ្ជកម្មនិងសេដ្ឋកិច្ចនេះ។ ចំពោះបញ្ហាសាលាអន្តរជាតិ ZAMAN ដែល ឯកឧត្តម ឯកអគ្គរដ្ឋទូត បានលើកឡើងនោះ ឯកឧត្តម ឈាង វុន បានមានប្រសាសន៍ថា នឹងជួយពាំនាំទៅជម្រាបជូន ថ្នាក់ដឹកនាំ និងក្រសួងស្ថាប័នរបស់រាជរដ្ឋាភិបាល ដែលពាក់ព័ន្ធ។
ឆ្លៀតនៅក្នុងឱកាសនោះ ឯកឧត្តម ឈាង វុន ក៏បានជម្រាបជូន ឯកឧត្តមឯកអគ្គរដ្ឋទូត ប្រទេសទួរគី ពីការរៀបចំកិច្ចប្រជុំ និងមហាសន្និបាតសំខាន់ៗ ជាលក្ខណៈអន្តរជាតិ ដែលសភាកម្ពុជា ទទួលធ្វើជាម្ចាស់ផ្ទះបន្តបន្ទាប់នៅក្នុងឆ្នាំ២០១៦នេះ។ ក្នុងនោះមានកិច្ចប្រជុំគណៈកម្មាធិការប្រតិបត្តិលើកទី១ នៃសភាតំបន់អាស៊ី នៅទីក្រុងភ្នំពេញ ពីថ្ងៃទី២៥ ដល់ថ្ងៃទី២៨ ខែកញ្ញា ឆ្នាំ២០១៦ ខាងមុខនេះ។ កិច្ចប្រជុំគណៈកម្មាធិការប្រតិបត្តិលើកទី២ នៃសភាតំបន់អាស៊ី និងមហាសន្និបាតសភាអាស៊ី លើកទី៩ ដែលរៀបចំធ្វើនៅខេត្តសៀមរាប ពីថ្ងៃទី២៨ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៦។
ឯកឧត្តម ឈាង វុន បានមានប្រសាសន៍ថា សភាកម្ពុជា នឹងគោរពអញ្ជើញប្រធានរដ្ឋសភា ប្រទេសទួរគី ចូលរួមមហាសន្និបាតលើកទី៩ សភាតំបន់អាស៊ី ផងដែរ៕
អត្ថបទនិងរូបភាពដោយនាយកដ្ឋានព័ត៌មាន