ប្រជាពលរដ្ឋមួយចំនួន តំណាងឲ្យពលរដ្ឋចំនួន១៤៧គ្រួសារ មកពីស្រុកចំនួនពីរ របស់ខេត្តកោះកុង គឺស្រុកស្រែអំបិល ស្រុកបុទុមសាគរ បាននាំគ្នាធ្វើដំណើរមកកាន់វិមានរដ្ឋសភា នៅព្រឹកថ្ងៃទី៤ ខែសីហា ឆ្នាំ២០១៦ ដើម្បីដាក់លិខិតសុំកិច្ចអន្ដរាគមន៍ពី សម្ដេចអគ្គមហាពញាចក្រី ហេង សំរិន ប្រធានរដ្ឋសភា ជំរុញការដោះស្រាយបញ្ហាជម្លោះដីធ្លីរវាងប្រជាពលរដ្ឋ និងក្រុមហ៊ុនឯកជន។
ប្រជាពលរដ្ឋបានចោទថា មានក្រុមហ៊ុនឯកជនចំនួនពីរ បានរំលោភយកដីរបស់ពួកគេ។ នៅក្នុងលិខិតសូមអន្តរាគមន៍ ពួកគាត់បានស្នើសូម សម្តេចប្រធានរដ្ឋសភា ជួយជំរុញដល់សមត្ថកិច្ចធ្វើការដោះស្រាយដល់ពួកគាត់ ធ្វើយ៉ាងណាឲ្យពួកគាត់បានទទួលដីស្រែ ដែលក្រុមហ៊ុនឯកជនបាន រំលោភត្រឡប់មកវិញ។ សំណូមពរមួយទៀតគឺ ឲ្យក្រុមហ៊ុនផ្ដល់នូវប្រាក់សំណងចំពោះការខូចខាតផលដំណាំដែលក្រុមហ៊ុនបានឈូសឆាយ។
បន្ទាប់ពីបានដាក់លិខិតទៅគណៈកម្មការជំនាញ របស់រដ្ឋសភាហើយពលរដ្ឋបាននាំគ្នារំសាយការជួបជុំ និងធ្វើដំណើរត្រឡប់ទៅភូមិស្រុកវិញនាព្រឹកថ្ងៃ ដដែលនោះ៕