ដើម្បីចូលរួមថែរក្សានិងប្រតិបត្តិតាមព្រះពុទ្ធសាសនា ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភា នៃព្រះរាជាណាចក្រកម្ពុជា អមដំណើរដោយ ឯកឧត្តម លោកជំទាវជាតំណាងរាស្រ្ត មន្ត្រីរាជការជាច្រើន បាននាំយកទៀនព្រះវស្សា និងទេយ្យទាន បច្ច័យ ប្រគេនព្រះសង្ឃ ដែលគង់ចាំព្រះវស្សា ជូនលោកតាលោកយាយ នៅតាមវត្តអារាមជាច្រើនក្នុងខេត្តកំពង់ធំ នាថ្ងៃទី១១ ខែកក្កដា ឆ្នាំ២០១៦ ។
ព្រះសង្ឃនិងពុទ្ធបរិស័ទចំណុះជើងវត្តនីមួយៗ បានសម្តែងព្រះទ័យ ទឹកចិត្តរីករាយយ៉ាងក្រៃលែង ចំពោះសទ្ធាជ្រះថ្លារបស់ ឯកឧត្តមបណ្ឌិត ងួន ញ៉ិល និងក្រុមការងារទំាងអស់។ សកម្មភាពទំាងនេះ បានបញ្ជាក់ពីការយកចិត្តទុកដាក់ និងការប្រតិបត្តិយ៉ាងខ្ជាប់ខ្ជួនចំពោះព្រះពុទ្ធសាសនា ក្នុងការធ្វើបុណ្យ ធ្វើទាន សម្រាប់ឱកាសបុណ្យចូលព្រះវស្សា ដែលនឹងមកដល់នាពេលខាងមុខនេះ។
ក្នុងឱកាសនោះដែរ ឯកឧត្តមបណ្ឌិត ងួន ញ៉ិល បានកោតសរសើរ និងវាយតម្លៃខ្ពស់ ចំពោះព្រះគ្រូចៅអធិការតាមវត្តទំាងអស់ គណៈកម្មការ សាងសង់វត្ត ប្រជាពុទ្ធបរិស័ទ ដែលបានខិតខំចូលរួមចំណែកថែរក្សា និងប្រតិបត្តិតាមគន្លងព្រះពុទ្ធសាសនា និងបានចូលរួមអភិវឌ្ឍន៍ ហេដ្ឋារចនាសម្ព័ន្ធជាច្រើននៅតាមវត្តអារាមនីមួយៗ ធ្វើឲ្យទីអារាមទំាងនោះស័ក្តិសមជាស្រែបុណ្យ ជាទីគោរពសក្ការៈ ចំពោះប្រជាពលរដ្ឋទូទៅ។
ឯកឧត្តមបណ្ឌិត អនុប្រធានទី២នៃរដ្ឋសភាបានគូសបញ្ជាក់ថា ការខិតខំរបស់ប្រជាពុទ្ធបរិស័ទ ទំាងអស់នេះ ជាការចូលរួមចំណែកយ៉ាងសំខាន់ ជាមួយរាជរដ្ឋាភិបាលក្នុងការអភិវឌ្ឍវិស័យព្រះពុទ្ធសាសនានៅកម្ពុជា។ ឯកឧត្តមបណ្ឌិត បានមានប្រសាសន៍លើកឡើងថា ចាប់តំាងពីក្រោយ ថ្ងៃរំដោះ ៧ មករា ឆ្នាំ១៩៧៩ មកទល់ពេលបច្ចុប្បន្ននេះ រាជរដ្ឋាភិបាលកម្ពុជា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន បានយកចិត្តទុកដាក់យ៉ាងខ្លាំងក្នុងការកសាង ស្តាអភិវឌ្ឍន៍ឡើងវិញ វត្តអារាមនៅទូទំាងប្រទេស ត្បិតអីនៅក្នុងរបបអាវខ្មៅជាង៣ឆ្នាំ ទីអារាម ត្រូវបានវាយកម្ទេច និងបោះបង់ចោល។
សូមបញ្ជាក់ថា ក្រៅពីបាននាំយកនូវទៀនព្រះវស្សា ប្រគេនព្រះសង្ឃនៅវត្តចំនួន១០ ជាមួយគ្នានេះ ឯកឧត្តម បណ្ឌិតងួន ញ៉ិល ក៏បាននាំយក ទេយ្យទាន បរិក្ខារ និងបច្ច័យជាច្រើនទៀត ប្រគេនដល់ព្រះសង្ឃ និងចែកជូនលោកតា លោកយាយ ចាស់ព្រឹទ្ធាចារ្យ ប្រជាពលរដ្ឋ អាជ្ញាធរ និងសិស្សានុសិស្ស ផងដែរ៕
អត្ថបទនិងរូបភាពដោយនាយកដ្ឋានព័ត៌មាន