នៅថ្ងៃទី២១ ខែមិថុនា ឆ្នាំ២០១៦នេះ មានប្រជាពលរដ្ឋមកពីកន្លែងពីរផ្សេងគ្នា បានធ្វើដំណើរមកកាន់មុខវិមានរដ្ឋសភា ដើម្បីដាក់ញ្ញត្តិជូនរដ្ឋសភា ពិសេសស្នើសុំ សម្តេចអគ្គមហាពញាចក្រី ហេង សំរិន ប្រធានរដ្ឋសភា ជួយអន្តរាគមន៍ដោះស្រាយបញ្ហាដល់ពួកគាត់។
ប្រជាពលរដ្ឋក្រុមទី១ ដែលមកស្នើសុំ សម្តេចប្រធានរដ្ឋសភាជួយ គឺកម្មករកម្មការិនី រោងចក្រកាត់ដេរ ក្លូប័ល អាប៉ារែល លីមីតធីត។ ក្រុមកម្មករនេះ មានគ្នាប្រមាណជិត ២០០ នាក់ ទាមទារសូមឲ្យមានដំណោះស្រាយដល់ពួកគាត់ ចំនួន ០៥ចំណុច ដែលក្នុងនោះមាន ការទូទាត់ប្រាក់អតីតភាព ស្នើសុំថៅកែរោងចក្រទទួលយកកម្មករដែលក្រុមហ៊ុនបានបញ្ឈប់ពីការងារ ឲ្យចូលធ្វើការឡើងវិញ ជាដើម។
ចំណែកប្រជាពលរដ្ឋមួយក្រុមទៀត ដែលអញ្ជើញមកដល់រដ្ឋសភា នាព្រឹកនេះដែរ គឺប្រជាពលរដ្ឋដែលអះអាងថាមានវិវាទដីធ្លី ជាមួយក្រុមហ៊ុន វិនិយោគស្ករអំពៅ។ ពលរដ្ឋមួយក្រុមនេះ អញ្ជើញមកពីខេត្តកំពង់ស្ពឺ ខេត្តកោះកុង ខេត្តព្រះវិហារ ខេត្តឧត្តរមានជ័យ។
ប្រជាពលរដ្ឋទំាងបួនខេត្តខាងលើនេះ បានបញ្ជាក់ថា ពួកគាត់ទទួលរងការរំលោភដីធ្លី ពីសំណាក់ក្រុមហ៊ុន ទទួលបានសិទ្ធិវិនិយោគដំណាំអំពៅ ពីរាជរដ្ឋាភិបាល។
ក្រោយបានជួបជុំគ្នានៅមុខវិមានរដ្ឋសភា តំណាងប្រជាពលរដ្ឋត្រូវបានអនុញ្ញាតឲ្យចូលយកញ្ញត្តិដាក់ជូន គណៈកម្មការជំនាញរបស់រដ្ឋសភា បន្ទាប់មក ពួកគាត់បានបំបែកគ្នា ដោយសុវត្ថិភាព៕
អត្ថបទនិងរូបភាពដោយនាយកដ្ឋានព័ត៌មាន
