គណៈកម្មការនីតិកម្ម និងយុត្តិធម៌ នៃរដ្ឋសភា បានចាប់ផ្តើមការពិនិត្យសិក្សាលើសេចក្តីព្រាងច្បាប់ ស្តីពីការគ្រប់គ្រងលើការបរិច្ចាគ ការផ្សាំ កោសិកាជាលិកា និងសរីរាង្គមនុស្ស នៅ ថ្ងៃព្រហស្បតិ៍ ទី៩ ខែមិថុនា ឆ្នាំ២០១៦ តាមរយៈកិច្ចប្រជុំផ្ទៃក្នុងគណៈកម្មការ ដែលដឹកនាំ ឯកឧត្តមបណ្ឌិត ប៉ែន បញ្ញា ។
គណៈកម្មាធិការអចិន្រ្តៃយ៍រដ្ឋសភាបានសម្រេចប្រគល់សេចក្តីព្រាងច្បាប់ស្តីពីការគ្រប់គ្រងលើការបរិច្ចាគ ការផ្សាំកោសិកា ជាលិកា និងសរីរាង្គមនុស្ស កាលពីថ្ងៃចន្ទ ទី៦ ខែមិថុនាឆ្នាំ២០១៦ ឲ្យគណៈកម្មការនីតិកម្ម និងយុត្តិធម៌នៃរដ្ឋសភា ពិនិត្យសិក្សាដោយសហការជាមួយគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី។ នៅក្នុងកិច្ចប្រជុំផ្ទៃក្នុងនេះ ឯកឧត្តមបណ្ឌិត ប៉ែន បញ្ញា បានលើកឡើងថា រាជរដ្ឋាភិបាលបានតាក់តែងសេចក្តីព្រាងច្បាប់នេះឡើង ក្នុងគោលបំណងលើកកម្ពស់គុណភាព ប្រសិទ្ធភាព និងតម្លាភាពក្នុងការ ព្យាបាលសង្រ្គោះជីវិត និងសុខុមាលភាពរបស់ប្រជាពលរដ្ឋ តាមរយៈការផ្សាំកោសិកា ជាលិកា ឬសរីរាង្គមនុស្ស និងធានាការពារទប់ស្កាត់ ការជួញដូរកោសិកា ជាលិកា ឬសរីរាង្គមនុស្ស។
សេចក្តីព្រាងច្បាប់ស្តីពីការគ្រប់គ្រងលើការបរិច្ចាគ ការផ្សាំកោសិកា ជាលិកា និងសិរីរាង្គមនុស្សមាន៦ជំពូក និង៣៤មាត្រា។ បន្ទាប់ពីបានប្រជុំ ពិនិត្យសិក្សាផ្ទៃក្នុងហើយ គណៈកម្មការនីតិកម្មនិងយុត្តិធម៌ត្រូវជួបប្រជុំ ពិនិត្យសិក្សាសេចក្តីព្រាងច្បាប់នេះ ជាមួយគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី បន្តទៀត ទើបជួបប្រជុំពិនិត្យសិក្សាជាមួយតំណាង រាជរដ្ឋាភិបាល មុនបញ្ជូនសេចក្តីព្រាងច្បាប់ខាងលើនេះ ជូនទៅគណៈកម្មាធិការអចិន្រ្តៃយ៍រដ្ឋសភាវិញ ដើម្បីពិនិត្យអនុម័តដាក់ក្នុងរបៀបវារៈ សម័យប្រជុំពេញអង្គរដ្ឋសភានាពេលខាងមុខ៕
អត្ថបទនិងរូបភាពដោយនាយកដ្ឋានព័ត៌មាន