ឯកឧត្តម ឈាង វុន សមាជិកគណៈកម្មាធិការអចិន្ត្រៃយ៍ ប្រធានគណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងជាតំណាងរាស្ត្រមណ្ឌលខេត្តបាត់ដំបង បានអញ្ជើញជាអធិបតី និងបានធ្វើបទបង្ហាញពី “តួនាទី និងដំណើរការសភាប្រជាធិបតេយ្យនៅកម្ពុជា” ដល់និស្សិតសាកលវិទ្យាល័យបាត់ដំបង ក្នុងខេត្តបាត់ដំបង ប្រមាណជាជាង៤០០នាក់ នាព្រឹកថ្ងៃទី០៥ ខែកុម្ភៈ ឆ្នាំ២០១៦។ ពិធីនេះមានការ ចូលរួម ពីសំណាក់ លោកជំទាវ សៀង ឯមទទឹម សាកលវិទ្យាធិការ នៃសាកលវិទ្យាល័យបាត់ដំបង ផងដែរ។
មានប្រសាសន៍នៅក្នុងបទបង្ហាញនោះ ឯកឧត្តម ឈាង វុន បានលើកឡើងថា សភាប្រជាធិបតេយ្យជាដំណើរការ សភាតាមលទ្ធិប្រជាធិបតេយ្យ ដោយ រដ្ឋសភាកើតចេញពីការបោះឆ្នោតជា សកល ដោយសេរី ត្រឹមត្រូវ និងយុត្តិធម៌។ ប្រជាពលរដ្ឋជាអ្នកបោះជ្រើសរើសតំណាង ដើម្បីដំណើរការរដ្ឋសភា ដោយស្រប់ច្បាប់។ ឯកឧត្តមបានមានប្រសាសន៍បែបសាមញ្ញ ដើម្បីងាយស្រួលយល់ថា សភាប្រជាធិបតេយ្យបាន មកពីពាក្យ “ សភា ប្រជាបូក ធិបតេយ្យ មានន័យថា សភាដែលបង្កើតដោយ អំណាចបានពីប្រជាពលរដ្ឋ “។
ឯកឧត្តម ឈាង វុន បានគួសបញ្ជាក់ថា សភាប្រជាធិបតេយ្យកម្ពុជា គឺមានការយាងបើករដ្ឋសភានីតិកាល ដំបូងពីព្រះមហាក្សត្រ ដើម្បីប្រកាស សុពលភាព ជាសភាប្រជាធិបតេយ្យ ដើម្បីឲ្យអ្នកតំណាងរាស្ត្របំពេញតួនាទី និងភារកិច្ច ដែលបង្ហាញពីភាពជាតំណាង និងការតាមដាន ត្រួតពិនិត្យ ច្បាប់ និងការតាក់តែង បង្កើតច្បាប់។ ឯកឧត្តមបានសង្កត់ធ្ងន់ថា “សមាជិក សមាជិការដ្ឋសភាមានការងារស្នូលបីសំខាន់ៗ ១-ភាពជាអ្នកតំណាងអោយ ប្រជាពលរដ្ឋគឺស្តាប់នូវសំណូមពររបស់ប្រជាពលរដ្ឋ និងពាំនាំបញ្ហាប្រឈមទាំងឡាយជូនថ្នាក់ដឹកនាំរដ្ឋសភា និងរាជរដ្ឋាភិបាលធ្វើការដោះស្រាយ ២-តួនាទីជាអ្នកធ្វើច្បាប់ ៣-ត្រួតពិនិត្យនិងតាមដានការអនុវត្តច្បាប់របស់រាជរដ្ឋាភិបាល “។
ប្រធានគណៈកម្មការកិច្ចការ បរទេសសហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា បានជម្រាបជូននិស្សិតបន្តថា ទន្ទឹមនឹងភារកិច្ច សំខាន់ៗខាងលើ រដ្ឋសភាមានកាតព្វកិច្ច ចូលរួមប្រជុំក្នុងវេទិការដ្ឋសភាអន្តរជាតិ មានកិច្ចប្រជុំអន្តរសភាអាស៊ាន កិច្ចប្រជុំសភាតំបន់អាស៊ី កិច្ចប្រជុំ សហភាព អន្តរសភា កិច្ចប្រជុំសភាតំបន់ សភាអាស៊ីប៉ាស៊ីហ្វិក ។ល។
ឯកឧត្តម ឈាង វុន បានគូសបញ្ជាក់ថា រដ្ឋសភាកម្ពុជាក្រោមកាដឹកនាំ របស់ សម្តេចអគ្គមហាពញាចក្រី ហេងសំរិន ប្រធានរដ្ឋសភា នៃព្រះរាជាណា- ចក្រកម្ពុជា ទទួលបាននូវការកោតសរសើរពីសភាតំបន់អាស៊ីក្នុងការរៀបចំមហាសន្និបាតលើកទី៨ នាពេលកន្លងមកទទួលបានជោគជ័យយ៉ាងធំធេង។
នៅទីបញ្ចប់ លោកជំទាវ សៀង ឯមទទឺម សាកលវិទ្យាធិការ នៃសាកលវិទ្យាល័យបាត់ដំបង តំណាងនិសិ្សតទាំងអស់ បានកោតសរសើរ និង ថ្លែងអំណរគុណយ៉ាងជ្រាលជ្រៅ ចំពោះ ឯកឧត្តម ឈាង វុន ដែលបានចំណាយពេលវេលាដ៏មានតម្លៃ ចែករម្លែកចំណេះដឹងដ៏មានសារៈសំខាន់ ដល់ និស្សិតទំាងអស់នាឱកាសនោះ។ លោកជំទាវ បានគូសបញ្ជាក់ថាពុទ្ធិ ដែលទទួលបាននៅពេលនេះ ជាគ្រឹះសំខាន់មួយ ក្នុងវិស័យច្បាប់ សម្រាប់ចូលរួម កសាងប្រទេសជាតិឲ្យក្លាយជានិតិរដ្ឋ៕
អត្ថបទនិងរូបភាពដោយនាយកដ្ឋានព័ត៌មាន