គណៈប្រតិភូ គណៈកម្មការ អប់រំយុវជនកីឡាធម្មការកិច្ចការសាសនាវប្បធម៌ និងទេសចរណ៍នៃរដ្ឋសភា ដឹកនាំដោយ ឯកឧត្តម យ៉ែម បុញ្ញឫទ្ធិ ប្រធានគណៈកម្មការ បានអញ្ជើញចុះបំពេញបេសកកម្មនៅខេត្តពោធិ៍សាត់ ដើម្បីសិក្សាស្វែងយល់ពីការងារមួយចំនួន ទាក់ទងនឹងវិស័យទទួលខុសត្រូវរបស់គណៈកម្មការ នៅថ្ងៃទី០២ខែកុម្ភៈ ឆ្នាំ២០១៦។
ក្នុងជំនួបនៅឯសាលាខេត្តពោធិ៍សាត់ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បានមានប្រសាសន៍ថា ដោយអនុវត្តតាម យុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាល អាជ្ញាធរខេត្តបានយកចិត្តទុកដាក់ជាខ្លាំង លើការងារថែរក្សាសុខសន្តិភាព សណ្តាប់ធ្នាប់សាធារណៈជូនប្រជាពលរដ្ឋ ដោយបានអនុវត្តជាប្រចាំនូវគោលនយោបាយភូមិឃុំមានសុវត្ថិភាព។លើសពីនោះទៀត ដើម្បីចូលរួមទប់ស្កាត់ គ្រោះថ្នាក់ចរាចរដែលតែងកើតមានឡើងជាយថាហេតុ ខេត្តក៏បានរៀបចំផ្សព្វផ្សាយដល់ប្រជាពលរដ្ឋបានយល់ដឹងពីច្បាប់ចរាចរណ៍ និងមានកម្លាំង សមត្ថកិច្ចចុះត្រួតពិនិត្យលើការអនុវត្តច្បាប់ចរាចរណ៍ទៀតផង។ ឯកឧត្តមបានបន្តទៀតថា ខេត្តបានធ្វើការកំណែទម្រង់លើគ្រប់វិស័យ ដោយឡែកវិស័យអប់រំ ខេត្តក៏បានជម្រុញការពង្រឹងសមត្ថភាពគ្រូបង្រៀន ទន្ទឹមនឹងមានកម្មវិធីសិក្សាល្អនិងមានសម្ភារៈសិក្សាគ្រប់គ្រាន់ដើម្បីអោយសិស្សក្លាយជាពលរដ្ឋល្អជាធនធានមនុស្សមានតម្លៃសម្រាប់សង្គមជាតិ។
ឯកឧត្តមអភិបាល ក៏បានជម្រាបជូនគណៈប្រតិភូ គណៈកម្មការជំនាញនៃរដ្ឋសភា ពីសក្តានុពលរបស់ខេត្តពោធិ៍សាត់ ទៅលើផ្នែកទេសចរណ៍ ដោយផ្សារភ្ជាប់ទៅនឹងវប្បធម៌សាសនា និងធម្មជាតិដែលមានតំបន់ជួរភ្នំបឹងទន្លេសាប មានផ្ទះបណ្តែតទឹកមានព្រៃលិចទឹកនិងសត្វស្លាប ដែលអាច ទាក់ទាញភ្ញៀវទេសចរណ៍ជាតិ និងអន្តរជាតិមកលេងកំសាន្ត ជាក់ស្ដែងដូចជានៅរមណីយដ្ឋានទឹកធ្លាក់ច្រកល្អៀង ក្នុងស្រុកក្រគរជាដើម។
ឯកឧត្តម យ៉ែម បុញ្ញឫទ្ធិ ប្រធានគណៈកម្មការទី៧នៃរដ្ឋសភា បានថ្លែងការកោតសរសើរចំពោះ អាជ្ញាធរខេត្ត ក៏ដូចជាមន្ទីរជំនាញពាក់ព័ន្ធ នឹងវិស័យទទួលខុសត្រូវរបស់គណៈកម្មការទី៧ ដែលបានខិតខំប្រឹងប្រែងយកអស់កម្លាំងកាយចិត្តក្នុងការបម្រើប្រជាពលរដ្ឋ។ ឯកឧត្តមបានឲ្យដឹង ដែរថា ការចុះបំពេញបេសកកម្មរបស់គណៈកម្មការទី៧មកកាន់មូលដ្ឋានខេត្តពោធិ៍សាត់នេះ គឺដើម្បីស្តាប់ស្ថានការណ៍ពិត នៃមន្ទីរជំនាញទាំងបួន វិស័យដែលពាក់ព័ន្ធនឹងវិស័យទទួលខុសត្រូវរបស់គណៈកម្មការដើម្បីពិនិត្យប្រៀបធៀបរវាងគោលនយោបាយជាតិ និងការអនុវត្តន៍ជាក់ស្តែង នៅកម្រិតរដ្ឋបាលថ្នាក់ក្រោមជាតិ។
ឯកឧត្តមប្រធានគណៈកម្មការបញ្ជាក់ថានៅពេលចុះជួបផ្ទាល់ជាមួយលោកគ្រូ អ្នកគ្រូ និងមន្ត្រីរាជការដែលបម្រើការងារនៅតាមមូលដ្ឋាន ឯកឧត្តម សង្កេតឃើញថា ពួកគាត់បានខិតខំតស៊ូជំនះនឹងការលំបាកសព្វបែបយ៉ាង ដោយបានចូលរួមធ្វើការងារជាច្រើន ដើម្បីជម្រុញឲ្យមានការអភិវឌ្ឍ ពិតប្រាកដនៅតាមមូលដ្ឋានរបស់គាត់ ដែលនេះជាប្រការគួរឲ្យលើកទឹកចិត្តជាខ្លាំង៕
អត្ថបទនិងរូបភាពពីនាយកដ្ឋានព័ត៌មាន
