នៅព្រឹកថ្ងៃចន្ទ ទី១៦ ខែវិច្ឆិកា ឆ្នាំ២០១៥ វេលាម៉ោង ១០:០០នាទី គណៈកម្មាធិការអចិន្ត្រៃយ៍រដ្ឋសភា នៃព្រះរាជាណាចក្រកម្ពុជា បានបើកកិច្ចប្រជុំ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដើម្បីពិភាក្សានិងអនុម័តលើរបៀបវារៈចំនួន ០៣ ដែលមាន របៀបវារៈទី១- ការពិនិត្យលើសំណើសុំ បញ្ចូលក្នុងរបៀបវារៈ នៃសម័យប្រជុំរដ្ឋសភា លើកទី៥ នីតិកាលទី៥ នូវសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រង ឆ្នាំ២០១៦។សេចក្តីព្រាងច្បាប់ស្តីពីស្ថិតិ និងសេចក្តីព្រាងច្បាប់ស្តីពីទូរគមនាគមន៍។
របៀបវារៈទី២-ការពិនិត្យលើរបាយការណ៍ស្តីពីសំណុំរឿងពាក់ព័ន្ធនឹងការអនុវត្តទោសលើទណ្ឌិត ឈ្មោះ សម រង្ស៊ី។ ចំណែករបៀបវារៈទី៣- ការពិនិត្យ និងសម្រេចលើសេចក្តីព្រាងរបៀបវារៈទី១១ ទី១២ និងទី១៣ និងកាលបរិច្ឆេទបន្តសម័យប្រជុំរដ្ឋសភាលើកទី៥ នីតិកាលទី៥។
អង្គប្រជុំគណៈកម្មាធិការអចិន្ត្រៃយ៍នៃរដ្ឋសភា បានកំពុងដំណើរការប្រជុំតាមនីតិវិធី ចំពោះលទ្ធផលនៃកិច្ចប្រជុំនេះ អគ្គលេខាធិការដ្ឋានរដ្ឋសភា នឹងចេញសេចក្តីប្រកាសព័ត៌មាន ជូន សាធារណជនបានជ្រាបនៅពេលក្រោយ៕
អត្ថបទ និងរូបថត ដោយនាយកដ្ឋានព័ត៌មាន
