សម្ដេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា និងលោកជំទាវ ព្រមទាំងក្រុមគ្រួសារ សមាជិក សមាជិការដ្ឋសភា រាជរដ្ឋាភិបាល និងថ្នាក់ដឹកនាំមន្ត្រីរាជការនៃអគ្គលេខាធិការដ្ឋានរដ្ឋសភា រួមជាមួយពុទ្ធបរិស័ទជាច្រើនទៀត បាននាំយកចង្ហាន់ ទេយ្យទាន និងថវិកាមួយចំនួន ទៅរាប់បាត្រប្រគេនព្រះសង្ឃ បង្សុកូល សមាទានសីល ឧទ្ទិសកុសលផលបុណ្យជូនដល់បុព្វការីជន ដែលបានចែកឋានទៅកាន់លោកខាងមុខ នៅក្នុងថ្ងៃបុណ្យកាន់បិណ្ឌទី៤ នៅព្រឹកថ្ងៃទី០១ ខែតុលា ឆ្នាំ២០១៥ នៅវត្តប្រជុំនទី ហៅវត្តក្រពើហារ ស្ថិតក្នុងក្រុងតាខ្មៅ ខេត្តកណ្តាល ។
ទន្ទឹមនឹងការឧទ្ទិសកុសលផលបុណ្យ ជូនដល់បុព្វការីជន ដែលបានចែកឋានទៅកាន់លោកខាងមុខ និងវីរៈយុទ្ធជនដែលបានពលីជីវិត ដើម្បីជាតិមាតុភូមិ សម្ដេច ក៏បានសម្ដែងការអបអរសាទរចំពោះ បងប្អូនពុទ្ធបរិស័ទខ្មែរទូទាំងប្រទេស សូមបានជួបជុំធ្វើបុណ្យទាន ជាមួយក្រុមគ្រួសារ ប្រកបដោយ ភាពសប្បាយរីករាយ និងសូមឲ្យការធ្វើដំណើរ ទៅកាន់ស្រុកកំណើតទោះទីជិតឆ្ងាយក្តី សូមមានសុវត្ថិភាពគ្រប់ពេលវេលា។
សម្ដេចអគ្គមហាពញាចក្រី ហេង សំរិន និង លោកជំទាវ តែងតែគោរពប្រណិបត្តិ និង ជួយទំនុកបម្រុងឧបត្ថម្ភគ្រប់យ៉ាង ដើម្បីលើកស្ទួយវិស័យ ព្រះពុទ្ធសាសនាដែលជាសាសនា របស់រដ្ឋអោយកាន់តែរីកចម្រើន ព្រោះថាសព្វថ្ងៃនេះព្រះពុទ្ធសាសនា បានចូលរួមចំណែកនិងដើរតួយ៉ាងសំខាន់ ក្នុងការសាង និងថែរក្សាសុខសន្តិភាពនៅក្នុងសង្គម។
ពីធីបុណ្យភ្ជុំបិណ្ឌ ជាពិធីបុណ្យពុទ្ធសាសនាដ៏ធំ ដែលពលរដ្ឋកម្ពុជាមានជំនឿថា ជាឱកាសធ្វើបុណ្យទានជូនចំពោះអ្នកមានគុណ មានមាតា បិតា ដែលនៅរស់រានមានជីវិត និងដែលបានស្លាប់បាត់បង់ជិវិតទៅហើយ។ ប្រជាពលរដ្ឋកម្ពុជា បានប្រារព្ធពិធីបុណ្យនេះចាប់ពីថ្ងៃ១រោច រហូតដល់ថ្ងៃទី១៥រោច ខែភទ្របទ ជារៀងរាល់ឆ្នាំ ដោយត្រូវនាំចង្ហាន់ ទេយ្យទានផ្សេងៗ ទៅប្រគេនព្រះសង្ឃដែលគង់ចំាព្រះវស្សា នៅតាមវត្តអារាមនានា៕