បន្ទាប់ពីបញ្ចប់បេសកកម្មនៅខេត្តតាកែវ គណៈប្រតិភូរដ្ឋសភា ដឹកនាំដោយ លោកជំទាវ កែ សុវណ្ណរតន៍ ប្រធានគណៈកម្មការ សុខាភិបាល សង្គមកិច្ច អតីតយុទ្ធជន យុវនីតិសម្បទា បណ្តុះបណ្តាលវជ្ជាជីវៈ និងកិច្ចការនារី រួមដំណើរដោយ ឯកឧត្តម លោកជំទាវ ជាសមាជិក សមាជិកា គណៈកម្មការ ក៏បានបន្តអញ្ជើញ ចុះបំពេញបេសកកម្ម ដើម្បីសិក្សាស្វែងយល់ពីលទ្ធផលការងារ និងបញ្ហាប្រឈមនានា នៅក្នុងខេត្តកំពតជាបន្តទៀត ដោយផ្ដោតលើ ការងាររបស់មន្ទីរជំនាញចំនួន៤ ដែលពាក់ព័ន្ធទៅនឹងសមត្ថកិច្ចរបស់គណៈកម្មការ មានដូចជា បញ្ហាការផ្តល់មូលនិធិសមធម៌លើសេវាសុខាភិបាល ជូនប្រជាពលរដ្ឋ បញ្ហាកង្វះខាតគ្រូពេទ្យជំនាញ បញ្ហាការផ្តល់ប្រាក់សោធននិវត្តន៍ជូនអតីតយុទ្ធជននិងមន្រ្តីរាជការចូលនិវត្តន៍ ការប្រើប្រាស់កំលាំងពលកម្មកុមារ បញ្ហាពលករចំណាកស្រុក និងករណីអំពើហិង្សាក្នុងគ្រួសារជាដើម ។
នៅក្នុងជំនួបរវាងគណៈប្រតិភូគណៈកម្មការទី៨នៃរដ្ឋសភាជាមួយ ឯកឧត្តម សូត យា អភិបាលរងខេត្តកំពត និងលោក លោកស្រី ជាប្រធានមន្ទីរជំនាញ ពាក់ព័ន្ធ នៅឯសាលាខេត្តកំពត នាព្រឹកថ្ងៃទី២៩ ខែកញ្ញា ឆ្នាំ២០១៥ ឯកឧត្តម សូត យា បានជម្រាបជូនគណៈប្រតិភូគណៈកម្មការទី៨ នៃរដ្ឋសភាថា មូលនិធិសមធម៌គឺជាមូលនិធិមួយជួយដល់ជនក្រីក្រអោយទទួលបាននូវសេវាថែទាំសុខភាពដោយមិនចំណាយប្រាក់។ ឯកឧត្តមបន្តថា ខេត្តបានយកចិត្តទុកដាក់ណាស់លើបញ្ហានេះ ដោយខេត្តបានបែងចែកជនក្រីក្រជាពីរកម្រិត គឺកម្រិត១និងកម្រិត២ ព្រមទាំងបានចេញប័ណ្ណក្រីក្រជូនពួកគាត់ថែមទៀត។ លើសពីនោះទៀតអាជា្ញធរខេត្តក៏បានដាក់វិធានការចំពោះគ្រូពេទ្យមិនឲ្យយកថវិកាពីអ្នកជម្ងឺដែលមានប័ណ្ណក្រីក្រនោះទេ។
ឯកឧត្តម សូត យា បានឲ្យដឹងដែរថា នៅក្នុងខេត្តកំពតក៏មានអង្គការមួយចំនួនបានក្លាយជាដៃគូរបស់ខេត្តក្នុងចូលរួមផ្តល់សេវាសុខភាពជូនប្រជាពលរដ្ឋ មានដូចជា អង្គការព្រះពុទ្ធសាសនាដើម្បីសុខភាពនិងកម្មវិធីគាំពារសុខភាពសង្គមជាដើម។
ដោយឡែកទាក់ទិនទៅនឹងបញ្ហាផ្សេងៗទៀត ឯកឧត្តម សូត យា រួមជាមួយលោក លោកស្រី ជាប្រធានមន្ទីរពាក់ព័ន្ធ ក៏បានបកស្រាយ និងឆ្លើយតប នូវរាល់ចម្ងល់ របស់គណៈកម្មការទី៨នៃរដ្ឋសភាដែលបានលើកឡើង។
បន្ទាប់ពីបានស្ដាប់នូវការបកស្រាយយ៉ាងក្បោះក្បាយ លោកជំទាវ កែ សុវណ្ណរតន៍ ក៏បានថ្លែងការកោតសរសើរ ចំពោះអាជ្ញាធរ និងមន្ត្រីរាជការនៃ ខេត្តកំពតទាំងអស់ ដែលបានខិតខំបំពេញការងារបម្រើប្រជាពលរដ្ឋ ហើយលោកជំទាវក៏បានជំរុញឲ្យអាជ្ញាធរខេត្តនេះបន្តខិតខំបន្ថែមទៀត ដើម្បីឆ្លើយតបដោះស្រាយរាល់បញ្ហាទំាងឡាយ ដែលជាទុក្ខកង្វល់របស់ ប្រជាពលរដ្ឋឲ្យបានទាន់ពេលវេលា៕
អត្ថបទនិងរូបភាពពីនាយកដ្ឋានព័ត៌មាន