ក្នុងឱកាសដឹកនាំសមាជិកសមាជិកាចុះបំពេញបេសកកម្មនៅខេត្តតាកែវ លោកជំទាវ កែ សុវណ្ណរតន៍ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា បានមានប្រសាសន៍ស្នើដល់អាជ្ញាធរ និងមន្ទីរជំនាញពាក់ព័ន្ធវិស័យសុខាភិបាលក្នុងខេត្តនេះ ត្រួតពិនិត្យគ្លីនិក ឬកន្លែងព្យាបាលជំងឺឯកជន ដែលពុំទាន់មានច្បាប់អនុញ្ញាត ត្រឹមត្រូវឲ្យទៅសុំច្បាប់ប្រកបអាជីវកម្មដើម្បីធានាដល់ការព្យាបាលជំងឺប្រជាពលរដ្ឋមានប្រសិទ្ធភាព និងមានការទទួលខុសត្រូវ។
លោកជំទាវ ប្រធានគណៈកម្មការ បានដឹកនាំសមាជិកសមាជិកាគណៈកម្មការចុះបំពេញបេសកកម្ម ពិនិត្យសិក្សាស្វែងយល់ការងារ ក្នុងវិស័យទទួលខុសត្រូវរបស់គណៈកម្មការ នៅខេត្តតាកែវ និងបានជួបពិភាក្សាជាមួយថ្នាក់ដឹកនាំខេត្ត មន្ទីរពាក់ព័ន្ធជុំវិញខេត្ត ដែលដឹកនាំដោយ ឯកឧត្តម យស ណាស៊ី អភិបាលស្តីទីខេត្តតាកែវ នាថ្ងៃទី២៨ ខែកញ្ញាឆ្នាំ២០១៥។
លោកជំទាវប្រធានគណៈកម្មការ បានលើកឡើងថា កន្លងមកមានខេត្តមួយចំនួនត្រូវបានគេ រាយការណ៍ពីគ្រោះថ្នាក់ដល់អាយុជីវិតប្រជាពលរដ្ឋ ជាអ្នកជំងឺ នៅពេលទៅព្យាបាលជំងឺតាមគ្លីនិកឯកជន។ លោកជំទាវបានសង្កត់ធ្ងន់ថា “ភាគច្រើននៃការព្យាបាល ដែលបង្កគ្រោះថ្នាក់ដល់អាយុជីវិតប្រជាពលរដ្ឋ គឺកើតមាននៅតាមកន្លែងព្យាបាលឯកជន ដែលគ្មានច្បាប់អនុញ្ញាតត្រឹមត្រូវ។ ដូច្នេះយើងរួមគ្នាលុបបំបាត់គ្លីនិក ឬកន្លែងព្យាបាល ដែលគ្មានច្បាប់ទំាងអស់នោះ ដើម្បីកុំឲ្យមានករណីពលរដ្ឋស្លាប់ទៀត”។
ឯកឧត្តម យស ណាស៊ី អភិបាលស្តីទីខេត្តតាកែវ បានគំាទ្រប្រសាសន៍លើកឡើង របស់លោកជំទាវប្រធាន គណៈកម្មការនិងបានគូសបញ្ជាក់ថា បញ្ហានេះថ្នាក់ដឹកនាំខេត្ត និងមន្រ្តីពាក់ព័ន្ធពិសេសមន្ទីរសុខាភិបាលខេត្តតាកែវ បានយកចិត្តទុកដាក់យ៉ាងខ្លំាង និងតាមដានជាប្រចំា។
ជាមួយគ្នានេះ ឯកឧត្តមអភិបាលខេត្តស្តីទី ក៏បានរាយការណ៍ជូន គណៈប្រតិភូគណៈកម្មការជំនាញនៃរដ្ឋសភា អំពីសកម្មភាពការងារ ទំាងលទ្ធផល និងបញ្ហាប្រឈម ដែលអាជ្ញាធរខេត្ត ក៏ដូចជាមន្ទីរជំនាញបានជួបប្រទះ ពិសេសបញ្ហាពាក់ព័ន្ធនឹងវិស័យសុខាភិបាល។ ឯកឧត្តម យស ណាស៊ី បានឲ្យដឹងដែរថាក្នុងខេត្តតាកែវ មានស្រុកប្រតិបត្តិចំនួន០៥ មានមន្ទីរពេទ្យបង្អែកចំនួន០៦ ដែលមានមន្រ្តីបម្រើការសរុបចំនួន១ ២២១នាក់។
ឯកឧត្តមអភិបាលខេត្តស្តីទី ក៏បានលើកឡើងទៀតថា នៅក្នុងនោះខេត្តតាកែវ មានអង្គការមួយចំនួនបានក្លាយជាដៃគូរបស់ខេត្តក្នុងការចូលរួមបម្រើសេវា សុខភាពជូនប្រជាពលរដ្ឋ ដោយក្នុងនោះមានដូចជាអង្គការ ព្រះពុទ្ធសាសនាដើម្បីសុខភាព និងកម្មវិធីគាំពារសុខភាពសង្គម ជាដើម។
បើតាមប្រសាសន៍របស់ ឯកឧត្តម អភិបាលខេត្តស្តីទី អង្គការទំាងនេះ បានជួយដល់ប្រជាពលរដ្ឋទីទ័លក្រ និងប្រជាពលរដ្ឋងាយរងគ្រោះ ឲ្យទទួលបាននូវសេវា ថែទាំសុខភាព ប្រកបដោយគុណភាព តាមរយៈការអនុវត្ត គម្រោងមូលនិធិ សមធម៌សុខាភិបាល និងគម្រោងធានារ៉ាប់រងសុខភាព សហគមន៍ ឬគម្រោងគាំពារសុខភាពសង្គមផ្សេងទៀត ដែលគម្រោងនិងកម្មវិធីទំាងអស់នោះ បានបង្កលក្ខណៈងាយស្រួលដល់ប្រជាពលរដ្ឋទទួលសេវាព្យាបាលនៅតាមមន្ទីរពេទ្យរដ្ឋគ្រប់ពេលវេលា៕
អត្ថបទនិងរូបភាពពីនាយកដ្ឋានព័ត៌មាន
