នៅថ្ងៃទី២៧ ខែសីហា ឆ្នាំ២០១៥ នៅវិមានរដ្ឋសភា ឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា និងជាប្រធាន អនុគណៈកម្មការទទួលបន្ទុកផ្នែកព័ត៌មាន និង ICT សម្រាប់មហាសន្និបាត សភាតំបន់អាស៊ីលើកទី៨ ដែលសភា នៃព្រះរាជាណាចក្រកម្ពុជា ទទួលធ្វើជាម្ចាស់ផ្ទះនៅចុងឆ្នាំ២០១៥ បានជួបប្រជុំជាមួយក្រុមការងារ ដើម្បីពិនិត្យលទ្ធផលការងារដែលបានអនុវត្តកន្លងមកនិងដាក់ទិសដៅបន្តទៀត ដើម្បីធ្វើយ៉ាងណាឲ្យមហាសន្និបាតទទួលបានជោគជ័យ។
សូមបញ្ជាក់ថា សភានៃព្រះរាជាណាចក្រកម្ពុជា នឹងទទួលធ្វើជាម្ចាស់ផ្ទះរៀបចំមហា សន្និបាត សភាតំបន់អាស៊ីលើកទី៨ នាដើមខែធ្នូ ចុងឆ្នាំ២០១៥ នេះ។ ដើម្បីរៀបចំមហាសន្និបាតនេះ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានបង្កើតអនុគណៈកម្មការចំនួន៦ ទទួលបន្ទុកកិច្ចការ ផ្សេងៗគ្នា ដើម្បីចាត់ចែងរៀបចំការងារ នៅមុននិងក្នុងពេលមហាសន្និបាត។ អនុគណៈកម្មការទំាង៦ ដែលបានបង្កើតនោះមាន អនុគណៈកម្មការ ទទួលបន្ទុក ផ្នែកហិរញ្ញវត្ថុនិងផ្គត់ផ្គង់ អនុគណៈកម្មការទទួលបន្ទុកផ្នែកឯកសារ ខ្លឹមសារកិច្ចប្រជុំ អនុគណៈកម្មការទទួល បន្ទុកផ្នែកដឹកជញ្ជូន អនុគណៈកម្មការទទួលបន្ទុកផ្នែកសន្តិសុខ អនុគណៈកម្មការទទួលបន្ទុកផ្នែកពិធីការ និងអនុគណៈកម្មការទទួលបន្ទុកផ្នែកព័ត៌មាននិង ICT។
ឯកឧត្តម ឈាង វុន បានមានប្រសាសន៍ថា មហាសន្និបាតសភាតំបន់អាស៊ីជាកិច្ចប្រជុំ ដែលមានគណៈប្រតិភូផ្លូវការនៃសភាជាសមាជិក តំបន់ អាស៊ី៤២ប្រទេស និងសមាជិកអ្នកសង្កេតការណ៍១៦ប្រទេស ព្រមទាំងអង្គការសង្កេតការណ៍ចំនួន១០ទៀត។ ឯកឧត្តមបានលើកឡើងថា ព្រឹត្តិការណ៍នេះ បានបង្ហាញពីមុខមាត់ និងកិត្តិយស ដ៏ធំធេងរបស់រាជរដ្ឋាភិបាល និងសភាកម្ពុជា ក៏ដូចជាប្រជាពលរដ្ឋកម្ពុជាទំាងអស់នៅលើឆាកអន្តរជាតិ។
ឯកឧត្តមបានជំរុញនិងលើកទឹកចិត្តដល់ក្រុមការងារ ឲ្យខិតខំបំពេញភារកិច្ចតាមការកំណត់ ដើម្បីឲ្យមហាសន្និបាតប្រព្រឹត្តទៅទទួលបានជោគជ័យ៕
អត្ថបទនិងរូបភាពពីនាយកដ្ឋានព័ត៌មាន
