ឯកឧត្តម ឈាង វុន ប្រធានគណៈកម្មការ កិច្ចការបរទេស សហប្រតិបត្តិការអន្តរជាតិ ឃោសនាការនិងព័តមាននៃរដ្ឋសភា បានជួបប្រជុំជាមួយ អន្តរក្រសួងចំនួន៤ មាន តំណាងក្រសួងការបរទេស និង សហប្រតិបត្តិការអន្តរជាតិ ដឹកនាំដោយ ឯកឧត្តម អ៊ុច បូររិទ្ធ រដ្ឋលេខាធិការ, តំណាងក្រសួងយុត្តិធម៌ ដឹកនាំដោយ ឯកឧត្តម កើត រិទ្ធ រដ្ឋលេខាធិការ, តំណាងក្រសួងមហាផ្ទៃ ដឹកនាំដោយ ឯកឧត្តម សក់ សេដ្ឋា រដ្ឋលេខាធិការ និងក្រសួងសេដ្ឋកិច្ច និង ហិរញ្ញវត្ថុ ដឹកនាំដោយ លោកជំទាវ ងួន សុខា រដ្ឋលេខាធិការ ដើម្បីពិភាក្សាការងារ ទាក់ទិនទៅនឹងសេចក្តីព្រាងច្បាប់ស្តីពី សមាគមនិងអង្គការមិនមែនរដ្ឋាភិបាល នាព្រឹកថ្ងៃទី២ ខែកក្កដា ឆ្នាំ២០១៥ នៅវិមានរដ្ឋសភា។
ថ្លែងក្នុងកិច្ចប្រជុំ ឯកឧត្តម ឈាង វុន បានមានប្រសាសន៍ថា កិច្ចប្រជុំនាពេលនេះគឺឯកឧត្ដម សូមស្នើអោយក្រសួងពាក់ព័ន្ធទាំងបួន មកចូលរួម ធ្វើជាវាគ្មិនក្នុងសិក្ខាសាលាពិគ្រោះយោបល់លើសេចក្តីព្រាងច្បាប់ស្តីពី សមាគមនិងអង្គការមិនមែនរដ្ឋាភិបាល ដែលរដ្ឋសភារៀបចំធ្វើនៅថ្ងៃទី៨ ខែកក្កដា ឆ្នាំ២០១៥ ខាងមុខនេះ ដោយស្នើឲ្យក្រសួងនីមួយៗ ផ្ដោតទៅលើប្រធានបទដែលពាក់ព័ន្ធទៅនឹងតួនាទីភារៈកិច្ច របស់ក្រសួងរៀងៗខ្លួន និងត្រៀមឆ្លើយតបសំនួរទាំងឡាយដែលសិក្ខាកាមនឹងចោទសួរក្នុងអង្គសិក្ខាសាលានាពេលនោះ៕
អត្ថបទនិងរូបភាពពីនាយកដ្ឋានព័ត៌មាន