សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានមានប្រសាសន៍ជំរុញឲ្យអគ្គរាជទូត ដែលទើបតែងតាំងថ្មី ប្រចាំបណ្តាប្រទេសនានាទាំងអស់ បង្កើនកិច្ចសហប្រតិបត្តិការអន្តរជាតិលើគ្រប់វិស័យ រួមមាន វិស័យនយោបាយ ការបរទេស វិស័យពាណិជ្ជកម្ម វិនិយោគ ទេសចរណ៍ ជាមួយប្រទេសដែលខ្លួនបំពេញបេសកកម្ម និងត្រូវចេះលើកកិត្យានុភាពប្រទេសជាតិលើឆាកអន្តរជាតិ ឲ្យបានល្អប្រសើរ។ សម្តេច មានប្រសាសន៍បែបនេះក្នុងឱកាសដែលសម្តេច អនុញ្ញាតឲ្យ ឯកឧត្តម លោកជំទាវ ដែលទើបតែងតំាងជាឯកអគ្គរាជទូត វិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំនៅបណ្ដាប្រទេសនានាចំនួន៧រូប ចូលសម្តែងការគួរសម និងជម្រាបលា មុនពេលទៅបំពេញបេសកកម្មការទូត នាព្រឹកថ្ងៃទី២៧ ខែឧសភា ឆ្នាំ២០១៥ នៅវិមានរដ្ឋសភា ។
សមាសភាពឯកអគ្គរាជទូត ដែលទើបតែងតំាង និងដែលបានអនុញ្ញាតចូលសម្តែងការគួរសមជាមួយ សម្តេច ប្រធានរដ្ឋសភា មាន ឯកឧត្តម ជុំ ប៊ុនរ៉ុង ជាឯកអគ្គរាជទូត ប្រចំាសហរដ្ឋអាមេរិក ។ ឯកឧត្តម កុយ គួង ជាឯកអគ្គរាជទូត ប្រចំាប្រទេសអូស្ត្រាលី។ ឯកឧត្តម ស្មាន ម៉ាណាន ជាឯកអគ្គរាជទូត ប្រចំារដ្ឋគុយវ៉ែត។ ឯកឧត្តម នង សាកល ជាឯកអគ្គរាជទូត ប្រចំាសាធារណរដ្ឋឥណ្ឌូនេស៊ី។ លោកជំទាវ ជា គឹមថា ជាឯកអគ្គរាជទូត ប្រចំាប្រទេស ជប៉ុន។ ឯកឧត្តម ជា ធីរៈ ជាឯកអគ្គរាជទូតប្រចំាប្រទេសប៊ែលហ្សិក។ ឯកឧត្តម ពេជ្រ ឃុនបញ្ញា ជាឯកអគ្គរាជទូតប្រចំាសាធារណរដ្ឋឥណ្ឌា។
នៅក្នុងឱកាសនោះ សម្តេចអគ្គមហាពញាចក្រី បានមានប្រសាសន៍លើកឡើងថា ចាប់ពីពេលនេះតទៅ ឯកឧត្តមលោកជំទាវទំាងអស់ ជាឥស្សរជន តំណាងឲ្យព្រះរាជាណាចក្រកម្ពុជា នៅបរទេស អ្នកទាំងអស់គ្នាមានតួនាទី សំខាន់ណាស់សម្រាប់ប្រទេសជាតិ ជាតំណាងឲ្យប្រជាជនកម្ពុជា ទំាងមូល នៅលើឆាកអន្តរជាតិ ។
សម្តេចបានផ្តំាផ្ញើថា នៅពេលបំពេញការងារគប្បីត្រូវគិតពីផលប្រយោជន៍ជាតិជាធំ ការពារផលប្រយោជន៍របស់ ជាតិ និង ប្រជាពលរដ្ឋខ្មែរ ពលករខ្មែរ ដែលរស់នៅប្រកបអាជីវកម្ម និងធ្វើការងារនៅបណ្តាប្រទេសដែល ឯកឧត្តម លោកជំទាវ ទទួលជាតំណាង ទោះបីស្ថិតក្នុងកាលៈទេសៈ បែបណា ក៏ដោយ។ ជាមួយគ្នានេះសម្តេចបានជំរុញឲ្យ ឯកឧត្តម លោកជំទាវ ទាំងអស់ ត្រូវក្តាប់ឲ្យបានចំនួនពលរដ្ឋខ្មែរ រស់នៅប្រទេសដែល ឯកឧត្តម លោកជំទាវ មានបេសកកម្ម ហើយបង្កលក្ខណៈងាយស្រួល ក្នុងការធ្វើទំនាក់ទំនង ត្រូវការពារផលប្រយោជន៍ ពលរដ្ឋ និងត្រូវបង្កើនកិច្ចសហ ប្រតិបត្តិការ ល្អជាមួយឯកអគ្គរដ្ឋទូត-រាជទូត នៃបណ្តាប្រទេសដទៃទៀត ប្រចាំនៅប្រទេសទំាងនោះផងដែរ ។
សម្តេចអគ្គមហាពញាចក្រី ហេង សំរិន ប្រធានរដ្ឋសភា មានប្រសាសន៍ផ្តំាផ្ញើបន្តថា ឯកឧត្តម លោកជំទាវ ត្រូវធ្វើការផ្សព្វផ្សាយ ពីសក្តានុពល និង ស្ថិរភាព របស់កម្ពុជា ដើម្បីទាក់ទាញអ្នកវិនិយោគ និងទេសចរណ៍ឲ្យមកកាន់ប្រទេសកម្ពុជា ឲ្យបានច្រើន។
ឯកឧត្តម ជុំ ប៊ុនរ៉ុង ជាតំណាងឲ្យ ឯកឧត្តម លោកជំទាវ ជាឯកអគ្គរាជទូតកម្ពុជា ទំាងអស់ បានមានប្រសាសន៍ប្តេជ្ញាចិត្តថា នឹងខិតខំធ្វើយ៉ាងណា ដើម្បីបង្កើននូវទំនាក់ទំនងមិត្តភាព សហប្រតិបត្តិការដ៏ជិតស្និត និងប្រកបដោយផ្លែផ្ការវាងប្រទេសដែលតាំងបេសកកម្មការទូតជាមួយព្រះរាជាណាចក្រ កម្ពុជា អោយបានល្អប្រពៃ ហើយនឹងខិតខំក្នុងការលើកកម្ពស់កិត្យានុភាពជាតិ ការពារផលប្រយោជន៍ជាតិ និង ជំរុញវិស័យទេសចរណ៍ វិស័យវិនិយោគ ទុន វិស័យពាណិជ្ជកម្ម វិស័យវប្បធម៌ និងវិស័យផ្សេងៗទៀតដើម្បីរួមចំណែកក្នុងការ អភិវឌ្ឍជាតិឲ្យកាន់តែរីកចម្រើន សម្បូររុងរឿង ទៅថ្ងៃមុខ។
ឯកឧត្តមបញ្ជាក់ថា ឯកឧត្តម ក៏នឹងខិតខំផ្សព្វផ្សាយពីវប្បធម៌សន្ទនា ដែលថ្នាក់ដឹកនាំកម្ពុជា កំពុងតែអនុវត្តនាពេលបច្ចុប្បន្ននេះផងដែរ៕
អត្ថបទនិងរូបភាពពីនាយកដ្ឋានព័ត៌មាន