សេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋសម្រាប់ឆ្នាំ២០១៣ ត្រូវបាន គណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ដឹកនាំដោយឯកឧត្តមបណ្ឌិតរដ្ឋ ជាម យៀប ប្រធានគណៈកម្មការ លើកយកមកប្រជុំពិភាក្សាជាមួយឯកឧត្តមបណ្ឌិត អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ ដោយមានការចូលរួមពីលោកជំទាវ សោម គឹមសួគ៌ អគ្គសវនករនៃអាជ្ញាធរសវនកម្មជាតិ រួមជាមួយ ឯកឧត្តម លោកជំទាវ ជាសមាជិកសមាជិកាគណៈកម្មការជំនាញផ្សេងៗទៀតនៃរដ្ឋសភា នាព្រឹកថ្ងៃទី២៥ខែ ឧសភា ឆ្នាំ ២០១៥ នៅវិមានរដ្ឋសភា។
ឯកឧត្តម បណ្ឌិតរដ្ឋ ជាម យៀប បានមានប្រសាសន៍ថា សេចក្តីព្រាងច្បាប់ ស្តីពីការទូទាត់ថវិកា ទូទៅរបស់រដ្ឋសម្រាប់ឆ្នាំ២០១៣ គឺជាការឆ្លុះបញ្ចាំង អំពីលទ្ធផលនៃការអនុវត្តច្បាប់ស្តីពី ហិរញ្ញវត្ថុសម្រាប់ ការគ្រប់គ្រងឆ្នាំ២០១៣ ដោយសេចក្តីព្រាងច្បាប់នេះ ត្រូវបានរៀបចំឡើងដោយ គោរពទាំងស្រុងទាំងកាលវសានទាំងខ្លឹមសារនៃមាត្រា៧៨នៃច្បាប់ស្តីពីប្រព័ន្ធហិរញ្ញវត្ថុសាធារណៈ ដោយផ្អែកលើការបូកសរុបទិន្នន័យចំណូលនិងចំណាយថវិកា ដែលត្រូវបានកត់ត្រាដោយគណនេយ្យករសាធារណៈ និងការផ្ទៀងផ្ទាត់ អំពីភាពត្រឹមត្រូវនៃទិន្នន័យទាំងនេះជាមួយ អាណាប័កពាក់ព័ន្ធទាំងក្នុងកម្រិតថវិកាថ្នាក់ជាតិ និងថ្នាក់រដ្ឋបាលក្រោមជាតិ។
ថ្លែងក្នុងកិច្ចប្រជុំនោះដែរឯកឧត្តមបណ្ឌិត អូន ព័ន្ធមុនីរ័ត្ន បានមានប្រសាសន៍ថា ការគ្រប់គ្រងបំណុលសាធារណៈក្រៅប្រទេសឆ្នាំ២០១៣ បានឆ្លុះបញ្ចាំងពីកិច្ចខិតខំប្រឹងប្រែង របស់រាជរដ្ឋាភិបាលក្នុងការកាត់បន្ថយឱនភាពទូទៅនៃថវិកា អោយមកស្ថិតក្នុងកម្រិតដែលអាចធានាម៉ាក្រូ សេដ្ឋកិច្ច ក្នុងរយៈពេលមធ្យមនិងរយៈពេលវែង ជាពិសេសតាមរយៈការអនុវត្តដោយហ្មត់ចត់នូវយុទ្ធសាស្រ្តគ្រប់គ្រងបំណុលរបស់រាជរដ្ឋាភិបាល ដែលមានគោលការណ៍ចំនួន៤គឺ ១-ខ្ចីក្នុងទំហំសមស្របដែលស្ថានភាពថវិកានិងសេដ្ឋកិច្ចគាំទ្របាន ២-ខ្ចីតែឥណទានសម្បទាន ៣-ខ្ចីសម្រាប់ វិស័យទ្រទ្រង់កំណើននិងបង្កើនផលិតភាព ៤-ប្រើប្រាស់កម្ចីទាំងនោះអោយ មានតម្លាភាពនិងប្រសិទ្ធភាពខ្ពស់បំផុតស្របតាមឯកសារយុទ្ធសាស្រ្តស្តីពីការគ្រប់គ្រងបំណុលសាធារណៈឆ្នាំ ២០១១-២០១៨។ ជាក់ស្តែងរាជរដ្ឋាភិបាលអនុវត្តបានចំនួន៥១៩លាន អេស ដេ អ៊ែ SDR ស្មើនិង៨៦,៥% នៃពិដានដែលច្បាប់អនុញ្ញាតអោយខ្ចី៕
អត្ថបទនិងរូបភាពពីនាយកដ្ឋានព័ត៌មាន
