នាថ្ងៃទី១៩ ខែឧសភា ឆ្នាំ២០១៥ នៅវិមានរដ្ឋសភា ឯកឧត្តម ឈាង វុន ប្រធានគណៈកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន​នៃរដ្ឋសភា បានជួបពិភាក្សាការងារ ជាមួយឯកឧត្តម ចៅ ស៊ីឡក់ ( CAO SY LOC ) លេខាធិការទី១​ទទួលបន្ទុក​ផ្នែកសេដ្ឋកិច្ច នៃស្ថានទូតសាធារណ​​​​​​រដ្ឋសង្គម​និយម​វៀតណាម ឯកឧត្តម ខាំ សន លេខាធិការទី៣ ស្ថានទូត​សាធារណរដ្ឋប្រជាធិបតេយ្យប្រជាមានិតឡាវ ពាក់ព័ន្ធកិច្ចប្រជុំការអភិវឌ្ឍន៍តំបន់ត្រីកោណ ព្រំដែន​នៃ​ប្រទេសទាំងបី កម្ពុជា ឡាវ វៀតណាម ដែលនឹង​ប្រព្រឹត្ត​ទៅ​អំឡុងខែកក្កដា ឆ្នាំ២០១៥ នៅ ខេត្តចំប៉ាសាក់ សាធារណៈរដ្ឋប្រជាធិបតេយ្យប្រជាមានិតឡាវ។

នៅក្នុងកិច្ចពិភាក្សានេះ ឯកឧត្ដមលេខាធិការស្ថានទូតឡាវ និងស្ថានទូតវៀតណាម បានជម្រាបជូន​ឯកឧត្ដម ឈាង វុន ថា សូមឲ្យ គណៈប្រតិភូកម្ពុជា​ ត្រៀមប្រធានបទសំខាន់ៗ ក្នុងការចូលរួមកិច្ច​ប្រជុំ​ការអភិវឌ្ឍន៍តំបន់ត្រីកោណព្រំដែននៃប្រទេសទាំងបី កម្ពុជា ឡាវ វៀតណាម និងត្រៀមរៀបចំឲ្យបានរួចរាល់​នូវបញ្ជីឈ្មោះ​គណៈប្រតិភូ​កម្ពុជា ក៏ដូចជារាល់លិខិត ស្នាមផ្សេងៗ ដើម្បីទៅចូលរួមកិច្ចប្រជុំនាខែកក្កដា ឆ្នាំ២០១៥ នៅ ខេត្តចំប៉ាសាក់ សាធារណៈរដ្ឋប្រជាធិបតេយ្យប្រជាមានិតឡាវនៅពេលខាងមុខ។

ឯកឧត្តម ឈាង វុន បានថ្លែងអំណរគុណចំពោះឯកឧត្ដមលេខាធិការស្ថានទូតឡាវ និងស្ថានទូត​វៀតណាម ក៏ដូចជាប្រទេស ឡាវ​ និងវៀតណាម ដែលតែងតែមាន​កិច្ចសហប្រតិបត្តិការល្អ ជាមួយកម្ពុជា​ ពិសេស​កិច្ចសហប្រតិបត្តិការ ក្នុងការរួមចំណែកអភិវឌ្ឍន៍ តំបន់ត្រីកោណ ព្រំដែន នៃប្រទេសទាំងបី កម្ពុជា ឡាវ វៀតណាម អោយមានការរីកចម្រើនឡើង៕       
អត្ថបទនិងរូបភាពពីនាយកដ្ឋានព័ត៌មាន