នាព្រឹកថ្ងៃទី២ ខែ ឧសភា ឆ្នាំ២០១៥ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និងលោកជំទាវ បានអញ្ជើញចូលរួមក្នុងពិធីបុណ្យវិសាខបូជា នៅលើភ្នំអដ្ឋរស្ស ហៅភ្នំឧតុង្គ ។
ពិធីបុណ្យវិសាខបូជា ដ៏អធិកអធមដែលមានការរៀបចំ ចម្រើនព្រះបរិត្ត សម្តែងព្រះធម៌ទេសនា និងរាប់បាត្រព្រះសង្ឃ នៅលើភ្នំអដ្ឋរស្ស ហៅភ្នំឧដុង្គនេះ ក៏មានការយាង និមន្ត អញ្ជើញ ចូលរួមពីសម្តេចព្រះអគ្គមហាសង្ឃរាជាធិបតី សម្តេចព្រះអភិសិរីសុគន្ធាមហាសង្ឃរាជាធិបតី សម្តេចព្រះសង្ឃរាជ សម្តេចព្រះសង្ឃនាយក ព្រះសង្ឃ និងថ្នាក់ដឹកនាំក្រសួង ស្ថាប័ននានា មន្ត្រីរាជការ ព្រមទាំងប្រជាពលរដ្ឋយ៉ាងច្រើនកុះករ ផងដែរ ។
នៅក្នុងឱកាសនោះ សម្តេចអគ្គមហាពញាចក្រី ហេង សំរិន និងលោកជំទាវ ព្រមទាំងពុទ្ធបរិស័ទជិតឆ្ងាយ ក៏បាននាំយកគ្រឿងសក្ការបូជា មាន ផ្កាភ្ញី ទៀន ធូប ចង្ហាន់ និងម្ហូបខ្ចប់ជាកញ្ចប់ដាក់បាត្រប្រគេនព្រះសង្ឃ ចំនួន៣០០អង្គ ដើម្បី ឧទ្ទិស កុសលផលបុណ្យជូនដល់មាតាបិតា ជីដូនជីតា ញាតកាទាំងប្រាំពីរសណ្តាន ដែលបានចែកឋានទៅកាន់លោកខាងមុខ ពិសេសឧទ្ទិសកុសលជូនដល់អ្នកដែលបាត់បង់ជីវិតក្នុងបុព្វហេតុជាតិ មាតុភូមិ និងអ្នកបាត់បង់ជីវិតក្នុងរបបប្រល័យពូជសាសន៍ប៉ុលពត សូមបានទៅកាន់សុគតិភពកុំបីឃ្លៀងឃ្លាតឡើយ ហើយសូមឱ្យគុណបុណ្យព្រះពុទ្ធ ព្រះធម៌ ព្រះសង្ឃ តាមឃុំគ្រងជួយបីបាច់ថែរក្សាប្រជាជន និងប្រទេសកម្ពុជាទាំងមូល ជួបតែសេចក្តីសុខសប្បាយ និងរីកចម្រើនតរៀងទៅ។
តាមប្រវត្តិបុណ្យវិសាខបូជា គឺជាបុណ្យមួយយ៉ាងធំ ក្នុងព្រះពុទ្ធសាសនា រាប់ថាជាពុទ្ធានុស្សរណកិច្ចដ៏សំខាន់ សម្រាប់រំលឹកដល់ ព្រះពុទ្ធសមណ គោតម បរមគ្រូ នាថ្ងៃពេញបូណ៌មី (គឺថ្ងៃ ១៥កើត) ខែពិសាខ ដែលពុទ្ធសាសនិក ទាំងព្រះសង្ឃ ទាំងគ្រហស្ថ តែងធ្វើសក្ការបូជាប្រកបដោយជំនឿថាជាមហាកុសលដ៏ប្រសើរ៕
អត្ថបទនិងរូបភាពពីនាយកដ្ឋានព័ត៌មាន
