នៅថ្ងៃទី២៥ខែមេសាឆ្នាំ២០១៥ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានដឹកនាំ គណ:ប្រតិភូជាន់ខ្ពស់រដ្ឋសភាកម្ពុជាអញ្ជើញ ទៅចូលរួមកិច្ចប្រជុំរវាងប្រមុខអាយប៉ា និងប្រមុខរដ្ឋប្រមុខរដ្ឋាភិបាលអាស៊ាន ក្នុងជំនួបកំពូលអាស៊ាន ហៅកាត់ថា (AIPA-ASEAN SUMMIT)លើកទី២៦ ដែល ប្រព្រឹត្តទៅនៅទីក្រុងកូឡាឡាំពួ ប្រទេសម៉ាឡេស៊ីចាប់ពីថ្ងៃទី២៥ដល់ថ្ងៃទី២៨ ខែមេសា ឆ្នាំ២០១៥។
អញ្ជើញជូនដំណើរសម្តេចពញាចក្រីប្រធានរដ្ឋសភា ដល់ព្រលានយន្តហោះអន្តរជាតិភ្នំពេញ មាន ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភា សមាជិក សមាជិការដ្ឋសភា និងមន្ត្រីជាន់ខ្ពស់ អគ្គលេខាធិការដ្ឋានរដ្ឋសភាជាច្រើនរូបទៀត។
ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភាបានមានប្រសាសន៍ឱ្យដឹងនៅឯ ព្រលានយន្តហោះអន្តរជាតិភ្នំពេញមុនពេលចេញដំណើរថា កិច្ចប្រជុំលើកទី២៦ខាងមុខនេះ នឹងលើកឡើងរំឭកដល់ សមាជិកទាំងអស់ក្នុងការ អនុវត្តការងារ គឺសេចក្តីសម្រេចរបស់ (AIPA)ជាសេចក្តីសម្រេចរបស់អាស៊ាន ដែលមកដល់ពេលនេះសេចក្តីសម្រេចរបស់(AIPA)មានជាង ៨០០ហើយ ចាប់តាំងពីឆ្នាំ១៩៦៧មក ក្នុងនោះសេចក្តីសម្រេចរបស់អាស៊ានមានជាង ៤០០ ដែលប្រទេសជាសមាជិកអាស៊ាន ឬក៏ AIPA ត្រូវ អនុវត្ត។ ឯកឧត្ដមបណ្ឌិតរដ្ឋបន្ថែមថា សម្តេចអគ្គមហាពញាចក្រី ហេង សំរិន នឹងចូលរួមជាមួយ ប្រធានអាយប៉ា នៃប្រទេសម៉ាឡេស៊ី ដើម្បីពិនិត្យនូវសេចក្តីព្រាងរបស់អាយប៉ា ទាំង១០ប្រទេស ហើយជ្រើសយកគំនិត ដែលដូចគ្នា ដើម្បីដាក់ជូនដល់កិច្ចប្រជុំកំពូល លើកទី២៦ នេះ។ ឯកឧត្ដមបណ្ឌិតរដ្ឋ បន្តថា ដោយឡែកកម្ពុជាយើងនឹងផ្ដោតលើបញ្ហាមួយចំនួនដូចជា ទី១- យើងនឹងលើកឡើងនូវសេចក្តីស្នើរបស់យើងលើបញ្ហាទេសចរណ៍ដើម្បីឱ្យអាស៊ានអនុវត្ត ព្រោះអាស៊ានជាអង្គការនីតិប្រតិបត្តិ ហើយ (AIPA)ជាអង្គការនីតិប្បញ្ញតិ្ត ទី២-យើងសុំឱ្យគ្រប់ប្រទេសទាំងអស់ផ្តោតការយកចិត្តទុកដាក់ចំពោះវិបត្តិធាតុអាកាសប្រែប្រួលបច្ចុប្បន្ន ដែលបង្កឲ្យមានគ្រោះធម្មជាតិ ដូចជាការឡើងកំដៅខ្លាំង ខ្យល់ព្យុះ ការលិចទូក កាណូត កប៉ាល់ ឬក៏ស៊ូណាមិជាដើម ដើម្បីឲ្យសមាជិកជួយគ្នាទៅវិញទៅមកបានទាន់ពេល និងមួយទៀតបញ្ហាជម្លោះនៅសមុទ្រចិនខាងត្បូង យើងនឹងសំណូមពរធ្វើយ៉ាងណាឱ្យគោរពច្បាប់ជាតិ ច្បាប់ក្នុងតំបន់ ធ្វើយ៉ាងម៉េចថែរក្សាឲ្យបានសុខសន្តិភាពជៀសវាងនូវអំពើហិង្សាកើតឡើង៕
អត្ថបទនិងរូបភាពពីនាយកដ្ឋានព័ត៌មាន
