ព្រឹក ថ្ងៃទី២៣ ខែមេសា ឆ្នាំ២០១៥ នៅមុខវិមានរដ្ឋសភា មានតំណាងប្រជាពលរដ្ឋមកពីរាជធានីនិងខេត្តពីរផ្សេងគ្នាបានមកជួបជុំគ្នា ដើម្បីស្នើសុំ អន្តរាគមន៍ពីរដ្ឋសភានៃព្រះរាជាណាចក្រកម្ពុជាអោយជួយដោះស្រាយបញ្ហារបស់ពួកគាត់។
លោក ញឹក ហ៊ុម តំណាងប្រជាពលរដ្ឋចំនួន៤៨គ្រួសារមកពីភូមិដីថ្មី សង្កាត់ភ្នំពេញថ្មី ខ័ណ្ឌសែនសុខ រាជធានីភ្នំពេញ បានមកស្នើសុំអោយ សម្តេចអគ្គមហាពញាចក្រី ហេង សំរិនប្រធានរដ្ឋសភានៃព្រះរាជាណាចក្រកម្ពុជា ជួយអន្តរាគមន៍ដោះស្រាយបញ្ហា ដែលប្រជាពលរដ្ឋនៅក្នុង សហគមន៍ខាងលើ ទទួលរងនូវការបណ្តេញចេញពីទីតាំងរបស់ខ្លួន ដោយក្រុមហ៊ុន ម៉ោងបេស្សអ៊ីនហ្រ្វេស្រ្តាក់ឈ័រ។
ចំណែកឯមួយក្រុមទៀត តំណាងប្រជាពលរដ្ឋរងគ្រោះដោយការបូមខ្សាច់ ជាង៣០០គ្រួសារ នៅភូមិកោះស្រឡៅ ឃុំកោះកាពិ ស្រុកកោះកុង ខេត្តកោះកុង បានមកស្នើសុំអោយរដ្ឋសភា ជួយអន្តរាគមន៍បញ្ឈប់ការបូមខ្សាច់អនាធិបតេយ្យ នៅបរិវេណសហគមន៍របស់ពួកគាត់រស់នៅ។
តំណាងប្រជាពលរដ្ឋទាំងពីរក្រុម ត្រូវបានអនុញ្ញាតឲ្យចូលមកដាក់ញត្តិ នៅ គណៈកម្មការ សិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភានៃរដ្ឋសភា ដើម្បីគណៈកម្មការពិនិត្យនិងរៀបចំបញ្ជូនទៅសម្តេចអគ្គមហាពញាចក្រី ហេង សំរិនប្រធានរដ្ឋសភា ជួយធ្វើអន្តរាគមន៍ទៅផ្នែកពាក់ព័ន្ធបន្តទៀត៕
អត្ថបទនិងរូបភាពពីនាយកដ្ឋានព័ត៌មាន