នៅថ្ងៃទី២១ ខែមេសា ឆ្នាំ២០១៥ គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ដឹកនាំដោយ ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការ បានប្រជុំផ្ទៃក្នុងគណៈកម្មការ ដើម្បីពិនិត្យលើ សេចក្តីព្រាងច្បាប់ស្តីពីការទូទាត់ថវិកាទូទៅ របស់រដ្ឋសម្រាប់ការគ្រប់គ្រង ឆ្នាំ២០១៣ នៅ វិមានរដ្ឋសភា។
ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការ បានមានប្រសាសន៍ថា សេចក្តីព្រាងច្បាប់ ស្តីពីការទូទាត់ថវិកាទូទៅ របស់រដ្ឋសម្រាប់ការ គ្រប់គ្រង ឆ្នាំ២០១៣ គឺជាការឆ្លុះបញ្ចាំងអំពីលទ្ធផល នៃការអនុវត្តច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៣។ ហើយសេចក្តីព្រាងច្បាប់នេះ ត្រូវបានរៀបចំ ឡើងដោយគោរពទាំងស្រុង ទាំងកាលវសាន ទាំងខ្លឹមសារ នៃមាត្រា៧៨នៃច្បាប់ ស្តីពីប្រព័ន្ធហិរញ្ញវត្ថុ សាធារណៈ ដោយផ្អែកលើការបូកសរុបទិន្នន័យ ចំណូល និងចំណាយថវិកា ដែលត្រូវបានកត់ត្រាដោយ គណនេយ្យករសាធារណៈ និងការផ្ទៀងផ្ទាត់អំពីភាពត្រឹមត្រូវ នៃទិន្នន័យទាំងនេះជាមួយអណាប័ក ពាក់ព័ន្ធ ទាំងក្នុងកម្រិតថវិកាថ្នាក់ជាតិ និងរដ្ឋបាលថ្នាក់ក្រោមជាតិ។
ឯកឧត្តមបណ្ឌិតរដ្ឋបន្តថា ជាលទ្ធផលសេចក្តីព្រាងច្បាប់នេះ បានបង្ហាញពីការសម្រេចបាននូវសមិទ្ធផលការងារ សំខាន់ៗ ក្នុងការអនុវត្តគោលនយោបាយនិងវិធានការពាក់ព័ន្ធនានា របស់រាជរដ្ឋាភិបាល ក្នុងក្របខ័ណ្ឌម៉ាក្រូសេដ្ឋកិច្ច និងក្របខ័ណ្ឌថវិកាឆ្នាំ២០១៣។
សូមបញ្ជាក់ថា សេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៣ មាន៣ជំពូក ចែកចេញជា១១មាត្រា៕
អត្ថបទនិងរូបភាពពីនាយកដ្ឋានព័ត៌មាន