ឯកឧត្តម កឹម សុខា អនុប្រធានទី១ រដ្ឋសភា នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់បើកសិក្ខាសាលា ស្តីពី វិធានការកំណែទម្រង់ ប្រពន័្ធអប់រំនៅកម្ពុជា រៀបចំដោយគណៈកម្មការ អប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា នាព្រឹកថ្ងៃទី៣១ ខែមីនា ឆ្នាំ២០១៥ នៅវិមានរដ្ឋសភា។
ក្នុងសុន្ទរកថាចាប់អារម្មណ៍របស់ឯកឧត្ដម យ៉ែម បុញ្ញឫទ្ធិ ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា បានលើកឡើងថា បន្ទាប់ពីគណៈកម្មការទី៧ បានសិក្សាស្រាវជ្រាវរកព័ត៌មាន ពាក់ព័ន្ធនឹងវិស័យអប់រំ គ្រប់កម្រិត នៅកម្ពុជា និងបានចុះសិក្សាស្វែងយល់ផ្ទាល់ជាមួយស្ថាប័នពាក់ព័ន្ធនឹងវិស័យអប់រំជាច្រើនកន្លងមក គណៈកម្មការទី៧ក៏សម្រេចរៀបចំសិក្ខាសាលានេះឡើង ដើម្បីស្ដាប់មតិយោបល់ ទាំងភាពរីកចម្រើន ភាពវិជ្ជមាន ភាពអសកម្ម ទាំងបញ្ហាប្រឈម ដើម្បីរកវិធានការ សមស្របដោះស្រាយបញ្ហា និងជម្រុញលើកកម្ពស់គុណភាពវិស័យអប់រំ ដែលជាមូលដ្ឋានគ្រឹះ ក្នុងការផលិត ធនធានមនុស្ស នៅកម្ពុជា។
នៅក្នុងសុន្ទរកថាបើកអង្គសិក្ខាសាលា ឯកឧត្តម កឹម សុខា អនុប្រធានទី១រដ្ឋសភា បានសម្តែងការកោតសរសើរចំពោះស្ថាប័ននីតិប្បញ្ញតិ្ត ក៏ដូចជាគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា ដែលបានផ្តួចផ្តើមគំនិត រៀបចំសិក្ខាសាលាដ៏មានសារៈសំខាន់ស្តីពី វិធានការកំណែទម្រង់ប្រពន័្ធអប់រំនៅកម្ពុជា នេះឡើង។
ឯកឧត្តម កឹម សុខា បានមានប្រសាសន៍បន្តថា វិស័យអប់រំនៅព្រះរាជាណាចក្រកម្ពុជា ត្រូវបានគេទទួលស្គាល់ថា មានការលូតលាស់ រីកចម្រើនទាំងគុណភាព ទាំងក្រមសីលធម៌វិជ្ជាជីវៈ ទាំងអគារសិក្សា ទាំងបុគ្គលិកសិក្សា ទាំងប្រាក់បៀវត្សរ៍សមរម្យ ថៃ្លថ្នូរ នៅក្នុង ទស្សវត្សរ៍ ៦០ ក្រោមការដឹកនាំរបស់សម្តេច ព្រះ នរោត្តម សីហនុ ព្រះបរមរតនកោដ្ឋ ។ ហើយក្រោយមកវិស័យអប់រំនៅប្រទេសកម្ពុជា មានការធ្លាក់ចុះ ទាំងគុណភាពសិក្សា ទាំងការបោះបង់ចោលការសិក្សារបស់សិស្ស និស្សិត ជាពិសេសគឺនៅក្នុងរបបកម្ពុជាប្រជាធិបតេយ្យ ដែលត្រូវបានកំទេច វិស័យអប់រំ ឲ្យក្លាយទៅជាផេះផង់ ដែលប្រទេសនានាលើ សកលលោកចាត់ទុកថាវិស័យអប់រំ ជាមូលដ្ឋានគ្រឹះ ដ៏សំខាន់មួយ សម្រាប់ ប្រទេសជាតិនីមួយៗ។ ហើយ បច្ចុប្បន្ននេះវិស័យអប់រំចាប់ផ្តើមមានការអភិវឌ្ឍន៍រីកចម្រើនគួរឲ្យកត់សម្គាល់ ក៏ប៉ុនែ្ត តម្រូវឲ្យយើងសិក្សា សែ្វងយល់ពីភាពអសកម្ម ភាពខ្វះខាត ដើម្បីកែលម្អ ផ្តល់ឱកាសឲ្យសិស្ស និស្សិត យើងបានទទួល ចំណេះវិជ្ជា ចំណេះជំនាញពិត ក្នុងការចូលរួមចំណែកអភិវឌ្ឍន៍ប្រទេសជាតិ។
ឯកឧត្តម កឹម សុខា បានលើកឡើងទៀតថា យោងតាមរបាយការណ៍មួយចំនួនបានបង្ហាញឲ្យឃើញថានៅអំឡុងឆ្នាំ២០១៣ ការបោះបង់ ការសិក្សានៅមានកម្រិតខ្ពស់ លើសពីនោះទៅទៀតគុណភាពអប់រំ ក៏ពុំទាន់បានឈានទៅដល់ស្តង់ដារ ក្នុងកម្រិតតំបន់និងអន្តរជាតិ នៅឡើយ។
ឯកឧត្តមអនុប្រធានទី១ រដ្ឋសភាបញ្ជាក់ថា មានកត្តាជាច្រើនដែលធ្វើអោយមានកង្វះខាត ដូចនេះហើយ យើងយល់ឃើញថា ការរៀបចំសិក្ខាសាលានេះ មានសារៈសំខាន់ណាស់ ក្នុងការជជែកពិភាក្សា ស្វែងរកដំណោះស្រាយល្អៗ ដើម្បីធ្វើអោយការវិនិយោគក្នុងវិស័យអប់រំ មានប្រសិទ្ធផល និងប្រសិទ្ធភាពខ្ពស់ ហើយឯកឧត្ដមសង្ឃឹមយ៉ាងមុតមាំថាសិក្ខាសាលានេះនឹងផ្ដល់ផលជាវិជ្ជមានក្នុងកាចូលរួមធ្វើកំណែទម្រង់ប្រព័ន្ធអប់រំនៅកម្ពុជាយើង។
សូមបញ្ជាក់ថាអង្គសិក្ខាសាលា ស្តីពីវិធានការកំណែទម្រង់ប្រពន័្ធអប់រំនៅកម្ពុជា មានការចូលរួមពីសំណាក់ឯកឧត្ដមលោកជំទាវ ជាសមាជិក សមាជិកានៃរដ្ឋសភា ឯកឧត្ដម ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ព្រមទាំងអស់លោក លោកស្រី តំណាងអង្គការ ដៃគូរអភិវឌ្ឍន៍ជាតិ និងអន្តរជាតិនិងសាកលវិទ្យាល័យនានានៅកម្ពុជា៕
អត្ថបទនិងរូបភាពពីនាយកដ្ឋានព័ត៌មាន