កាលពីព្រឹកថ្ងៃទី៣០ ខែមីនា ឆ្នាំ២០១៥ នៅសណ្ឋាគារឡឺរ៉ូយ៉ាល់ នាទីក្រុងភ្នំពេញ បានប្រារព្ធកិច្ចពិភាក្សាផ្លាស់ប្តូរយោបល់ ស្តីពីក្រុមគណបក្ស នយោបាយក្នុងសភា ក្រោមអធិបតីភាព ឯកឧត្តម ឡេង ប៉េងឡុង អគ្គលេខាធិការរដ្ឋសភា ឯកឧត្តម ប៊ីល ឡងហ៊ត ( Bill Longhurst ) ឯកអគ្គរាជទូតអង់គ្លេស ប្រចាំ កម្ពុជា លោកជំទាវ ហ៊្គូសស៊ីយ៉ា ម៉ាកប្រីក ( Gosia McBride ) មន្ត្រីជាន់ខ្ពស់នៃសភាអង់គ្លេស និងមានការចូលរួមពី ឯកឧត្តមលោកជំទាវ ជាសមាជិក សមាជិការដ្ឋសភា ដែលមានអាសនៈនៅក្នុងរដ្ឋសភាកម្ពុជាចូលរួម។កម្មវិធីនេះរៀបចំដោយអគ្គលេខាធិការដ្ឋាន រដ្ឋសភា និងមានការឧបត្ថម្ភពីស្ថានទូតអង់គ្លេសប្រចាំនៅ ព្រះរាជាណាចក្រកម្ពុជា។
ថ្លែងក្នុងកិច្ចពិភាក្សា ឯកឧត្តម ឡេង ប៉េងឡុង បានមានប្រសាសន៍ថា៖ ឯកឧត្តម សូមស្វាគមន៍ និងថ្លែងអំណរគុណដល់ស្ថានទូតអង់គ្លេសប្រចាំ នៅព្រះរាជាណាចក្រកម្ពុជា ដែលបានឧបត្ថម្ភអោយមានកិច្ចពិភាក្សាផ្លាស់ប្តូរយោបល់ ស្តីពីក្រុមគណបក្សនយាបាយក្នុងសភា នេះឡើង ដើម្បីជួយ សមាជិកសភា ក្នុងការកសាងសមត្ថភាពផ្ទាល់ខ្លួនរបស់ពួកគាត់ អោយមានគំនិតថ្មីសិក្សាស្វែងយល់ ពីព្រឹទ្ធសភាអង់គ្លេស ដែលនឹងអាចយកមក អនុវត្ត សម្រាប់ប្រទេសកម្ពុជា ហើយភាគីទាំងពីរអាចរៀនសូត្រ ពីគ្នាទៅវិញទៅមក ស្តីពីគណបក្សនយោបាយក្នុងសភា។ ម្យ៉ាងវិញទៀតកិច្ចពិភាក្សានេះដើម្បី ធ្វើការ លើគម្រោងការកសាងសមត្ថភាព ចក្រភពអង់គ្លេស និងប្រទេសកម្ពុជា បានជួបប្រជុំគ្នាជាមួយសមាជិកជាន់ខ្ពស់ រវាងភាគី ទាំងពីរ និង អង្គការ នានា ធ្វើការយ៉ាងជិតស្និទ្ធ ដោយមានកិច្ចសហប្រតិបត្តិការល្អ ដើម្បីពិភាក្សាអំពី នីតិវិធី ការងារនៅក្នុងសភាអង់គ្លេស និងស្វែងយល់ពីយុទ្ធវិធី ដែល សមាជិកសភាកម្ពុជាអាចធានាថា សភាកម្ពុជា បានដំណើរការប្រកបដោយប្រសិទ្ធភាព និងតម្លាភាពលើការងារ មានលក្ខណៈ អព្យាក្រិត្យ និង ប្រជាធិបតេយ្យ ពិតប្រាកដ។
អត្ថបទនិងរូបភាពពីនាយកដ្ឋានព័ត៌មាន
