គណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ដឹកនាំដោយ ឯកឧត្ដមបណ្ឌិតរដ្ឋ ជាម យៀប ប្រធានគណៈកម្មការ បានជួប ពិភាក្សាការងារជាមួយ លោក មុំ គង់ នាយកប្រតិបត្តិអង្គការសម្ព័ន្ធដើម្បីសុខភាពកម្ពុជា ក្នុងគោលបំណងស្វែងយល់ពីសេចក្តីព្រាងច្បាប់ ស្តីពីផលិត ផល ថ្នាំជក់ នាព្រឹកថ្ងៃទី២៦ ខែមីនា ឆ្នាំ២០១៥ នៅវិមានរដ្ឋសភា។
ឯកឧត្ដមបណ្ឌិតរដ្ឋ ជាម យៀប បានមានប្រសាសន៍ថា ថ្នាំជក់ជាមូលហេតុចម្បងដែលនាំឲ្យកើតជំងឺមហារីក។ ជារៀងរាល់ឆ្នាំ ថ្នាំជក់បានសម្លាប់ មនុស្សប្រមាណ៦លាននាក់ នៅលើពិភពលោក។ ដោយឡែកនៅកម្ពុជា ជារៀងរាល់ថ្ងៃមានមនុស្សជិត៣០នាក់ ស្លាប់ដោយសារជំងឺដែលទាក់ទង ទៅនឹងការប្រើប្រាស់ ថ្នាំជក់ ហើយភាគច្រើននៃអ្នកស្លាប់ទាំងនោះស្ថិតក្នុងវ័យកំពុងពេញកម្លាំងពលកម្ម។ ម្យ៉ាងវិញទៀតទឹកប្រាក់ជិត ១០០លានដុល្លារ ត្រូវបានប្រើសម្រាប់ទិញបារីជក់ក្នុង១ឆ្នាំៗ នៅប្រទេសកម្ពុជា។
ឯកឧត្តមបន្តថា ព្រះរាជាណាចក្រកម្ពុជា បានចូលជាសមាជិករដ្ឋភាគីនៃអនុសញ្ញាស្ដីពីការត្រួតពិនិត្យ ថ្នាំជក់របស់អង្គការសុខភាព ពិភពលោក នៅថ្ងៃទី ១៥ ខែវិច្ឆិកា ឆ្នាំ២០០៥ ហើយអនុសញ្ញានេះ បង្កើតឡើងដើម្បីការពារមនុស្សជំនាន់បច្ចុប្បន្ន និងជំនាន់ក្រោយពីមហន្តរាយសុខភាព បរិស្ថាន និងសេដ្ឋកិច្ច ដែលបង្កដោយការប្រើប្រាស់ថ្នាំជក់ ដូច្នេះហើយទើបរាជរដ្ឋាភិបាលបានសម្រេច រៀបចំសេចក្តីព្រាងច្បាប់ស្តីពីការត្រួតពិនិត្យផលិតផលថ្នាំជក់ នេះឡើង ក្នុងគោលបំណងកំណត់វិធានការ ដើម្បីត្រួតពិនិត្យផលិតផលថ្នាំជក់ និងកាត់បន្ថយផលប៉ះពាល់នានា។ សេចក្តីព្រាងច្បាប់នេះមាន១៣ជំពូក រួមមាន៤៩មាត្រា។
លោក មុំ គង់ នាយកប្រតិបត្តិអង្គការសម្ព័ន្ធដើម្បីសុខភាពកម្ពុជា បានមានប្រសាសន៍ថា សេចក្តីព្រាងច្បាប់ថ្មីនេះពិតជារួមចំណែកយ៉ាងសំខាន់ ក្នុងការកាត់បន្ថយហានិភ័យសុខភាពបង្កដោយថ្នាំជក់រឺបារី។ លោកបន្តថាយុវជនកម្ពុជា៩៩ភាគរយ សំណូមពរឲ្យរាជរដ្ឋាភិបាលកម្ពុជាមានច្បាប់ស្តីពីការត្រួតពិនិត្យថ្នាំជក់អោយបានឆាប់រហ័ស ហើយ៨៦ភាគរយ នៃយុវជនកម្ពុជា សូមអោយមានការតំឡើងពន្ធលើផលិផលថ្នាំជក់ ដែលជាការជួយបង្កើនចំណូលពន្ធរដ្ឋផង និងជួយអ្នកជក់អោយផ្តាច់បារីផងដែរ។
លោក មុំ គង់ ក៏បានថ្លែងអំណរគុណយ៉ាងខ្លាំង ចំពោះឯកឧត្តមបណ្ឌិតរដ្ឋ ដែលបានចំណាយពេលវេលា ជួបពិភាក្សាជាមួយលោកនាពេលនេះ ហើយ លោក ក៏បានសំណូមពរ ឯកឧត្តមបណ្ឌិតរដ្ឋ ជួយជំរុញច្បាប់នេះដាក់ចូលសម័យប្រជុំសភាពេញអង្គអោយបានឆាប់ នាពេលខាងមុខនេះផងដែរ៕
អត្ថបទនិងរូបភាពពីនាយកដ្ឋានព័ត៌មាន
