ក្នុងខណៈដែលពិធីបុណ្យចូលឆ្នាំថ្មី ប្រពៃណីជាតិនឹងចូលមកដល់ក្នុងពេលឆាប់ៗខាងមុខនេះ សម្ព័ន្ធឧស្សាហកម្មកៅស៊ូវៀតណាម បានចូលសម្តែងការគួរសម និងជូនពរចំពោះ ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភា នៃព្រះរាជាណាចក្រកម្ពុជា នាពេលព្រឹកថ្ងៃទី២៦ ខែមីនា ឆ្នាំ២០១៥។
ជាមួយកន្រ្តកផ្កានិងសារជូនពរ ឯកឧត្តម TRAN NGOC THUAN សមាជិកសភាវៀតណាម និង ជាអគ្គនាយកសម្ព័ន្ធឧស្សាហកម្មកៅស៊ូ វៀតណាម ព្រមទំាងសហការី បានជូនពរ ឯកឧត្តមបណ្ឌិត ងួន ញ៉ិល មានសុខភាពល្អ កម្លំាងកាយមំាមួន ដើម្បីចូលរួមដឹកនាំស្ថាប័នរដ្ឋសភាតទៅមុខទៀត។
ឯកឧត្តមបណ្ឌិតអនុប្រធានទី២នៃរដ្ឋសភា បានសម្តែងការកោតសរសើរចំពោះ សម្ព័ន្ធឧស្សាហកម្មកៅស៊ូវៀតណាម ដែលបានចូលរួមចំណែក ជួយកសាង ហេដ្ឋារចនាសម្ព័ន្ធ សង្គមកម្ពុជា ជាច្រើន មានដូចជាផ្លូវ សាលារៀន និងបង្កើតការងារ ជូនប្រជាពលរដ្ឋកម្ពុជានៅក្នុងខេត្តកំពង់ធំ និងខេត្តមួយចំនួនទៀត ដែលក្រុមហ៊ុនវៀតណាម បានបណ្តាក់ទុនវិនិយោគ៕