ឯកឧត្តម បណ្ឌិត ងួន ញ៉ិល អនុប្រធានទី២ រដ្ឋសភានៃព្រះរាជាណាចក្រកម្ពុជា ជាតំណាងដ៏ខ្ពង់ខ្ពស់ របស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅថ្ងៃពុធ ទី២៥ ខែមីនា ឆ្នាំ២០១៥ វេលាម៉ោង ១៤និង៣០នាទីរសៀល បានអញ្ជើញដឹកនាំ សមាជិក គណៈកម្មាធិការអចិន្ត្រៃយ៍រដ្ឋសភា ទៅកាន់ស្ថានទូត សឹង្ហបុរី ប្រចាំកម្ពុជា ដើម្បីចូលរួមរំលែកទុក្ខដ៏ក្រៀមក្រំ ជាមួយរដ្ឋសភា រដ្ឋាភិបាល និងប្រជាជនសឹង្ហបុរី ព្រមទាំងក្រុមគ្រួសារ ចំពោះមរណភាពរបស់ ឯកឧត្តម លី ក្វាន់យូ ដែលជាបិតាស្ថាបនិក និងជានាយករដ្ឋមន្ត្រី លើកដំបូង របស់ប្រទេសសឹង្ហបុរី ដែលបានទទួលមរណភាព កាលពីថ្ងៃចន្ទទី២៣ខែមីនាឆ្នាំ២០១៥។
នៅក្នុងសារ ចូលរួមរំលែកមរណៈទុក្ខរបស់ ឯកឧត្តមបណ្ឌិត ងួន ញ៉ិល ដែលតំណាងឲ្យរដ្ឋសភានៃព្រះរាជាណាចក្រកម្ពុជាបានវាយតម្លៃយ៉ាងខ្ពស់បំផុត ចំពោះគុណបំណាច់ដ៏ធំធេង របស់ ឯកឧត្តម លី ក្វាន់យូ ជាវីរៈបុរសស្ថាបនិក និងជានាយករដ្ឋមន្ត្រីលើកដំបូងរបស់ប្រទេសសឹង្ហបុរី ដ៏ឆ្នើមមួយរូប ដែលបានកសាងគ្រឹះដ៏រឹងមាំ នៃការរីកចម្រើនរបស់សឹង្ហបុរី ហើយជោគជ័យរបស់លោកបានក្លាយជា គំរូក្នុងការដឹកនាំប្រទេសរបស់ប្រជាជាតិ ដែលកំពុងរីកចំរើនទាំងឡាយលើសកលលោក។ ស្នាដៃរបស់ ឯកឧត្ដម លី ក្វាន់យូ គឺជា ការប្រាថ្នាចង់បានរបស់អ្នកនយោបាយកំពូលៗគ្រប់រូប ប៉ុន្តែកម្របានឃើញអ្នកនយោបាយណា ទទួលជោគជ័យដ៏ធំធេងដូច ឯកឧត្ដម ឡើយ។
ឯកឧត្តមអនុប្រធានទី២ នៃរដ្ឋសភាកម្ពុជា សូមបួងសួងដល់គុណបុណ្យព្រះរតនត្រៃសូមអោយវិញ្ញាណក្ខន្ធ ឯកឧត្ដម លី ក្វាន់យូ បានទៅកាន់សុគតិភព ជានិច្ចនិរន្ត កុំបីឃ្លៀងឃ្លាតឡើយ។
អត្ថបទនិងរូបភាពពីនាយកដ្ឋានព័ត៌មាន