លោកជំទាវ ឡោក ខេង សមាជិកគណៈកម្មការ សិទ្ធិមនុស្ស ទទួលពាក្យបណ្តឹង ទំនាក់ទំនង រដ្ឋសភា ព្រឹទ្ធសភានៃរដ្ឋសភា រួមជាមួយ ឯកឧត្តម យ៉ង់ សែម តំណាងគណៈកម្មការសិទ្ធិមនុស្ស ទទួលពាក្យបណ្តឹង ទំនាក់ទំនង រដ្ឋសភា ព្រឹទ្ធសភា នៃព្រឹទ្ធសភា បានអញ្ជើញចូលរួម សិក្ខាសាលាថ្នាក់តំបន់ស្តីពីសិទ្ធិមនុស្សនៅប្រទេសហ្វីលីពីន។
អង្គសិក្ខាសាលានេះបានប្រារព្ធធ្វើចាប់ពី ថ្ងៃទី២៦ ដល់ ថ្ងៃទី២៨ ខែកុម្ភៈ ឆ្នាំ២០១៥ នៅទីក្រុងម៉ានីលប្រទេសហ្វីលីពីន។
យោងតាមប្រសាសន៍ លោកជំទាវ ឡោក ខេង នៅក្នុងសន្និសីទសារព័ត៌មាននៅព្រលានយន្ត ហោះអន្តរជាតិភ្នំពេញបានអោយដឹងថា សិក្ខាសាលានេះ មានគោលបំណងបណ្តុះបណ្តាលសមាជិក សមាជិការដ្ឋសភា ព្រឹទ្ធសភា នៅក្នុងតំបន់ ចូលរួមត្រួតពិនិត្យពីស្ថានភាព សិទ្ធិមនុស្ស របស់រដ្ឋាភិបាលនិងអង្គការសង្គមស៊ីវិល ស្តីពីស្ថានភាពសិទ្ធិមនុស្សនៅក្នុងប្រទេសនីមួយៗ ដែលជាសមាជិកហត្ថលេខីនៃអង្គការសហប្រជាជាតិ មុននឹងរបាយការណ៍ស្តីពី ស្ថានភាពសិទ្ធិមនុស្ស ដែលតំណាងអង្គការសហប្រជាជាតិតាមប្រទេសនីមួយៗបញ្ចេញរបាយការណ៍សិទ្ធិមនុស្សរបស់ខ្លួន។ លោកជំទាវបានបន្ថែមថា សិក្ខាសាលានេះមានប្រទេសជាសមាជិកចំនួន១៩ចូលរួមនិងមាន កម្មវិធីសំខាន់ៗចំនួន៧ ដោយផ្តោតលើ៤ចំនុចជាអាទិភាពគឺ ១-សមាជិក សមាជិកា រដ្ឋសភា ព្រឹទ្ធសភា ពង្រឹងសមត្ថភាពលើកកម្ពស់សិទ្ធិមនុស្សតាម បណ្តាប្រទេសនីមួយៗដែលជាសមាជិកអង្គការសហប្រជាជាតិ។ ២-នៅពេលរបាយការណ៍អង្គការសហប្រជាជាតិ រៀងរាល់៤ឆ្នាំម្តង រដ្ឋាភិបាល រដ្ឋសភា ព្រឹទ្ធសភា និង អង្គការសង្គមស៊ីវិលត្រូវផ្ទៀងផ្ទាត់លើរបាយការណ៍រួម។ ៣-ចូលរួមធ្វើអោយ សម្រេចគោលដៅសហស្សវត្សរ៍របស់អង្គការសហប្រជាជាតិដោយលើកកម្ពស់សិទ្ធិស្រ្តី បង្កើនសមត្ថភាព សុខុមាលភាពសេដ្ឋកិច្ចស្ត្រី អនុវត្តន៍អនុសញ្ញាស៊ីដ។ ៤-គោរពសិទ្ធិជនជាតិភាគតិច៕