នារសៀល ថ្ងៃទី២៦ ខែកុម្ភៈ ឆ្នាំ២០១៥ នៅវិមានរដ្ឋសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានទទួលជួបសវនាការជាមួយ ឯកឧត្ដម ជុំម៉ាលី សៃយ៉ាសន (HEMr. Choumaly Sayasone) ប្រធានរដ្ឋ នៃសាធារណរដ្ឋ ប្រជាធិបតេយ្យប្រជាមានិតឡាវ ។
នៅក្នុងកិច្ចសវនាការ ជាមួយនឹងការកោតសរសើរគោលនយោបាយ បង្រួបបង្រួមជាតិរបស់ប្រទេសកម្ពុជា ឯកឧត្តម ជុំម៉ាលី សៃយ៉ាសន ប្រធានរដ្ឋឡាវ បានកត់សំគាល់ថា ជាធម្មតាប្រទេសដែលកាន់លិទ្ធិប្រជាធិបតេយ្យ តែងតែមានបក្សច្រើន ដូច្នេះគោលនយោបាយបង្រួបបង្រួមជាតិ ជាចំនុចសំខាន់ដែលបក្សនីមួយៗ ត្រូវតែរួមគ្នា កសាងអភិវឌ្ឍន៍ប្រទេសជាតិអោយមានការីកចម្រើនឡើង។ ទន្ទឹមនឹងនោះឯកឧត្តម ប្រធានរដ្ឋ ក៏បានអបអរសាទរ ផងដែរចំពោះជោគជ័យ របស់រាជរដ្ឋាភិបាល ក៏ដូចជារដ្ឋសភាកម្ពុជា ដែលសម្រចបានលើការកសាងអភិវឌ្ឍន៍ប្រទេស គួរឲ្យកត់សំគាល់។ ឯកឧត្តម ជុំម៉ាលី សៃយ៉ាសន ក៏បានជម្រាបជូនសម្ដេចប្រធានរដ្ឋសភា ពីស្ថានភាពវិវត្តថ្មីៗ នៅប្រទេសឡាវ ថា សាធារណរដ្ឋប្រជាធិបតេយ្យប្រជាមានិតឡាវ កំពុងអនុវត្តន៍គោលនយោបាយ ផែនការយុទ្ធសាស្រ្តសេដ្ឋកិច្ចសង្គម អោយមានការអភិវឌ្ឍន៍ ដោយឈរលើ មុខព្រួញសំខាន់បី ១-ខេត្តជាគោលដៅយុទ្ធសាស្រ្ត ២-ស្រុកជាមុខព្រួញផែនការ ៣-ភូមិជាមុខព្រួញអភិវឌ្ឍន៍។
នៅក្នុងឱកាសនោះដែរ សម្តេចអគ្គមហាពញាចក្រី ហេង សំរិន បានស្វាគមន៍និងអបអរសាទរ ចំពោះដំណើរទស្សនកិច្ច របស់ឯកឧត្តម ប្រធានរដ្ឋឡាវ ដោយបានបន្តរពង្រឹងចំណងមិត្តភាព សាមគ្គីភាព ជាប្រពៃណី និងកិច្ចសហប្រតិបត្តិការល្អរវាងកម្ពុជា ឡាវ អោយកាន់តែ ប្រសើរឡើង។ សម្តេច បានបន្តថា ឡាវគឺជាមិត្តចាស់ដ៏ជិតស្និតរបស់កម្ពុជា ហើយសម្តេចសូមវាយតម្លៃខ្ពស់ ចំពោះដំណើរទស្សនកិច្ចរបស់ឯកឧត្តមប្រធានរដ្ឋ ដែលធ្វើអោយ សម្ព័នមេត្រីភាព រវាងប្រទេសទាំងពីរ កម្ពុជា-ឡាវ កាន់តែរឹងមាំថែមទៀតនេះ។ ទន្ទឹមនឹងនោះ សម្តេចអគ្គមហាពញាចក្រី ប្រធានរដ្ឋសភា ក៏បានសម្ដែងនូវការគាំទ្រ ចំពោះកិច្ចព្រមព្រៀងទាំងឡាយ របស់រដ្ឋាភិបាលនៃប្រទេសទាំងពីរ ដែលនាំមកនូវផលប្រយោជន៍ជូនប្រជាជន ទាំងសងខាង(កម្ពុជា-ឡាវ) អោយមានការរីកចម្រើនឡើង៕
អត្ថបទនិងរូបភាពពីនាយកដ្ឋានព័ត៌មាន
