គណ:ប្រតិភូ គណ:កម្មការអង្កេត បោសសំអាត និងប្រឆាំងអំពើពុករលួយនៃរដ្ឋសភាដឹកនាំដោយ ឯកឧត្តម ហូរ វ៉ាន់ ប្រធានគណ:កម្មការ បានអញ្ជើញចុះបំពេញបេសកកម្មនៅខេត្តក្រចេះ ខេត្តត្បូងឃ្មុំ និងខេត្តកំពង់ចាម ចាប់ពី ថ្ងៃទី២៥ ដល់ ថ្ងៃទី២៧ ខែកុម្ភៈ ឆ្នាំ២០១៥។
ក្នុងដំណើរបំពេញបេសកកម្មនា ថ្ងៃទី២៥ ខែកុម្ភ:ឆ្នាំ២០១៥ គណ:ប្រតិភូបានចុះជួបប្រជាពលរដ្ឋ៤១គ្រួសារ ដែលមានទំនាស់ដីធ្លី នៅភូមិឃ្សឹម ឃុំស្នួល ស្រុកស្នួល ខេត្តក្រចេះ។ បន្ទាប់មកគណ:ប្រតិភូ បានចុះជួបសំណេះសំណាល ជាមួយថ្នាក់ដឹកនាំគយនិងរដ្ឋាករនៅច្រកអន្តរជាតិ ត្រពាំងស្រែ ស្ថិតក្នុងឃុំ២ធ្នូ ស្រុកស្នួល ខេត្តក្រចេះ ដើម្បីស្វែងយល់ពីការប្រមូលពន្ធ លើការនាំចេញនាំចូល ទំនិញតាមច្រកនេះ។ ក្នុងឱកាសនោះ ឯកឧត្តម ហូរ វ៉ាន់ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំនិងមន្ត្រីគយ ទាំងអស់ ក្នុងការប្រមូលពន្ធជូនរដ្ឋ។ ជាមួយនេះ ឯកឧត្តម បានស្នើអោយថ្នាក់ដឹកនាំគយយកចិត្តទុកដាក់ ក្នុងការជួយបង្កភាពងាយស្រួល ដល់ ប្រជាពលរដ្ឋក្នុងការនាំទំនិញចេញចូល។
សូមបញ្ជាក់ថា ក្នុងដំណើរបំពេញបេសកកម្មរបស់គណ:ប្រតិភូគណៈកម្មការទី១០ នាពេលនេះ ក៏នឹងមានការចុះទៅពិនិត្យស្វែងយល់ការងារនៅ សាខាគយច្រកដា សាខាគយច្រកអន្តរជាតិត្រពាំងផ្លុង ស្ថិតក្នុងស្រុកមេមត់ហើយនឹងជួបពិភាក្សាការងារជាមួយគណ:អភិបាល នៃខេត្តត្បូងឃ្មុំ និងគណ:អភិបាលខេត្តកំពង់ចាមផងដែរ។
