នាព្រឹកថ្ងៃទី២៣ ខែកុម្ភៈ ឆ្នាំ២០១៥ នៅវិមានរដ្ឋសភា សម្ដេចអគ្គមហាពញ្ញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឲ្យ ឯកឧត្តម អេវហ្គឺនី ស្តេតាណូវ ស្តយឆេវ ( Evgueni stetanev stoychev ) ឯកអគ្គរដ្ឋទូតដែលទើបទទួលការតែងតាំងថ្មី នៃសាធារណរដ្ឋប៊ុលហ្គារី ប្រចាំនៅ ព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម ចូលជួប សម្ដែងការគួរសម និងធ្វើសវនាការ ។
នៅក្នុងសវនាការភាគីទាំងពីរបានផ្ដោតការពិភាក្សា ទៅលើការពង្រឹងកិច្ចសហប្រតិបត្តិការ ដែលមានតាំងពីយូរមកហើយនោះ ឲ្យកាន់តែល្អប្រសើរឡើង ថែមទៀត ទាំងស្ថាប័ននីតិប្រតិបត្តិ និងស្ថាប័ននីតិប្បញ្ញត្តិ ហើយនៅចុងឆ្នាំ២០១៥នេះ ក្នុងដំណើរទស្សនកិច្ចរបស់ រដ្ឋមន្ត្រីក្រសួងសេដ្ឋកិច្ចប៊ុលហ្គារី មកកាន់កម្ពុជា ក៏នឹងមានការចុះអនុស្សារណៈយោគយល់គ្នា (MOU) ជាមួយក្រសួងពាណិជ្ជកម្មនៃ ព្រះរាជាណាចក្រកម្ពុជាផងដែរ។
ជាមួយនឹងការអបអរសាទរ ការថ្លែងអំណរគុណ និងការវាយតម្លៃខ្ពស់របស់ សម្ដេចអគ្គមហាពញ្ញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ចំពោះប្រទេសប៊ុលហ្គារីដែលបានជួយដល់ប្រទេសកម្ពុជាតាំងពីឆ្នាំ១៩៧៩ រហូតមក និងដល់ដើមទស្សវត្សរ៍ ឆ្នាំ១៩៩០ ក៏បានចូលរួមជាមួយកងកម្លាំងរក្សាសន្តិភាពរបស់អង្គការសហប្រជាជាតិនៅកម្ពុជាថែមទៀតនោះ ឯកឧត្ដមឯកអគ្គរដ្ឋទូតថ្មីនៃ សាធារណរដ្ឋប៊ុលហ្គារី បានសន្យាថានឹងខិតខំជម្រុញ វិនិយោគិនពីប៊ុលហ្គារី ក៏ដូចជាពីសហគមន៍អឺរ៉ុបឱ្យមកវិនិយោគនៅកម្ពុជា ឲ្យបានច្រើនផងដែរ៕