គណៈប្រតិភូគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា ដឹកនាំដោយ ឯកឧត្តម យ៉ែម បុញ្ញឫទ្ធិ ប្រធាន គណៈកម្មការ បានអញ្ជើញចុះបំពេញបេសកកម្មការងារ នៅខេត្តកំពតនិងកែបចំនួនបីថ្ងៃ គឺចាប់ពីថ្ងៃទី១១ដល់ថ្ងៃទី១៣ ខែកុម្ភៈឆ្នាំ២០១៥ ដោយបានជួបពិភាក្សាការងារ ជាមួយ ឯកឧត្តម ខូយ ឃុនហួរ អភិបាលនៃគណៈអភិបាលខេត្តកំពត ឯកឧត្ដម កែន សត្ថា អភិបាលនៃគណៈអភិបាលខេត្តកែប រួមជាមួយថ្នាក់ដឹកនាំមន្ទីជំនាញនានាដែលពាក់ពន្ធ័ទៅនឹងសម្ថកិច្ចរបស់ គណៈកម្មការដើម្បី ស្វែងយល់ពីវិសយ័ការងារ ទទួលខុសត្រូវរបស់មន្ទីនីមួយៗ។
ឯកឧត្ដម ខូយ ឃុនហួរ និងឯកឧត្ដម កែន សត្ថា បានជម្រាបជូនអំពីស្ថានភាពភូមិសាស្រ្តទូទៅក្នុងខេត្តទាំងពីរដែលទទួលបានការអភិវឌ្ឍន៍លើគ្រប់វិសយ័ ជាពិសេសលើការងារសន្តិសុខសណ្ដាប់ធ្នាប់សាធារណៈ ថាមានភាពល្អប្រសើរ ហើយខេត្តទទួលបានភ្ញៀវទេសចរណ៍ជាតិ អន្តរជាតិជាច្រើនដែលមកសម្រាក លម្ហែកម្សាន្ត ទាំងនៅលើដីគោក ទាំងតាមបណ្តាកោះនិងលម្ហសមុទ្រ ។ លទ្ធផលទាំងនេះ បានមកដោយសាររដ្ឋបាលខេត្តបានចាត់វិធានការ សមស្របតាមផែនការរបស់រាជរដ្ឋាភិបាលក្នុងការអនុវត្តគោលនយោបាយភូមិឃុំ មានសុវត្ថិភាព ដោយប្រមូលផ្ដុំគំនិតនិងស្មារតីដឹកនាំអភិវឌ្ឍន៍ខេត្ត បានធ្វើអោយសមិទ្ធផលជាច្រើនលេចចេញជារូបរាងឡើង និងទទួលបានការពេញចិត្តពីប្រជាពលរដ្ឋទៅលើសេវាសាធារណៈនិងសេវារដ្ឋបាលរបស់ខេត្ត។
ឯកឧត្តម យ៉ែម បុញ្ញឫទ្ធិ ប្រធានប្រតិភូបានជំរាបជូន ពីគោលបំណងចុះបំពេញបេសកកម្មនាពេលនេះ គឺចុះសិក្សាស្វែងយល់និងស្រាវជ្រាវរកព័ត៌មានមុននឹងរៀបចំធ្វើសិក្ខាសាលានៅថ្ងៃទី ៣១ខែមីនា ឆ្នាំ២០១៥ នៅវិមានរដ្ឋសភា ជាមួយ ក្រសួងអប់រំយុវជននិងកីឡា ដោយផ្តោតសំខាន់លើការគ្រប់គ្រងហិរញ្ញវត្ថុក្រៅប្រព័ន្ធ ដើម្បីរួមចំណែកពិនិត្យប្រព័ន្ធសិក្សាអោយមានប្រព័ន្ធស្តង់ដាមួយនៅក្នុងតំបន់ ក៏ដូចជានៅលើឆាកអន្តរជាតិ សំខាន់គឺធ្វើការកំណែទំរង់ទៅលើវិសយ័អប់រំនៅកម្ពុជា ដែលក្នុងនោះមានផ្នែកឧត្តមសិក្សា មធ្យមសិក្សានិងបឋមសិក្សា ដើម្បីរិះរកវិធានការ ធ្វើការកំណែទំរង់ដោយផ្តោតលើ៥ចំនុច គឺទី១គុណភាពគ្រូបង្រៀន ទី២គុណភាពនៃកម្មវិធី សិក្សា ទី៣គុណភាពមធ្យោបាយ ទី៤គុណភាពសិស្ស និងទី៥គុណភាពសង្គម។
បន្ទាប់មកនៅក្នុងដំណើរបំពេញបេសកកម្មរបស់គណៈកម្មការទី៧នេះដែរ ឯកឧត្តម យ៉ែម ប៉ុញ្ញឫទ្ធិ បានដឹកនាំគណៈប្រតិភូ ចុះត្រួតពិនិត្យ ជាក់ស្តែងអំពីការគោរពទៅលើជំនឿសាសនាផ្សេងៗ នៅលើភ្នំបូកគោ លើភ្នំព្វាំងកូន នៅវាលស្រែ៥០០និងនៅលើកោះទន្សាយក្នុងខេត្តកែបផងដែរ។
