គណៈប្រតិភូ គណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា ដឹកនាំដោយ ឯកឧត្តម ហ៊ុន ណេង ប្រធានគណៈកម្មការ បានអញ្ជើញចុះបំពេញបេសកកម្ម សិក្សាស្វែងយល់ពីការរីកចម្រើន និង ការអនុវត្តការងារ របស់ ខេត្តកំពត និងខេត្តកែប កាលពី ថ្ងៃទី១០ ខែកុម្ភៈ ឆ្នាំ២០១៥ ។
នៅខេត្តកំពត គណៈប្រតិភូរដ្ឋសភា បានទទួលស្វាគមន៍ ដោយឯកឧត្តម ខូយ ឃុនហ៊ួរ អភិបាលនៃ គណៈអភិបាលខេត្តកំពត ឯកឧត្តម អ៊ឹង ម៉េងហួរ ប្រធានក្រុមប្រឹក្សាខេត្តកំពត។ ចំណែកនៅខេត្តកែប គណៈប្រតិភូរដ្ឋសភា ទទួលស្វាគមន៍ ដោយ ឯកឧត្តម ម៉ៅ វុឌ្ឍី អភិបាលរង ខេត្តកែប និងមន្រ្តីរាជការ ស្ថាប័នជុំវិញខេត្ត។
ថ្នាក់ដឹកនាំខេត្តទាំងពីរបាន ជម្រាបជូនដល់ គណៈប្រតិភូគណៈកម្មការទី៤នៃរដ្ឋសភា ថា ខេត្តបានខិតខំយកចិត្តទុកដាក់ យ៉ាងខ្លាំង ក្នុងការ អនុវត្ត ឲ្យបាននូវយុទ្ធសាស្រ្តចតុកោណ ដំណាក់កាលទី៣ ដោយបានពង្រឹងស្ថិរភាពនយោបាយ សន្តិសុខ សុវត្ថិភាព សណ្តាប់ធ្នាប់សាធារណៈ ជូនប្រជាពលរដ្ឋ ក៏ដូចជាភ្ញៀវទេសចរណ៍ ឲ្យកាន់តែមានប្រសិទ្ធភាពខ្ពស់។
ខេត្តកំពត ក៍ដូចជាខេត្តកែប តែងតែរៀបចំវេទិកាសាធារណៈ ស្តីពី ភូមិ-ឃុំមានសុវត្ថិភាព ដើម្បីស្តាប់ពីទុក្ខលំបាក និងតម្រូវការរបស់ប្រជាពលរដ្ឋ។ ដោយឡែកចំពោះការអភិវឌ្ឍ ហេដ្ឋារចនាសម្ព័ន្ធនានាក្នុងខេត្ត ដូចជា ធារាសាស្រ្ត ផ្លូវថ្នល់ សាលារៀន មន្ទីរពេទ្យ វត្តអារាម ត្រូវបានស្ថាបនា ស្តារ និង ពង្រីកជាបន្តបន្ទាប់ ឆ្លើយតបតាមតម្រូវការរបស់ប្រជាពលរដ្ឋ។
ឯកឧត្តម ហ៊ុន ណេង បានកោតសរសើរចំពោះការខិតខំ របស់អាជ្ញាធរគ្រប់ខេត្ត និងបានជំរុញឲ្យមានការយកចិត្តទុកដាក់ខិតខំ បម្រើ ប្រជាពលរដ្ឋ ឲ្យបានល្អបន្ថែមទៀត ស្របតាមនយោបាយរបស់រាជរដ្ឋាភិបាល៕