ឯកឧត្តមបណ្ឌិត ងួន ញ៉ិល អនុប្រធានទី២ នៃរដ្ឋសភា បានអញ្ជើញ ចុះសួរសុខទុក្ខ ស្វែងយល់ពីទុក្ខលំបាក របស់ព្រះសង្ឃ មន្រ្តីរាជការ ប្រជាពលរដ្ឋ ក្នុងស្រុកបារាយណ៍ ខេត្តកំពង់ធំ កាលពីពេលថ្មីៗនេះ។ នៅក្នុងឳកាសនោះ ឯកឧត្តមបណ្ឌិត បាន ប្រកាសសាងសង់អគារ សិក្សាមួយខ្នង៤បន្ទប់ ដោយបំពាក់នូវសម្ភារៈសិក្សាមានតុ កៅអី និងក្តាខៀវ សម្រាប់គ្រប់បន្ទប់ តបតាមការស្នើរសុំរបស់ប្រជាពលរដ្ឋ។
ឯកឧត្តមអនុប្រធានទី២ រដ្ឋសភា បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានកំណត់យ៉ាងច្បាស់ថា គ្រប់ភូមិទូទាំងប្រទេសត្រូវមានសាលាបឋមសិក្សា ហើយការផ្តល់ជូន សាលាក្នុងឳកាសនេះគឺដើម្បីឆ្លើយ តប នឹងទិសដៅរបស់រាជរដ្ឋាភិបាល។ ឯកឧត្តមបានលើកឡើងថា សាលារៀនជាថ្នាលបណ្តុះបណ្តាលវិជ្ជាជីវៈ កសាងធនធានមនុស្ស ដែលជាផ្នែក សំខាន់មួយ សំរាប់ចូលរួមក្នុងការអភិវឌ្ឍប្រទេសជាតិ។
បន្ទាប់ពីបានសំណេះសំណាល និងឆ្លើយតបនូវសំណូមពរនានា របស់ប្រជាពលរដ្ឋរួចមក ឯកឧត្តមបណ្ឌិត ងួន ញ៉ិល បានប្រគេននិងចែកជូន ទេយ្យទាន និងអំណោយមួយចំនួន ចំពោះព្រះសង្ឃ និងប្រជាពលរដ្ឋ ក្នុងនោះបានប្រគេនព្រះមេគុណខេត្តកំពង់ធំ នូវទេយ្យទានមួយសំរាប់និងបច្ច័យ ៤០ម៉ឺនរៀល ។ ប្រគេនព្រះអនុគុណស្រុកបារាយណ៍ ទេយ្យទានមួយសំរាប់និងបច្ច័យ ២០ម៉ឺនរៀល ។ ប្រគេនព្រះចៅអធិការ និងព្រះសង្ឃ ក្នុងវត្តចំនួន៥អង្គ ក្នុងមួយអង្គ ទេយ្យទានមួយសំរាប់ និងបច្ច័យ ១០ម៉ឺនរៀល ។ ជូនតាជី យាយជីចំនួន ១០០នាក់ ក្នុងមួយនាក់ ក្រណាត់សមួយដុំ និងថវិកា១ម៉ឺនរៀល។ ជូនប្រជាជនចំនួន ១ពាន់នាក់ ក្នុងមួយនាក់ទទួលសារ៉ុងចំនួនមួយ។ ឧបត្ថម្ភសាលាស្រុកបារាយណ៍ ថវិកាចំនួន១លានរៀល។ ឧបត្ថម្ភសាលាឃុំបល្ល័ង្កថវិកាចំនួន ១លានរៀល ។ ឧបត្ថម្ភក្រុមភ្លេងពិណពាទ្យថវិកាចំនួន ១០ម៉ឺនរៀល ។ ជាមួយគ្នានេះ ឯកឧត្តមបណ្ឌិត ងួន ញ៉ិល ក៏បានផ្តល់ថវិកាដំបូងចំនួន ៥ពាន់ដុល្លារដល់ជាង ដើម្បីចាប់ផ្តើមការសាងសង់ អគារសិក្សា១ខ្នងមានបួនបន្ទប់នោះដែរ៕
