ឯកឧត្តម កឹម សុខា អនុប្រធានទី១ រដ្ឋសភា នៃព្រះរាណាចក្រ កម្ពុជា បានអនុញ្ញាតអោយ ឯកឧត្តម រ៉ូដនី អិម អ៊ីលៀត (Rodney M. ELLIOTT) អភិបាលក្រុង ឡូវែល រដ្ឋម៉ាស្សាឈូសេត សហរដ្ឋអាមេរិក ដឹកនាំគណៈប្រតិភូ ចូលជួបធ្វើសវនាការ កាលពីរសៀល ថ្ងៃទី១៣ ខែមករាឆ្នាំ២០១៥នៅវិមានរដ្ឋសភា។
ឯកឧត្តម កឹម សុខា បានថ្លែងប្រាប់ ក្រុមអ្នកកាសែត បន្ទាប់ពីចប់ សវនាការថា ឯកឧត្តមរ៉ូដនី អិម អ៊ីលៀត បានលើកឡើងថា នៅក្នុងក្រុងឡូវែល មានប្រជាពលរដ្ឋខ្មែរ រស់នៅប្រមាណ៣០% ដូចនេះការដែល ឯកឧត្តម បានជាប់ឆ្នោតជាអភិបាលក្រុងក្រុងឡូវែល គឺទទួលបានការគាំទ្រ ពីប្រជាពលរដ្ឋ ខ្មែរផងដែរ។ ដំណើរទស្សនកិច្ចរបស់ ឯកឧត្តម មកកាន់ ព្រះរាជាណាចក្រ កម្ពុជានាពេលនេះ ក៏ជាឱកាស ដើម្បីឲ្យឯកឧត្តម សិក្សាស្វែងយល់ពីវប្បធម៌ ប្រពៃណី និងការរស់នៅរបស់ពលរដ្ឋខ្មែរ បន្ថែមទៀត។
សូមជម្រាបថា តាមការអញ្ជើញរបស់ ឯកឧត្ដម ហោ ណាំហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក រ៉ូដនី អិមអ៊ីលៀត (Rodney M. ELLIOTT) អភិបាលក្រុងឡូវែល រដ្ឋម៉ាស្សាឈូសេត សហរដ្ឋអាមេរិក បានដឹកនាំគណៈប្រតិភូមកបំពេញទស្សនកិច្ចនៅប្រទេសកម្ពុជា ចាប់ពីថ្ងៃទី១៣ ដល់ថ្ងៃទី១៧ ខែមករា ឆ្នាំ២០១៥។