នៅថ្ងៃអង្គារ ទី១៣ ខែមករា ឆ្នាំ២០១៥ វេលាម៉ោង ៩:៣០នាទីព្រឹក នៅស្ថានទូត បារាំង ប្រចាំកម្ពុជា ឯកឧត្តម កឹម សុខា អនុប្រធានទី១ រដ្ឋសភា នៃព្រះរាជាណាចក្រ កម្ពុជា ជាតំណាងដ៏ខ្ពង់ ខ្ពស់ របស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអញ្ជើញដឹកនាំ ប្រតិភូ គណៈកម្មាធិ​ការ អចិន្ត្រៃយ៍រដ្ឋសភា ចូលរួមរំលែកទុក្ខ ករណី ការបាញ់សម្លាប់ អ្នកសារព័ត៌មាន និង ប៉ូលីស បារាំង ដោយពួកភេរវជន។

ព្រឹត្តិការណ៍បាញ់សម្លាប់ អ្នកសារព័ត៌មាន និងប៉ូលីស ចំនួន ១២នាក់ នឹងធ្វើឲ្យ ប្រជាជន ចំនួន២០ នាក់ រងរបួស បានកើតឡើង កាលពីថ្ងៃទី៧ ខែមករា ឆ្នាំ២០១៥ នៅទីស្នាក់ការ ទស្សនាវដ្តី រូបត្លុក  Charlie Hebdo ដែលស្ថិតនៅ ទីក្រុងបារីស ប្រទេសបារាំង។

នៅក្នុងសារ ចូលរួមមរណៈទុក្ខ ឯកឧត្តម កឹម សុខា បានបញ្ជាក់ថា ក្នុងនាម ឯកឧត្តម និងក្នុងនាម សមាជិក សមាជិការដ្ឋសភា នៃព្រះរាជាណាចក្រ កម្ពុជា សូមចូលរួមរំលែកទុក្ខ ចំពោះគ្រួសារ នានា ដែល​មាន សមាជិក ទទួលមរណៈភាព និង រងរបួស ក្នុងអំឡុងពេល ការវាយប្រហារ ភេវរកម្ម នៅប្រទេស បារំាង។ យើងខ្ញុំ មានភាពសោកសៅ ជាខ្លាំង ចំពោះ អំពើដ៏ព្រៃផ្សៃ បែបនេះ ហើយយើងខ្ញុំ នៅតែគាំទ្រ លទ្ធិប្រជាធិ​បតេយ្យ និង សេរីភាព នៃសារព័ត៌មាន គ្រប់ទីកន្លែង នៅក្នុងពិភពលោក។