គណៈប្រតិភូគណៈកម្មការ ផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា ដឹកនាំដោយ ឯកឧត្តម ប៉ុល ហំម ប្រធាន គណៈកម្មការ បានអញ្ជើញចុះបំពេញ បេសកកម្ម ការងារ នៅខេត្ត កំពង់ចាម ដើម្បី ពិនិត្យមើលការអភិវឌ្ឍន៍ នៅតំបន់ រមណីយដ្ឋាន ទឹកឆា នៅថ្ងៃទី១៨ ខែធ្នូ ឆ្នាំ២០១៤ ។
ឯកឧត្តម លន់ លឹមថៃ អភិបាល នៃគណៈ អភិបាលខេត្ត កំពង់ចាម បានមានប្រសាសន៍ថា ដោយរាជរដ្ឋាភិបាល បានចាត់ទុកវិស័យទេសចរណ៍ ជាវិស័យប៉ូលមួយ ដ៏សំខាន់ក្នុង ចំណោមបណ្តា វិស័យនានា ដែលចាំបាច់ត្រូវ លើកកម្ពស់ការអភិរក្ស និងអភិវឌ្ឍន៍។ ដូច្នេះតំបន់មណីយដ្ឋាន ទឹកឆា ដែលជារមណីយដ្ឋាន ធម្មជាតិ និងជារមណីយដ្ឋាន វប្បធម៌ប្រវត្តិសាស្រ្ត ផងនោះ ទាមទារឲ្យ អាជ្ញាធរខេត្ត ត្រូវប្រើប្រាស់កំលាំង វិធានការ មធ្យោបាយ សរុប ដោយមានការចូលរួមពីមន្ទីរអង្គភាព ជំនាញពាក់ព័ន្ធ អាជ្ញាធរគ្រប់លំដាប់ ថ្នាក់ វិស័យឯកជន អង្គការក្រៅ រដ្ឋាភិបាល និងការ ចូលរួមដោយផ្ទាល់ ពីប្រជាជន និងអ្នកទេសចរណ៍ ទាំងអស់គ្នា រួមគ្នាអភិរក្ស និងអភិវឌ្ឍន៍។ រមណីយដ្ឋាន ទឹកឆា ជាតំបន់ទាក់ទាញ ភ្ញៀវទេសចរណ៍ជាតិ អន្តរជាតិយ៉ាងច្រើន ដើម្បីមកលេងកំសាន្ត ក្នុងព្រៃធម្មជាតិ ចំការម៉ៃសាក់ និងទស្សនាទិដ្ឋភាពព្រៃ ចំការច្បារដំណាំ របស់ប្រជាជនដែលស្ថិតនៅជុំវិញតំបន់នេះ។ រមណីយដ្ឋាននេះមិនត្រឹមតែជាប្រភពនៃវិស័យទេសចរណ៍ប៉ុណ្ណោះទេ តែវាក៏ជាប្រភពមេទឹក មានទំនប់អាងទឹកធំល្វឹងល្វើយ សម្រាប់ស្រោចស្រពស្រែចំការបានរាប់ម៉ឺនហិចតា និងជាប្រភពបង្កើតមច្ឆាជាតិផងដែរ។
ឯកឧត្តម លន់ លឹមថៃ បានបន្ថែមទៀតថា អាជ្ញាធរខេត្តបានរៀបផែនការ និងវិធានការជាច្រើនក្នុងការស្តារភក់ល្បាប់ កាកសំណល់នានា ពីផ្ទៃអាងប៉ែកខាងលើ ដើម្បីធានាឲ្យបានទឹកស្អាតថ្លាយង់ជាប្រចាំ រៀបចំឲ្យមានសណ្តាប់ធ្នាប់ ការលក់ដូរ ការស្នាក់នៅ និងទប់ស្កាត់ឲ្យមានប្រសិទ្ធភាពខ្ពស់ ការចោលសំរាម កាកសំណល់ម្ហូបអាហារផ្សេងៗដែលធ្វើឲ្យខូចបរិស្ថាន ។ អាជ្ញាធរខេត្តបាន ខិតខំថែរក្សា អភិរក្សព្រៃឈើនៅតំបន់នោះ រួមទាំងប្រាសាទបូរាណ និងធ្វើការជួសជុលថែទាំ ពង្រីកផ្លូវឲ្យបានធំទូលាយ ព្រមទាំងផ្សព្វផ្សាយអប់រំប្រជាពលរដ្ឋឲ្យយល់ដឹងពីផលប្រយោជន៍ នៃរមណីយដ្ឋានទឹកឆា និងគ្រោះមហន្តរាយពីការបាត់បង់តំបន់នោះ។
ឯកឧត្តម ប៉ុល ហំម ប្រធានគណៈកម្មការទី៣ នៃរដ្ឋសភា បានថ្លែងអំណរគុណ និងកោតសរសើរចំពោះ អាជ្ញាធរខេត្តគ្រប់ លំដាប់ថ្នាក់ ដែលខិតខំប្រឹងប្រែង ធ្វើការថែរក្សានិង ផ្សព្វផ្សាយពន្យល់ ប្រជាពលរដ្ឋឲ្យបានយល់ដឹង និងបំផុសគំនិតឲ្យចេះស្រឡាញ់ សម្បត្តិវប្បធម៌ ធម្មជាតិ នៅក្នុងតំបន់នោះ ព្រោះរមណីយដ្ឋានទឹកឆា ជាតំបន់ទេសចរណ៍មួយដ៏សំខាន់ និងអាចរកប្រាក់ចំណូលជូនជាតិ បាន រួមទាំងប្រជាពលរដ្ឋ នៅតំបន់នោះដែរ។
ទន្ទឹមនឹងនោះដែរ ឯកឧត្តម ប៉ុល ហំម បានចុះមើលតំបន់ រមណីយដ្ឋានទឹកឆា និងធ្វើការសាកសួរ និង សំណេះសំណាល ជាមួយប្រជាពលរដ្ឋ រស់នៅទីនោះ ដោយឯកឧត្ដមសុំឲ្យប្រជាពលរដ្ឋ បង្ហាញពីចំណុចខ្វះខាត និងបញ្ហាប្រឈមនានាបន្ថែមទៀត ដើម្បីបង្កលក្ខណៈងាយស្រួល ក្នុងការចាត់វិធានការ ការពារថែរក្សារមណីយដ្ឋាន ទឹកឆានេះ។