គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភានៃរដ្ឋសភា ដឹកនាំដោយ ឯកឧត្តម អេង ឆៃអ៊ាង ប្រធានគណៈកម្មការ បានជួបប្រជុំពិភាក្សាការងារជាមួយ អង្គការសង្គមស៊ីវិល ដឹកនាំដោយ លោក សួន ប៊ុនស័កិ្ត នៅវិមានរដ្ឋសភា ថ្ងៃទី៥ ខែកុម្ភៈ ឆ្នាំ២០១៥។
ជំនួបពិភាក្សាការងារនៅពេលនេះ ក្នុងគោលបំណង ដើម្បីតាមដានដំណើរការដោះស្រាយបញ្ហាដីធ្លី ដែលកើតមាននៅក្នុងខេត្តកោះកុង។ ប្រជាពលរដ្ឋ រស់នៅ ក្នុងស្រុកបុទុមសាគរ ស្រុកគីរីសាគរ ខេត្តកោះកុង ដែលមានប្រជាពលរដ្ឋសរុបប្រមាណជា៨៤គ្រួសារ ដែលមានជម្លោះដីធ្លីជាមួយក្រុមហ៊ុនចិន Union Development ជាយូរមកហើយ ហើយពលរដ្ឋដែលអះអាងថាខ្លួនជាអ្នករងគ្រោះ បានដាក់ពាក្យបណ្តឹងមក គណៈកម្មការទី១រដ្ឋសភា ដើម្បីជួយរកដំណោះស្រាយ។
ឯកឧត្តម អេង ឆៃអ៊ាង បានលើកនៅក្នុងកិច្ចប្រជុំថា បន្ទាប់ពីបានទទួលពាក្យបណ្តឹង គណៈប្រតិភូនៃគណៈកម្មការទី១នៃរដ្ឋសភា បានចុះទៅជួបប្រជាពលរដ្ឋ ជួបជាមួយអាជ្ញាធរ និងបានជួបតំណាងក្រុមហ៊ុនចិន ដើម្បីធ្វើការសិក្សាប្រមូលព័ត៌មាន ឲ្យបានគ្រប់ជ្រុងជ្រោយ និងរកយន្តការក្នុងការដោះស្រាយបញ្ហានេះ ដើម្បីឲ្យមានយុត្តិធម៌ និងទទួលយកបានពីគ្រប់ភាគី។
ជាមួយគ្នានេះ ឯកឧត្តមប្រធានគណៈកម្មការ ក៍បានគួសបញ្ជាក់ថា គណៈកម្មការជំនាញរដ្ឋសភា ក៍បានស្នើដល់ រដ្ឋមន្រ្តីក្រសួងបរិស្ថាន ឯកឧត្តម សាយ សំអាល់ ជួយទប់ស្កាត់ដើម្បីកុំឲ្យមានសកម្មភាព ឈូសឆាយ រុះរើផ្ទះសំបែងរបស់ប្រជាពលរដ្ឋទំាងអស់ផងដែរ។
លោក សួន ប៊ុនស័ក្តិ បានមានប្រសាសន៍ថា អង្គការសង្គមស៊ីវិលជាច្រើន បានកំពុងធ្វើការតាមដានវិវាទដីធ្លី ដែលកំពុងកើតមាននៅក្នុង ខេត្តកោះកុង នេះ និងមានការព្រួយបារម្ភ ពីការរំលោភ សិទ្ធិសេរីភាព របស់ប្រជាពលរដ្ឋ។ តែទោះជាយ៉ាងណា ខាងសង្គមស៊ីវិលស្នើសុំដល់រដ្ឋសភា និងរាជរដ្ឋាភិបាល ជួយជំរុញឲ្យមានដំណោះស្រាយ ឲ្យបានសមស្រប យុត្តិធម៌ដល់ភាគីទំាងអស់ ធ្វើ យ៉ាងណាកុំឲ្យមានអំពើហិង្សា និងការរំលោភ សិទ្ធមនុស្ស៕
